bwiza.com
Ahabanza » Kunanirwa kwihangana ni ko gutsindwa intambara- Gandhi
Featured IBITEKEREZO

Kunanirwa kwihangana ni ko gutsindwa intambara- Gandhi

Nk’uko twabibizeje gukomeza tubagezaho amagambo atagira uko asa yavuze n’impirimbanyi y’amahoro wagejeje u Buhundi ku ubwigenge bigobotora ingoma y’ubukoloni y’Abongereza , intambara Gandhi yarwanye ntiyigeze irangwamo ibikorwa by’urugomo nko kumena amaraso ahubwo yahamagariraga abene gihugu kutumvira no kutubaha ubutegetsi bw’ubukoloni.

Ubu buryo bwatumye bagera ku ntsinzi kandi ibihugu bitari bike ku isi byigana ubu buryo maze bibona ubwigenge. Nkuko mwabibonye mu nteruro y’inkuru, Gandhi yigishaga abaturage mu gihe cy’urugamba rwe, yavuze ko kunanirwa kwihangana ari ko gutsindwa intambara.

Ubusanzwe bimwe mu bintu umusirikari yigishwa acyinjira mu gisirikari, ni ukugira kwihangana. Niyo mpamvu kugira ngo akamilike, bimwinjiremo neza kugeza abaye umusirikari wuzuye, anyura mu bikwazo, mu myitozo ikakaye, ibabazwa kugira ngo abashe kugira kwihangana bihagije.

Umusirikari nyawe ashobora kumara igihe kinini adakora ku munwa, atarya atanywa. Umusirikari nyawe ashobora kumara amajoro adasinziriye, niyo haza imvura y’amahindu cyangwa izuba rikaze byose arabyihanganira kugira ngo asoze neza inshingano zo kurinda ubusugire bw’igihugu. Iyo umusirikari atabigenje atyo, umwanzi amuca mu rihumye agahungabanya umutekano, hakabaho gutsindwa ku uwari ku izamu cyangwa irondo.

Kubwira abo uyobora amagambo nk’aya Gandhi yabwiye abayoboke be, bitera imbaraga n’intege, ku baba bamaze kurambirwa urugamba no kwiheba kuko rwatinze. Bibasubizamo icyizere no kubona intsinzi ko iri bugufi. Bituma bagira umuhate, no kwiringira ko nyuma y’urugamba bazabarwa mu ntwari zabohoye igihugu. Uwihangana abarwa mu banyembaraga.

Mu yandi magambo uwihangana niwe utsinda, byumvikane ko utihangana ariwe utsindwa urugamba. Iyo umuntu wihangana agatsinda urugamba yitwa intwari naho utihangana akarutsindwa bamwita ikigwari. Nta muntu numwe ushimishwa nuko yiswe ikigwari kabone niyo yaba atagira ukwihangana.

Hari abantu batari bake bameze nkabo tuvuze hejuru usanga batagira ukwihangana, bene abo bamaze gutsindwa kuko aribo usanga ari abacantege ku bandi bafite umurava wo gukora ibyabateza imbere no guteza imbere igihugu. Bamwe batagira ibyo bashima byagezweho, bahora bijujuta, bivovota, baganya ubona baracitse intege barataye ikizere cyo kubaho. Bene abo baratsinzwe!

Gandhi Intwari y’Abahindi

Hari abandi, ari nabo igihugu kiba gikeneye, bahora biyemeye, bihagazeho, bahorana ikizere, bakora bumva ko hari ibyiza bagomba kugeraho, bababazwa no kuba ibyo bakoze baba batageze ku ntego yabo, bifuza akenshi kutaba ba nyamwigendaho kuko baba bakeneye amaboko y’abandi ngo batere imbere, bifuza kuzamura abanyantege nke n’ibindi byiza byinshi nk’ibyo. Bene abo bantu baba baratsinze!

Gutsindwa biragatsindwa. Niyo mpamvu bivugwa ngo ” hahirwa abihangana kugeza ku gupfa”! Bisobanura ngo umuntu agomba kwihangana kugeza ashizemo umwuka kuko aribwo ahabwa ingororano ye. Mu marushanwa tumenyereye ku isi, ntiwahabwa ikamba cyangwa ingororano utabashishe kwihangana. Uko niko gutsinda! Udafite kwihangana ntiyabasha gutsinda intambara, yaba isanzwe yaba ndetse n’iy’ibigeragezo duhura nabyo mu buzima bwacu bwa buri munsi. Iyo watsinzwe ucika intege, umwanzi ashobora no kugufataho umunyago kandi nicyo kintu kibi k’urugamba.

Mureke duharanire gutsinda biturutse ku kwihangana. Muri byose tunyuramo bitunaniza, bigoye, bibabaza, bidutoneka bituma ducika intege no kudutakariza ikizere cyo kuzagera ku byiza by’ejo hazaza, nitugire kwihangana nibwo tuzagera ku ntsinzi.

None se ntibivugwa ngo ” kwihangana kuzana kunesha?”

Gutsinda kwacu, abanyarwanda, tuzabigeraho ari uko tugize kwihangana gukomeye mu gukorera no guharanira kuzamura igihugu cyacu, dushyize hamwe no kukirinda icyo aricyo cyose cyatuma gisubira inyuma. Icyo gihe tuzaba twatsinze, maze amahanga aturunguruke kuko ntawe ukeneye kumanika amaboko. Tuzayazamurire Uwiteka Nyiringabo ahubwo dushima ko mu kwihangana kwacu twavanyemo intsinzi, twanesheje!

Izindi nkuru ziheruka

Umunyantege nke ntashobora kubabarira, imbabazi ni umwihariko w’abanyembaraga- Gandhi

Ijisho riramutse rihorewe irindi, abatuye isi bose bakwisanga ari impumyi- Amwe mu magambo Gandhi yasize avuze

Izindi wakunda

Bwiza.com
error: Ntibyemewe