bwiza.com
Ahabanza » Me Ntaganda avuga ko ari impamvu za politiki zituma ashinjwa kugira uruhare muri jenoside
Amakuru

Me Ntaganda avuga ko ari impamvu za politiki zituma ashinjwa kugira uruhare muri jenoside

Umunyapolitiki Me Bernard Ntaganda avuga ko hari umugambi uhari wo kumwangisha rubanda binyuze mu kuvuga ko yagize uruhare muri Jenoside yakorewe Abatutsi mu 1994.

Ku mbuga nkoranyambaga by’umwihariko kuri facebook hari ubutumwa buvuga ko abarokotse Jenoside yakorewe Abatutsi bo mu Murenge wa Kinazi mu Karere ka Ruhango basaba ko Me Ntaganda yatabwa muri yombi agashyikirizwa ubutabera kuko ngo yagize uruhare muri jenoside.

Ubutumwa buri kuri Facebook bushinja Me Ntaganda kugira uruhare muri Jenoside yakorewe Abatutsi

Ubu butumwa buvuga ko aba barokotse bemeza ko Me Ntaganda yari Burugumesitiri wungirije wa Komini Ntongwe mu gihe cya jenoside kandi ko yafatanyaga n’uwari Burugumesitiri icyo gihe,  Kagabo  mu guhiga Abatutsi hirya no hino ku Mayaga.

Agira icyo avuga kuri ubu butumwa, Me Ntaganda   yatangaje ko ibi ari ibinyoma ko ahubwo asanga haba hari umugambi wo gushaka kumwangisha rubanda.

Ati “Ibyo bavuga ni ibinyoma bigamije kunyangisha Abanyarwanda.Ibi binyoma bikaba bishingiye ku mpamvu za politiki cyane cyane ko bije nyuma y’ijambo rya Dr Bizimana Jean Damascene wa CNLG aho anshinja njye na Ingabire Victoire ideology ya genocide [ingengabitekerezo ya jenoside] ko ngo bazadufunga kabone n’aho abazungu badushyikiye. Bigaragara ko hari umugambi wacuzwe wo kunyangisha rubanda.”

Yongeyeho ati “ Sinigeze mpunga u Rwanda kandi abo bambeshyera bari bahari. Babonye n’umwanya wo kunshinja ariko ntibigeze babikora. Aha natanga ingero zifatika: Muri 1994 nafatiwe mu nkambi ya Ruhuha n’abasirikare ba FPR, babaza abaturage b’iwacu bose bangira umwere, ndarekurwa. Mu 1996 nafungiwe muri Gereza ya Nyanza aho namaze amezi hafi abiri, ndaburana ndatsinda. Abo bari he icyo gihe? Mu 199 nafungiwe muri kasho ya Komini Ntongwe, marayo hafi amezi  atatu, batumiza abaturage b’iwacu i Kinazi ngo banshinje ariko abaturage bose berekana ko ndi umwere,”

Akomeza agira ati  “Muri uwo mwaka bamfungiye muri kasho ya Muhima, marayo ibyumweru bibiri abanshinjaga baragenda ntibagaruka polisi irandekura. Muri 2006 natumijwe muri Gacaca y’iwacu i Kinazi mburana hafi amezi atatu, abaturage bangira umwere ahubwo berekana ko nabaye intwari kuko nashoboye guhisha Abatutsi, abo banshinja bari he icyo gihe cyose?”

Uyu munyapolitiki avuga ko ibyo ashinjwa nta shingiro bifite kandi ko abavuga ibi bakoreshwa n’abandi banyapolitiki.

 

 

 

 

Izindi wakunda

1 Igitekerezo

katsinono 16/04/2019 9:17 pm at 9:17 pm

Ibinyoma se si wowe wivugiye ufatanyije na FDLR na FDU INKINGI? Akanwa kanyu kazajya kabakoraho nigaramiye!. Ukuntu wari umutapuwa mwiza ukiga i Ruhande!!!!!!!. Warajogotse kdi ukwiye kwisubiraho.

Subiza

Tanga Igitekerezo

Bwiza.com
error: Ntibyemewe