bwiza.com
Ahabanza » Nyamasheke: Abarokotse Jenoside bashimiye umupasiteri wabarokoye
Amakuru Politiki

Nyamasheke: Abarokotse Jenoside bashimiye umupasiteri wabarokoye

Uwimana Jeanne Bijou wari ufite imyaka 5 gusa muri Jenoside ashimira uyu mupasiteri kuba yaramubanye iwe muri ibyo bihe,byarangira agakomeza kumurera akamushyira mu ishuri kugeza anamushyingiye akubaka urwe

Kwibuka abari  abashumba b’amaparuwasi, n’abandi bayoboke  b’itorero ADEPR ku rwego rw’akarere ka Nyamasheke  bishwe muri Jenoside yakorewe abatutsi  byaranzwe no gushimira  by’umwihariko Rév.pasiteri  Nzabagurira Fabien, umushumba wa paruwasi ya Buhinga warokoye abagera ku 10 barimo abo mu muryango w’umushumba wari umwungirije, bayoboranaga muri Paruwasi ya Korwe, mu murenge wa  Kanjongo w’ubum Rév.pasiteri  Murekezi Thomas.

Nk’uko abarokowe n’uyu mupasiteri babitangarije abari baje  kubafata mu mugongo, ngo yakoze ibikorwa  bikomeye cyane  yagombaga no kuzira urebye uburyo yabikoraga n’ubukana Interahamwe zari zifite, hakiyongeraho na bamwe mu bo yari ayoboye muri iyo paruwasi batabyishimiraga bari bamaze kwiyambura umwambaro w’ubukristo  bahindutse inyamaswa,  ngo yemera  kuva aho yari atuye arabegera, hakaba n’ubwo  yabamburaga  Interahamwe zigiye kubica akaziha amafaranga.

Ngo amafaranga yaje kumushirana  atangira kugisha inama bamwe mu bo bakoranaga  niba yafata ku y’itorero agakomeza  kugurira izo Nterahamwe ngo zitica aba bana, no gushakisha uburyo yajya yambutsa  bamwe mu batutsi yabaga yamenye aho bihishe akabohereza  muri Congo, ariko bamwe muri abo bakoranaga bakamubera ibamba ngo ntakwiye gukoresha umutungo w’itorero arengera inyenzi zije kubamara, bamwe ngo batangira no kumureba nabi,ariko  ntiyacika intege akomeza kubarwanaho kugeza barokotse.

Uwimana Jeanne Bijou yagize ati’’ Ni umubyeyi wanjye kuko ubwo  narokokeraga  muri paruwasi gatulika ya Hanika ahatikiriye abatutsi batagira ingano, nahungiye iwe ndi kumwe na mama wacu n’umwana w’umuturanyi mfite imyaka 5 gusa, araduhisha kugeza ubwo yahungishirije mama wacu muri Congo twebwe aratugumana, Jenoside irangiye akomeza  kumbana nk’umwana we, anshyira mu ishuri ndiga kugeza  anashyingiye none mbyaye kabiri, nkumva ntacyo nabona namwitura.’’

Hategekimana Violette yarokoreye abana 5 mu gihe umugabo we wari umushumba w’iyi paruwasi wungirije, Rév. Murekezi Thomas  yari amaze kwicwa bigizwemo uruhare na bamwe mu bo yayoboraga mu itorero, yabwiye Bwiza.com ati’’  Ntiyirebyeho cyangwa ngo arebe ku butunzi bwe arengera abana banjye umugabo wanjye amaze kwicwa nanjye mbara ubukeye, babaho, nkumva ntabona uko mushimira, gusa Imana yamuhaye uwo mutima izamuhe n’ijuru nta kindi namusabira.’’

Umuyobozi wa Ibuka muri aka karere Bagirishya JMV, avuga ko iyo muri kiriya gihe haboneka abapasiteri n’abavugabutumwa bameze nk’uyu Pasiteri Nzabagurira Fabien  igihugu kitari gucura imiborogo nk’uko byagenze,avuga ko akwiye kuba urugero rwiza  rw’umutima w’urukundo n’ubwitange.

Aganira na Bwiza.com,Rév. Pasiteri Nzabagurira Fabien yavuze ko  yakuze iwabo atababonana urwango akurana umuco yatojwe n’ababyeyi,amenya n’Imana,akumva yaragombaga gukora ibishoboka byose ngo yitangire abicwaga,akishimira ko abo Imana yamufashije kurokora bakiriho,agasaba bagenzi be babaye ibigwari bakijandika muri Jenoside kwemera guca bugufi bagasaba imbabazi abo bahemukiye, abakozi b’Imana b’uyu munsi bakigisha urukundo nyarwo batishushanya nka bamwe mu b’icyo gihe.

Umushumba w’itorero ry’akarere rya Nyamasheke muri ADEPR,Rév.pasiteri Kagorora  Gallican avuga ko ibyakozwe n’uyu mupasiteri ubundi ari zo nshingano z’umukristo wese nubwo hari abaziteshutse ho,agashimira n’abandi bakoze nka we,akavuga ko ubuhamya nk’ubu  bukwiye guhabwa urubyiruko rwose rw’iri torero  rugakurana  umuco nk’uyu w’urukundo nyarwo.

Itorero ADEPR muri aka karere rivuga ko abari abayoboke bwaryo bishwe muri Jenoside yakorewe Abatutsi bamaze kumenyekana ari 1006 barimo abari abashumba 2 b’amaparuwasi ,umuyobozi w’aka karere wungirije ushinzwe iterambere ry’ubukungu,Ntaganira Josué Michel  akarishimira byinshi rimaze gukorera abayoboke baryo bayirokotse,birimo n’inka 4 ryabaremeye uwo munsi.

Uwimana Jeanne Bijou wari ufite imyaka 5 muri Jenoside, arashima uyu mupasiteri warokoye ubuzima bwe
Pasiteri Nzabagurira Fabien( ufite mikoro) abo bari kumwe imbere y’abandi baturage, bavuga ko iyo atitanga ngo abarokore baba batakiriho
Kwibuka abari abakozi b’Imana n’abakristo ba ADEPR muri Nyamasheke bishwe muri Jenoside yakorewe Abatutsi byabanjirijwe n’urugendo rwo kwibuka

Izindi wakunda

1 Igitekerezo

Louis pasteuraime 23/04/2019 2:53 pm at 2:53 pm

Ntacyo wabona washimira rev pasteur fabien gusa tumusabira ijuru ntakindi

Subiza

Tanga Igitekerezo

Bwiza.com
error: Alert: Ntabwo byemewe!!