bwiza.com
Amakuru Politiki

Ngoma: Basabwe gutanga amakuru y’ahari imibiri y’abishwe muri jenoside itarashyingurwa mu cyubahiro

Guverineri Mufulukye Fred

Ku mugoroba wo ku cyumweru tariki ya 14 Mata 2019 mu Karere ka Ngoma habaye umugoroba wo kwibuka Abatutsi 25.000 bashyinguwe mu Rwibutso rwa Kibungo ruherereye mu Murenge wa Kibungo. Mu butumwa umuyobozi w’Intara y’Iburasirazuba yagejeje ku baturage bitabiriye uwo mugoroba wo kwibuka yabasabye gutanga amakuru bakavuga ahari imibiri y’Abatutsi bishwe muri jenoside kugirango nayo ishyingurwe mu cyubahiro.

Umugoroba wo kwibuka wabimburiwe n’urugendo rwo kwibuka ‘walk to remember’ abarwitabiriye batangiriye ku biro by’Akarere ka Ngoma barusoreza ku Rwibutso rwa Kibungo .

Mu buhamya bwatanzwe na Madamu Ngwinondebe Cecile  wakoraga mu kigo cyari gishinzwe gukwirakwiza amazi n’umuriro mu cyahoze ari Komini Birenga ari naho hari hubatse Perefegitura ya Kibungo ubu akaba ari mu Murenge wa Kibungo, yagaragaje ko jenoside yateguwe igihe kirekire cyane Abatutsi bagatotezwa aho bakoraga ndetse no mu mayira banyuraga bitwaga amazina abatesha agaciro,yanavuze ko yakomeje avuga ko umuryango we wakomeje  gutotezwa ndetse ko  mu gihe cya jenoside abana be n’umugabo ndetse na bamwe mubo mu muryango we bashwe ariko anavuga ko nubwo yahuye n’ingaruka za jenoside ataheranwe n’agahinda ahubwo yagerageje kwiyubaka.

Madamu Ngwinondebe Cecile

Mu ijambo rye, Guvereneri w’Intara y’Iburasirazuba, Mufulukye Fred, yasabye abafite amakuru y’ahari imibiri itarashyingurwa kuyatanga kugirango ishyingurwe mu cyubahiro.

Agira ati: “Ndashimira Akarere ka Ngoma kuko kashyize imbaraga mu kubaka inzibutso nyinshi  za Jenoside yakorewe Abatutsi mu 1994 mu rwego rwo guha icyubahiro abazize jenoside, iyo tubona abarokotse jenoside bakomeye bafite ikizere cyo kubaho biradushimisha. Aya mateka tugomba kuyakuramo amasomo dukura  ku ngaruka Jenoside yakorewe Abatutsi yaduteje; isomo rya mbere nuko jenoside yadutwaye abacu, isomo rya kabiri nuko jenoside yakozwe n’Abanyarwanda ubwabo twaratsinzwe twarihekuye, ariko nanone kuba jenoside yakorewe Abatutsi 1994 yarahagaritswe n’Abanyarwanda biduha irindi shema ko tugomba gutabara aho amahanga yatereranye.”

Yakomeje agira ati: “Hari  abantu benshi batarashyingurwa mu cyubahiro, turasaba rero buri muntu wese, wamenya ahantu hakiri imibiri y’abishwe muri Jenoside yakorewe Abatutsi mu 1994 itarashyirashyingurwa, abafite amakuru turasaba ko bayaduha imitima y’abarokotse Jenoside yakorewe Abatutsi ikaruhuka.”

 

 

Izindi wakunda

Bwiza.com