bwiza.com
Ahabanza » Musha/Rwamagana:Hashyinguwe imibiri 51 y’abatutsi bishwe muri Jenoside yakorewe Abatutsi 1994
Amakuru Politiki

Musha/Rwamagana:Hashyinguwe imibiri 51 y’abatutsi bishwe muri Jenoside yakorewe Abatutsi 1994

Umuhango wo gusoza icyumweru cyo kwibuka Jenoside yakorewe Abatutsi mu Karere ka Rwamagana wabereye kuri Paruwasi ya Musha mu murenge wa Musha hashyingurwa imibiri 51 y’inzirakarengane zazize jenoside yakorewe abatutsi  yabonetse mu mirenge ya Musha ,Munyiginya,Gahengeri na Fumbwe

Urwibutso ruri kuri Kiliziya ya Musha rushyinguyemo imibiri y’Abatutsi bazize jenoside yakorewe abatusi bagera ku bihumbi makumyabiri n’ijana na mirongo itanu na batandatu (20,156)harimo abiciwe muri Kiliziya ya Musha bakajugunywa mu byobo bibiri byari ahacukurwa amabuye y’agaciro byari bifite metero 70 na 80 z’ubujyakuzimu ,hashyinguyemo kandi imibiri yavuye mu mirenge ya Gahengeri ,Munyiginya na Fumbwe ndetse hari abari bahahungiye bavuye mu Mujyi wa Kigali n’icyahoze ari Kigali Ngali .

Abarokotse jenoside bari bahungiye kuri Kiliziya ya Musha bavuga ko hiciwe Abatutsi benshi bari bavuye mu makomini ya Gikoro nyuma yo kwicwa n’Interahamwe zifatanyije n’abajandarume nkuko byavuzwe na Safari Chrisostome wiboneye ibyahabereye ndetse akabona uko Intarerahamwe zijyana imirambo y’inzirakarengane zahiciwe .

Mu buhamya bwamaze isaha n’igice Safari yavuze ko muri iyo Kiliziya yahahungiye n’abavandimwe be bavuye muri Kigali i Nyarutama kuko bari bifite inshuti n’imiryango muri Musha ,tariki Ya 13 mata 1994 yavuze ko ibitero by’Interahamwe n’abajandarume byishe Abatutsi benshi harimo n’abo muryango ndetse na mushiki we bari bahunganye we akarokorwa nuko Interahamwe yamukuyemo ipantaro yari yambaye agasigara yambaye ikabutura yari yambariyeho amaze kuyimwambura yahise aterura ibuye ihagarara mu ruhande Interahamwe zarimo zimufata nkaho ari kumwe nazo bituma aticwa .

Safari yakomeje avuga ko yabonye iruhande rwa kiliziya umugabo yari yarabonye aho yigaga mu Gatenga, aramwegera amubajije impamvu ari i Musha amubeshya ko yaje muri Patronage indege ikagwa ariho ari anamubeshya ko se ari umugabo witwaga Hussein wari ufite abana b’Interahamwe byatumye umugabo w’umufundi amujyana aho babaga ari naho yaboneye uko imirambo y’abiciwe ku kiliziya yajyanwaga mu birombe bya Musha yapakiwe mu modoka n’Interahamwe .

Mu ijambo rya Padiri Gakirage Jean Bosco wari uhagarariye imiryango y’abashyinguye imibiri 51 yari imaze imyaka 25 itaraboneka yavuze ko bashimira Leta yongeye kubaka ubumwe bw’abanyarwanda

Yagize ati: “Ndashaka kubashimira mwese ndashimira Leta yacu yaduhaye igisubizo ‘Ndi Umunyarwanda’ ikagarura ubumwe bwacu twahoranye na mbere bukangizwa n’abakoroni,ndashimira perezida wazanye ‘Ndi Umunyarwanda’ natwe nk’Abanyarwanda ni agaciro tugomba kubungabunga aho umunyarwanda ari hose akunde ubunyarwanda akunde igihugu cyacu,kandi ndabasaba ngo ibikomere byacu byomorwe n’ubutwari bwacu  tunibuke twiyubaka ariko nanisabire abatwiciye badufashe tumenye n’aho abo tutarabona babashyize kuko hari abo tutarabona ngo tubashyingure mu cyubahiro.”

Minisitiri w’ibikorwa remezo Amb. Gatete Claver yahumurije abacitse ku icumu abasaba gukomera abwira abaturage  ko  bafite ubuyobozi bwiza bwahaye u Rwanda icyerecyezo cyiza  Kandi ko Abanyarwanda bose bitabwaho kimwe, ntawe usigaye inyuma. Yasabye abaturage bose kujya baba hafi y’abarokotse Jenoside, bakunga Ubumwe kugirango bafatanyirize no kubaka igihugu cyiza kandi gitekanye, yibukije abaturage ko n’ubwo icyumweru cy’icyunamo gisoje ariko Kwibuka bizakomeza mu minsi 100, asaba abaturage gukomeza gufata mu mugongo abarokotse Jenoside yakorewe Abatutsi, bakibuka baniyubaka.

Mu Karere ka Rwamagana hari inzibutso 11 zashyinguwemo Abatutsi 73,645 harimo n’imibiri 51 yashyinguwe mu rwibutso rwa Musha mu gihe mbere yo gushyingura iyo mibiri hari hamaze gushyingurwamo imibiri 73.594.

Hari kandi imibiri y’Abatusi bishwe muri jenoside yajugunywe mu biyaga bya Muhazi na Mugesera.

 

Izindi wakunda

Bwiza.com
error: Alert: Ntabwo byemewe!!