bwiza.com
Ahabanza » Leta ya Uganda yiteguye guha Omar al- Bashir ubuhungiro
Amakuru

Leta ya Uganda yiteguye guha Omar al- Bashir ubuhungiro

Leta ya Uganda kuri uyu wa Kabiri yatangaje ko ifite ubushake bwo guha ubuhungiro Omar al- Bashir uherutse guhirikwa ku butegetsi n’ingabo z’igihugu.

Uganda ivuga ko uyu mugabo aramutse asabye ubuhungiro yabuhabwa bitewe n’uruhare yagize mu mishyikirano y’amahoro mu gihugu cya Sudani y’Amajyepfo.

Umunyamabanga wa Leta muri Minisiteri y’Ububanyi n’Amahanga wa Uganda, Henry Okello Oryem yabwiye abanyamakuru ko ibi bishoboka ariko ko ari ingingo yafatwaho icyemezo na Perezida Museveni ubwe.

Ati “  Omar al- Bashir aramutse asabye ubuhungiro muri Uganda ni ingingo yasuzumwa na Perezida wa Uganda. Yagize uruhare mu mahoro yo muri Sudani y’Amajyepfo bityo natwe ubusabe bwe bw’ubuhunzi ni ikintu twaha agaciro.”

Mu cyumweru gishize nibwo ingabo zahiritse Bashir ku butegetsi, zishyira akadomo ku butegetsi bwe bw’imyaka 30. Ashinjwa kuba yarananiwe guca ruswa no  gutegekesha igihugu inkoni y’icyuma.

Uyu mugabo kandi ari mu bashakishwa n’Urukiko Mpuzamahanga (ICC) ku byaha by’intambara n’ibyibasiye inyokomuntu muri Darfour kuva mu 2005. Uwayoboye kudeta, Lt. Gen. Abdel Fattah al-Burhan Abdulrahman yavuze ko kuri ubu Bashir afunzwe ariko ko nta gahunda ihari yo kumugeza mu nkiko.

The Eastafrican

Izindi wakunda

Bwiza.com
error: Alert: Ntabwo byemewe!!