bwiza.com
Ahabanza » Nta foto y’umuryango wanjye mfite- Uwarokotse Jenoside abwira LONI
Amakuru mashya

Nta foto y’umuryango wanjye mfite- Uwarokotse Jenoside abwira LONI

Esther Mujawayo Keiner, warokotse jenoside yakorewe Abatutsi atangaza ko yanyuze mu bihe bikomeye bya jenoside byahitanye buri kimwe by’umwihariko umuryango we wose ku buryo nta n’ifoto wayo yasigaranye.

Ibi yabitangaje kuri uyu wa Gatanu kuwa 12 Mata, mu muhango wo kwibuka jenoside yakorewe Abatutsi ku nshuro ya 25 wabereye ku biro by’Umuryango w’Abibumbye.

Ati “ Abarokotse dufite ubu bari barakomeretse mu mubiri no kuri roho zabo. Byagegeze aho ngira ngo ni njye mugore usigaye njyenyine. Byasaga nk’aho kurokoka bidashoboka. Ku buryo butangaje nta nkovu z’imihoro mfite.”

Yongeyeho “ Nyuma naje kumenya ko hari abandi bapfakazi ba jenoside. Bamfashije kongera kuba muzima mu by’ukuri ku buryo numva muri njye ndiho.”

Mujawayo yavuze ko Jenoside yatwaye ubuzima bw’abantu hafi ya bose bo mu muryangowe barimo abayeyi be, abavandimwe n’umugabo we.

Umunyamabanga Mukuru wa LONI, Antonio Guterres yavuze ko jenoside yakorewe Abatutsi mu 1994 ari “paji y’irabura mu mateka y’ikiremwamuntu ya vuba aha. Twifatanyije n’Abanyarwanda. Mureke dufatanye kubaka ahazaza heza ku bantu bose aho ari ho hose. Nibwo buryo bukwiriye bwo guha icyubahiro ababuriye ubuzima bwabo muri jenoside mu myaka 25 ishize.”

Perezida Kagame wari muri uyu muhango yagize ati “ Duha icyubahiro inzirakarengane. Twubaha umuhate w’abarokotse n’uburyo Abanyarwanda bishyize hamwe ngo twubake igihugu cyacu.”

Umukuru w’Igihugu kandi yasabye ko hashyirwa imbaraga mu kurwanya ibikorwa bipfobya jenoside kuko ari byo muzi wayo. Avuga ko ibi byafasha mu gutuma itongera kubaho ukundi.

Src: Chimpreports

 

 

 

 

 

Izindi wakunda

Bwiza.com