bwiza.com
Ahabanza » Impamvu toni 90 za sima zivuye muri Uganda zangiwe gucuruzwa mu Rwanda
Amakuru mashya Ubukungu

Impamvu toni 90 za sima zivuye muri Uganda zangiwe gucuruzwa mu Rwanda

Ikigo cy’Igihugu Gishinzwe Ubuziranenge mu Rwanda ( RSB) gitangaza ko mu kwezi gushize cyanze ko toni 90 za sima zivuye muri Uganda zicuruzwa mu Rwanda ku bwo gukemanga bimwe mu bigize ubuziranenge bwazo.

Iki kigo gitangaza ko izi sima z’uruganda rwa Hima rwo muri Uganda zitari zujuje ubuziranenge ku buryo zakoreshwa mu Rwanda.

Umuyobozi wa RSB, Raymond Murenzi yatangarije TNT dukesha iyi nkuru ko izi sima zasuzumwe bagasanga zitujuje ubuziranenge busabwa bwose.

Mu byo zanenzweho harimo ngo kuba zitari zujuje ibiro mirongo itanu nk’uko bisanzwe. Kuri iyi ngingo y’uburemere, zimwe zapimaga ibiro 47 na 48 kandi byanditse ko zipima ibiro 50.

Murenzi avuga ko uyu muco wo gutanga sima ituzuye Hima Cement yari yarawugize akamenyero kuva mu 2015 kandi ko yagiye ihwiturwa ariko ikavunira ibiti mu matwi.

Ati “ Ibicuruzwa [sima] byarasuzumwe ariko dusanga bitujuje bimwe mu bigize ubuziranenge. Tugenzura ubuziranenge bw’ibyinjizwa mu gihugu. Twababwiye iby’iki kibazo ariko ntacyo bigeze bagikoraho.”

RSB yemeza ko yahaye iminsi 14 uruganda rwa Hima ngo rube rwasubije iwabo ibi bicuruzwa. Ivuga ko ibi bicuruzwa biramutse byujuje ubuziranenge byakwinjira ku isoko ryo mu Rwanda nta nkomyi kandi ko ihame ry’ubuziranenge rireba n’izindi nganda zirimo n’iziri mu gihugu, nta kwibasira Hima Cement kurimo muri iki cyemezo.

Umunyamanga wa Leta muri Minisiteri y’Ububanyi n’Amahanga, Olivier Nduhungirehe yabwiye TNT ko isoko ry’u Rwanda rifunguye ariko ko buri bicuruzwa bibyinjiyeho bigomba kubanza gusuzumwa harebwa ireme bifite.

Ati “ Ibicuruzwa ibyo ari byo byose byinjiye ku isoko bigomba kuba byujuje ibisabwa.”

RSB iratangaza ibi nyuma y’aho ikinyamakuru The New Vision cyari cyatangaje ko izi sima zasubijwe muri Uganda nta mpamvu n’imwe itanzwe.

 

 

Izindi wakunda

Bwiza.com
error: Ntibyemewe