bwiza.com
Ahabanza » Kwibuka25: Hibutswe Abatutsi biciwe I Ruhanga
Amakuru Politiki

Kwibuka25: Hibutswe Abatutsi biciwe I Ruhanga

Kuwa mbere tariki ya 15 Mata 2019, Abanyarwanda baturutse hirya no hino baje kwibukira ku rwibutso rw’I Ruhanga (i Rusororo) mu Karere ka Gasabo kuri uyu wa mbere tariki 15 Mata 2019, hibukwa Abatutsi basaga 15000 biciwe ku rusengero rw’Abangilikani rwa EAR Ruhanga mu Murenge wa Rusororo mu Karere ka Gasabo.

Uru rusengero ubu ni Urwibutso rwa Jenoside rushyinguwemo abarwiciwemo n’abakuwe mu bice byegereye Umurenge wa Rusororo basaga 36 000

Mu muhango wo kwibuka inzirakarengane ziruhukiye muri uru rwibutso Minisitiri w’Ububanyi n’Amahanga n’Ubutwererane, Dr Richard Sezibera, yavuze ko abateguye bakanashyira mu bikorowa Jenoside yakorewe Abatutsi bibeshye ku bintu bitatu birimo imbaraga z’ukuri, iz’ubumwe bw’abanyarwanda n’iz’abahagaritse Jenoside.

Yagize ati “Icya mbere bibeshye ku mbaraga z’ukuri bubaka politiki ishingiye ku kinyoma cy’uko Abanyarwanda tutari bamwe, cy’uko igihugu kigira bene cyo abandi bakaba abavantara. Bibeshye rero ku mbaraga z’ukuri. Abataratinyuka kuvuga ukuri ku byabaye, abazi aho abantu tutarashyingura baherereye, abo baracyibeshya.”

“Icya kabiri ni uko bibeshye ku mbaraga z’ubumwe, bubatse politiki ivangura Abanyarwanda […] ariko ntabwo batinze kubona ko bibeshye kuberako iyo politiki y’amacakubiri niyo yatugejeje kuri Jenoside. Twebwe rero dukomeze twubakire ku kuri n’ubumwe. Icya gatatu bibeshye ku mbaraga z’ubuyobozi bwa RPF Inkotanyi.”

Yavuze ko RPF yagiye ibwira abateguye Jenoside kubihagarika ariko barakomeza, kugeza ubwo uyu muryango wafashe iya mbere ukayihagarika ukarokora n’abicwaga.

Yavuze ko imbaraga zatsinze ikibi zizakomeza kwiyongera ku buryo Jenoside itazasubira ukundi.

Karemera Yves warokokeye muri uru rusengero, yatanze ubuhamya ku bizazane banyuzemo nyuma yo gushishikarizwa guhungira muri uru rusengero ariko abicanyi ntibatinye ingoro y’Imana bakabasangamo.

Umuyobozi w’Akarere ka Gasabo, Rwamurangwa Steven yavuze ko nyuma ya Jenoside yakorewe abatutsi, Abanyarwanda basabwa gukomeza inzira y’ubumwe n’ubwiyunge bakiyubakira igihugu.

Ati “Ni ukwiyubaka dusana ibikomere by’umitima, umubiri ariko tunanishakamo imbaraga zo gukomeza mu cyerekezo cy’igihugu no kubaka ibishoboka cyane cyane twita ku bacitse ku icumu no kubashakira ibishoboka by’ibanze kugira ngo ubuzima bukomeze kandi bugende neza.”

Minisitiri w’Umuco na Siporo, Nyirasafari Esperance wari umushyitsi mukuru muri uyu muhango yashimangiye ko urubyiruko ari rwo rwitezweho gukomeza kubaka amateka meza y’u Rwanda.

Ati “Urubyiruko n’Abanyarwanda muri rusange, bagomba kutemera abagoreka ukuri, aho bumvise ingengabitekerezo ya Jenoside bakayamagana”.

Muri iki gikorwa kandi hanashyinguwe mu cyubahiro imibiri imibiri 65 y’abazize jenoside yabonetse irimo 33 yavanywe mu Murenge wa Bumbogo 19 yavanywe muri Kimuhurura, 7 yabonetse mu Murenge wa Ndera, umwe wabonetse  mu Murenge wa Kacyiru n’itanu yo mu Murenge wa Rusororo.

 

Izindi wakunda

Bwiza.com
error: Alert: Ntabwo byemewe!!