bwiza.com
Ahabanza » Ubuhamya bwa Munyanshoza Dieudonné wajombywe icumu mu rubavu anajugunywa muri Nyabarongo
Amakuru Politiki

Ubuhamya bwa Munyanshoza Dieudonné wajombywe icumu mu rubavu anajugunywa muri Nyabarongo

Munyanshoza Dieudonné warokotse jenoside yakorewe Abatutsi mu mwaka wa 1994, atanga ubuhamya bw’ibihe bigoye yanyuzemo muri jenoside, avuga ko yamugizeho ingaruka mu buryo butandukanye burimo kuba yarabuze bamwe bo mu muryango we, kutiga kandi yari afite ubwenge n’ibindi bikomere bitandukanye.

Ni umugabo, arubatse, afite abana n’umugore, akaba atuye mu Kagari ka Rutonde, Umurenge wa Shyorongi, Akarere ka Rulindo. Atanga ubuhamya bwe bw’inzira igoye yanyuzemo, yavuze ko ku itariki 9 Mata 1994, aribwo yajugunywe muri Nyabarongo ariko aza kuyivamo.

Yagize ati “Mu ikorwa rya Jenoside n’igeragezwa ryayo ndi umwe mu babonye ibimenyetso byayigaragazaga kuko iyi Nyabarongo duturiye ku Kagari kacu ka Rotonde yamanukagamo imirambo y’ababaga biciwe mu cyahoze kitwa Perefegitura ya Gisenyi, bakamanuka babajombyeho ibiti ari isheni y’abantu benshi, iriya Nyabarongo nanjye ubwanye naje kuyijugunywamo mu 1994, ku itariki ya 9 Mata, nshorewe n’Interahamwe”.

Akomeza avuga ko Interahamwe zamujugunye muri Nyabarongo, zitaturutse ahandi kure, ahubwo ko zari zigizwe n’abaturanyi. Ati “Zavukaga mu Kagari dutuyemo ka Rutonde, ni icyahoze ari segiteri Rutonde, zanjugunyemo, bantera amacumu mu rubavu irindi ku ivi ariko sinabasha gupfa kubera ko Imana yampagazeho”.

Akomeza avuga ko yagiye yihishahisha mu masaha, ibihuru, imyobo n’ahandi kugeza ubwo yaje kurokoka. Arashima ingabo zari iza FPR-Inkotanyi kuba zarahagaritse jenoside.

 

 

 

 

Izindi wakunda

Bwiza.com
error: Ntibyemewe