bwiza.com
Ahabanza » Muhanga: Abarokotse barasaba ko ababahemukiye  bajya batanga ubuhamya bw’ibyo bakoze
Amakuru Politiki

Muhanga: Abarokotse barasaba ko ababahemukiye  bajya batanga ubuhamya bw’ibyo bakoze

Ubwo hasozwaga icyumweru cy’icyunamo mu Murenge  wa Rongi mu Karere ka Muhanga  bamwe mu barokotse Jenoside  yakorewe Abatutsi muri 1994  bagaragaje ko  mu gihe cy’Icyunamo usanga Abacitse ku icumu rya Jenoside yakorewe Abatutsi ari bo batanga ubuhamya bw’ibyo banyuzemo n’ibyababayeho nyamara ababigizemo uruhare, bakabyemera bakanabisabira imbabazi batajya baza ngo nabo babahe ubuhamya bw’ibyo bakoze .

Kankwanzi  Marianne umwe  barokotse jenoside yakorewe Abatutsi muri 1994 utuye muri uyu murenge avuga ko bagiye bahabwa amahugurwa  menshi  yo kubafasha kwakira ibyababayeho ndetse bakaba banashobora guhagarara imbere y’abandi bakabivuga , ngo ajya yumva ko abakoze ibyaha bya jenoside nabo bahugurwa akaba asaba ko nabo bajya baza bakabaha ubuhamya bw’ibyo babakoreye kuko mu gihe cya Gacaca ntabyo bavuze n’ababivuze bavugaga bicyeya.

Agira ati«bariya bishe abantu bamennye Kiliziya, bamena insengero, bajugunya abantu mu nzuzi, babajugunya mu byobo, n’ahandi ducyeneye ngo baze baduhe ubuhamya bw’uko batojwe n’uko bigishijwe ngo baze kwica kuko imihoro barayityaje, ntampongano barazibaje, niba twe twariciwe tukabasha tubivuga nabo nibaze batubwire uko bari barabitojwe noneho twiyakirire hamwe kuko bagiye bavuga ko bashutswe banavuge abo babashutse banabitugaragarize ko koko bashutswe.»

Depite Karinijabo Barthelemy avuga ko bikwiye ko baza gutanga ubuhamya bwabo bakagaragaza amasomo bakuyemo ndetse bakanagira inama abana babo n’abavandimwe ko nta cyiza bakuye mu kwijandika muri Jenoside.

Agira ati «iki gihugu amateka yacyo arasharariye ariko turayasangiye, abo bakoze jenoside bakwiye kuza bakagaragaza uburyo Igihugu cyasenyutse ariko kandi bakavuga  uburyo  ingengabitekerezo ya jenoside n’urwango babyigishijwe mu mashuri ndetse n’ababyeyi babo bakabikurana kugeza ubwo bageze ku gusenya Igihugu ».

Uwamariya Béatrice umuyobozi w’Akarere ka Muhanga avuga ko gahunda yo Kwibuka iba yateguwe kandi bagahabwa umurongo n’ rwego rw’Igihugu  ubwo nibabona ari ngombwa nabyo bazabikoraho cyangwa haboneka urubuga rundi byakorwamo bigakorwa ngo ariko akenshi iyo byavuzwe hatangwa amakuru ku kindi gihe ngo nk’uko bagiye bagaragaza aho bashyize Imibiri y’Abatutsi bishwe muri Gacaca.

Agira ati « buriya habanza kureba inyungu zavamo bikabona guhabwa umurongo ntabwo ikintu cyose uko kifuzwe gihita gishyirwa ahagaragara ngo gishyirwe mu bikorwa kitabanje no kwigwaho mu buryo burambuye kugira ngo turebe n’inyungu tuzakuramo.».

Mu Mugenge wa Rongi niho  hatangiriye Jenoside yakorewe Abatutsi muri 1994 mu cyahoze ari Gitarama  biturutse ku muturage umwe wari wishe Umututsi witwaga Kalisa Evariste bahuriye mu nzira maze aho kugira ngo ubuyobozi bumuhane ahubwo bushishikariza abandi gukora nk’ibyo yakoze bagatangira kwica Abacutsi.

Muri uyu murenge kandi ni naho havukaga uwari Minisitiri w’urubyiruko, Nzabonimana Callixte, wagize uruhare rukomeye mu iyicwa ry’Abatutsi bo muri aka gace kuko yari yaranahatanze intwaro zo kwifashisha nka grenade yari yarahaye abaturage.

Uwambayinema  Marie Jeanne ̸ bwiza.com

 

 

Izindi wakunda

Bwiza.com
error: Alert: Ntabwo byemewe!!