bwiza.com
Ahabanza » Champions League: Ibigwi by’amakipe yakomereje muri ½ cy’irushanwa 2018/2019
Imikino

Champions League: Ibigwi by’amakipe yakomereje muri ½ cy’irushanwa 2018/2019

Ku wa gatatu, tariki ya 17 Mata, ni bwo Liverpool na Tottenham Hotspurs zujuje umubare w’amakipe ane agomba gukina icyiciro cya ½ cy’irushanwa rya UEFA Champions League, asanzemo FC Barcelona na Ajax Amsterdam zakatishije itike ku wa 16. Aya makipe uko ari ane afite ibikombe by’iri rushanwa 14 muri rusange harimo 5 bya Liverpool, 5 bya FC Barcelona na 4 bya Ajax. Tottenham yo nta na kimwe ifite ariko ntibiyibuza kuba hari andi mateka yanditse ku ruhando rw’i Burayi.

Tubanze tumenye uko aya makipe yakatishije amatike

Ku wa 16 Mata, ni bwo ubukombe bwo mu Buholandi bwasezereye ubundi bwo mu Butaliyani, Juventus de Turin. Mu mukino wabanje, Ajax yaganyije na Juventus igitego kimwe ku kindi. Mu mukino wo kwishyura, Ajax yaje gutsinda Juventus ibitego 2-1, iyi kipe yo mu butaliyani isezererwa ku bitego 3 kuri 2.

Na none kuri iyi tariki, FC Barcelona yanyagiriye Manchester United ku kibuga cyayo( Camp Nou) ibitego 3-0 harimo 2 bya Messi na 1 cya Philip Coutinho. Mu mukino wabanje, iyi kipe yo muri Esipanye yari yatsinze Man. U igitego kimwe ku busa.

Ku wa 17, Liverpool yakiniraga na FC Porto muri Portugal, iyitsinda ibitego 4-1 bya Sadio Mane, Mohamed Salah, Firmino na Virgil Van Djik, mu gihe Porto yatsindiwe igitego rukumbi na Militao. Mu mukino ubanza wabereye mu Bwongereza, Liverpool yari yatsinze ibitego 2-0.

Mu wundi mukino w’ishyiraniro waranzwe n’ibitego byihuse kandi byinshi, Manchester City ku kibuga cyayo yakinaga na Tottenham, birangira City ikuye insinzi mu rugo ku bitego 4-3 ariko ntiyakatisha itike ku mpamvu y’ibitego yatsindiwe iwayo. Itegeko rivuga ko iyo amakipe anganyije ibitego ku mpuzandengo(aggregate), iyatsinze ibitego byinshi hanze y’ikibuga cyayo ni yo ikomeza. Iri tegeko ryagonze Man. City kuko ntiyigeze itsindira igitego na kimwe kwa Tottenham.

Nyuma y’iyi mikino, Barcelona igomba gukina na Liverpool mu gihe Ajax izaba ikina na Tottenham mu mikino ya ½ cy’irushanwa.

Nyuma yo kumenya uko aya makipe yabashije kurira ingazi zerekeza muri ½ cy’irushanwa, turebe ibigwi asanzwe afite muri iri rushanwa.

AJAX AMSTERDAM

Iyi kipe izwiho kwiharira umupira cyane, ifite ibikombe 4 bya Champions League yatwaye mu myaka y’imikino y’1970/1971, 1971/1972,1972/1973 n’ 1974/1975. Yageze ku mikino ya nyuma(finales) mu 1995/1996 n’ 1968/1969. Muri shampiyona y’iwayo(Eredivisie) ifitemo ibikombe 33 na 18 by’igihugu(KNVB Beker).

FC BARCELONA

Iyi kipe yo mu ntara ya Catalonia, ifite ibikombe 5 by’iri rushanwa harimo icy’imyaka y’imikino y’ 2014/2015, 2010/11, 2008/09, 2005/06 n’ 1991/92. Yageze mu mikino ya nyuma mu 1993/94, 1985/86, n’ 1960/61. Muri shampiyona ya Esipagne( La Liga), yatwayemo ibikombe 25 na 30 by’igihugu( Copa del Rey).

LIVERPOOL FC

Iyi na yo iri imbere y’ andi makipe yose yo mu Bwongereza mu bikombe by’iri rushanwa. Liverpool ifite ibi bikombe bitanu harimo icya 2004/05, 1983/84, 1980/81, 1977/78 na 1976/77. Yakinnye imikino ya nyuma mu 1984/85, 2006/07 n’ 2017/2018. Muri shampiyona(English Premier League), yatwayemo ibikombe 18 na 7 by’igikombe cy’igihugu( FA Cup).

TOTTENHAM HOTSPURS

Iyi ni yo kipe iri hasi dukurikije imibare iranga amateka n’ibigwi by’aya makipe. Icyakoze yagerageje gutwara Europa Cup ubugira kabiri(1971/1972, 1983/1984). Muri shampiyona, Tottenham yatwayemo ibikombe 2 n’iby’igihugu 8.

Mu 1992, ni bwo ikitwaga European Champions Clubs’ Cup cyahinduriwe izina, kitwa ‘UEFA Champions League’. Ibi ntibibuza ikipe kuvugwa ko yatwaye ibikombe bya UCL runaka kubera ko byahinduye izina. Iyo tuvuga urugero ngo “ Real Madrid yatwaye UCL 13, Barcelona itwara 5, Liverpool 5; bivuze ko hari ibyo yatwaye byitwa European Champions Clubs’ Cup, ibindi byitwa UEFA Champions League.

Izindi wakunda

1 Igitekerezo

HATANGIMANA Ally 16/05/2019 2:19 pm at 2:19 pm

ndumva zifite ibigwi byiza

Subiza

Tanga Igitekerezo

Bwiza.com
error: Ntibyemewe