bwiza.com
Ahabanza » Gicumbi: Bazesa umuhigo wo gukurikirana umugoroba w’ababyeyi batawitabira
Amakuru Iterambere ry'umuryango

Gicumbi: Bazesa umuhigo wo gukurikirana umugoroba w’ababyeyi batawitabira

Nyobozi y’Akarere ka Gicumbi ivuga ko umuhigo wo gukurikirana ibikorwa by’umugoroba w’ababyeyi ugeze kuri 75% weswa, nyamara abajyanama bo bakayisaba guhuza imibare n’ubwitabirwe bwabo bukiri hasi.

Ubwo inama njyanama ya Gicumbi yateranaga kuri iki cyumweru tariki 14 Mata 2019, komite nyobozi yerekanye ko  mu mihigo 65 yiyemeje harimo uwo gukurikirana uko umugoroba w’ababyeyi ukorwa, bikaba byateganirijwe amafaranga 1, 514, 423.

Nyobozi ivuga ko uyu muhigo ugeze kuri 75%, hakaba hari icyizere cy’uko bazawesa 100%. Gusa bamwe mu bajyanama ntibishimiye iyi mibare, bo basanga idahuye n’ibibera mu midugudu, aho abayobozi batitabira umugoroba w’ababyeyi uterana ku cyumweru cya kabiri cya buri kwezi.

Meya w’Akarere ka Gicumbi, Ndayambaje Felix, asanga kwitabira umugoroba w’ababyeyi ari inshingano za buri muyobozi yaba umujyanama cyangwa n’undi wese. Agira ati, “N’abayobozi ntibitabira umugoroba w’ababyeyi kandi ubareba. Buri cyumweru cya kabiri cy’ukwezi uterana nimugoroba, ariko ni hake usangamo abayobozi”.

Mu kumwunganira, Visi Meya ushinzwe imibereho y’abaturage, Mujawamariya Elisabeth, avuga ko nyobozi yahize gukurikirana umugoroba w’ababyeyi, itahize kuwitabira. Ati, “ Icyo twashyize mu mihigo ni ukuwukurikirana, naho kuwitabira bireba buri wese. Icyo dukora ni ukwigabanyamo amatsinda ajya aho ubera, tukamenya ibyo baganira. Wenda mu gihe kizaza twanareba uburyo twajya tubabwira ingingo nyamukuru baganiraho”.

Umugoroba w’Ababyeyi, urubuga ababyeyi b’abagore n’abagabo batuye mu mudugudu umwe bahuriramo kugira ngo bungurane ibitekerezo ku ngamba zafatwa n’abagize umuryango kugira ngo barusheho kwiteza imbere, kunoza imibanire yabo, bakumira kandi bakemura amakimbirane ashobora kuvuka mu ngo, mu baturanyi cyangwa ahandi aho ariho hose.

Ni igitekerezo cyavutse mu mwaka 2010, watangiye ari “Akagoroba k’abagore” kabafashaga kuganira ku bibazo bahura nabyo no kubikemura, ariko kubera akamaro kagaragaje hafashwe icyemezo ko waba  “Umugoroba w’Ababyeyi” maze ugahuza ababyeyi bombi, abagore n’abagabo.

Ureba ibijyanye n’iterambere ry’abagize umudugudu, haba mu bukungu, mu miyoborere myiza, mu mibereho myiza ndetse no mu butabera, abagize Umugoroba w’Ababyeyi basabwa  kugira uruhare mu  iterambere ry’umudugudu wabo no mu gukemura ibibazo bitandukanye biwugaragaramo.

Bityo ingingo ziganirwaho zigaragazwa n’abagize Inteko Rusange yawo bakurikije imiterere y’umudugudu n’ibibazo bihagaragara bifuza gukemura.

Mu mwaka wa 2016, Minisiteri y’uburinganire n’iterambere ry’umuryango yasohoye inyandiko igaragaza imirongo ngenderwaho y’umugoroba w’ababyeyi, inahamagarira inzego z’ibanze n’abafatanyabikorwa bose kwifashisha iyi nyandiko.

Inasaba abayobozi b’inzego z’ibanze kurushaho gushyira imbaraga kuri iyi gahunda cyane cyane ishyirwa mu igenamigambi no mu mihigo kugirango urusheho gutanga umusaruro ushimishije mu iterambere ry’umuryango.

Izindi wakunda

Bwiza.com
error: Alert: Ntabwo byemewe!!