bwiza.com
Ahabanza » Dukwiye no kwibuka ko hari imbaraga muri twe zitapfuye- Gen. Kabarebe
Amakuru Politiki

Dukwiye no kwibuka ko hari imbaraga muri twe zitapfuye- Gen. Kabarebe

Umujyanama wa Perezida wa Repubulika mu by’umutekano, Gen. Kabarebe James avuga ko hari imbaraga mu banyarwanda zitapfuye mu gihe cya jenoside yakorewe Abatutsi, ko izo mbaraga ari izo kubaka igihugu.

Izi mbaraga Gen. Kabarebe yazikomojeho kuri uyu wa Gatanu tariki ya 12 Mata 2019, mu mugoroba wo kwibuka ku nshuro ya 25 jenoside yakorewe Abatutsi wateguwe n’Umuryango mugari w’Ibiro bya Minisitiri w’Intebe (Primature) n’ibigo biyishamikiyeho birimo Ikigo Gishinzwe Iyubahirizwa ry’Uburinganire mu Iterambere ry’Igihugu (GMO) n’ Ikigo cy’Igihugu Ngenzuramikorere ku mirimo ifitiye igihugu akamaro (RURA).

Ni umugoroba waranzwe n’ibikorwa byo gucana urumuri rw’ikizere, ubuhamya bw’uwarokotse Jenoside, n’ibindi birimo ikiganiro cyatanzwe na Gen. Kabarebe watangaje ko ingengabitekerezi mbere na mbere ibanza kwica abantu mu mutwe nyuma ikabarimbura.

Avuga ko ingengabitekerezo ari nka kanseri ikomeza kugenda imunga abayifitemo kugeza igihe ibiciye, akaba asaba Abanyarwanda ko nyuma ya jenoside yabaye mu gihugu, imbaraga zabo zitapfuye bazikoresha bubaka igihugu cyabo.

Yagize ati “Dukwiye kujya twibuka, tukibuka abacu bapfuye, ariko tukanibuka ko hari imbaraga muri twe zitapfuye; imbaraga zo gukomeza kubaka igihugu cyacu.”

Minisitiri w’Intebe, Dr Ngirente Edouard wari umushyitsi mukuru muri uyu muhango, yavuze ko nk’uko umukuru w’igihugu yabivuze, ngo u Rwanda rutakwemera kuba mu mateka yisubiramo, akaba anahumuriza abarorotse jenoside ndetse anabifuriza gukomeza kwibuka biyubaka.

Isingizwe Celine/ Bwiza.com

Izindi wakunda

Bwiza.com
error: Alert: Ntabwo byemewe!!