bwiza.com
Ahabanza » Nyamasheke: Abarokotse Jenoside ntibavuga rumwe n’akarere ku iyimurwa ry’urwibutso
Uncategorized

Nyamasheke: Abarokotse Jenoside ntibavuga rumwe n’akarere ku iyimurwa ry’urwibutso

Abarokotse Jenoside bo mu Mirenge ya Kanjongo, Kagano n’ahandi  bafite ababo bashyinguye mu rwibutso rwa Jenoside rwa Kibogora ruri mu murenge wa Kanjongo mu Karere ka Nyamasheke, bavuga ko bafite impungenge ko uru rwibutso rushobora kwimurwa nk’uko babyumva, ariko ko bitabanezeza kubera amateka yihariye agace rwubatswemo gafite.

Abafite ababo barushyinguyemo bavuze ko aka gace ka Kibogora karimo byinshi bitanga impamvu zigaragaza ko uru rwibutso rushyinguyemo imibiri y’inzirakarengane z’abatutsi 4996 rugomba kutayegayezwa ngo ruhakure, bakaba barabivuze nyuma yo kumva ko akarere ngo kaba gafite igitekerezo cyo kurwimura imibiri irushyinguyemo ikaba yajyanwa mu rwa Nyamasheke cyangwa urwa Gahirabwoba mu murenge wa Bushenge.

Akarere gatanga impamvu ya gahunda ya Leta yo guhuza inzibutso no kuba hagiye guca umuhanda wa kaburimbo (Tyazo-Kibogora-Kabuga) abahaturiye bemerewe na perezida wa Repubulika.

Pasiteri Muremangingo Réné umwe mu basaba ko rutahimurwa yabwiye Bwiza.com ko mu mateka yihariye y’aho rwubatse ari uko aho rwubatse hari hatuwe n’ umusaza wishwe muri Jenoside  yari yabanje gufatwa bwa mbere mu byitso mu 1990 urugamba rwo kubohora igihugu rutangiye, we n’abandi batutsi bakomeza kugenda batotezwa banicwa kugeza kuri Jenoside.

Anavuga ko hari hatuye abamisiyoneri benshi,hari ibitaro bya Kibogora,urusengero rw’itorero Méthodiste Libre n’ibindi. Ubwo Abatutsi bahahungiraga muri Jenoside barahashiriye mu gihe ingabo z’abanyayetiyopiya  zari zihari muri  Minwari zitigeze zigira icyo zibamarira, yewe n’abafaransa baje muri  zone Turquoise ngo ntibabarengere.

Abayobozi b’icyo gihe bavuga ko ngo telefoni yahabaga yakoreshwaga mu kuvugana n’inkotanyi uwayikoreshaga na we akaba yarishwe muri Jenoside n’ibindi byinshi by’amateka yihariye atuma rutahava.

Yagize ati “Twarabyumvise n’akarere kadukoresha inama karabitubwira ariko nta mwanzuro wafashwe, tukifuza ko rutahava kuko n’itorero Méthodiste Libre ryatwemereye kuduha aho twarwagurira, n’iyubakwa ry’umuhanda tubona ntacyo ryarutwara, tukumva rutahava rwose.’’

Uhagarariye ibuka ku rwego rw’aka karere Bagirishya JMV, we yavuze ko ntacyo yabivugaho  kuko  niba gahunda ya Leta ari uguhuza inzibutso n’uwo muhanda ukaba ushobora kugira ibyo urubangamiraho ,abarokotse bo bagatsimbarara ko ruhaguma,bizakomeza kuganirwaho  ibivumvikanwaho akaba ari byo azashyigikira.

Umuyobozi w’aka karere Kamari Aimé Fabien, n’ubwo aterura  mu mvugo ye,ariko asa n’ukurira inzira ku murima abafite iki cyifuzo, ko ari urwibutso rutujuje ibisabwa, nta mpamvu yo kuhaguma ariko kuhakurwa bizabanza kuganirwaho n’abahagarariye abahafite ababo bose, bakumva ikigenderewe mu kurwimura,ko ari ukugira ngo imibiri iharuhukiye iruhukire aharushije ho kuba heza.

Ati “Ibyo kuba itorero Méthodiste Libre yarabemereye aho bashobora kurwagurira ntabyo nzi,ariko ikiriho ni uko hari n’indi mibiri twakuye mu nzibutso zinyuranye ikazashyingurwa yose mu rwa  Gashirabwoba mu murenge wa Bushenge, uru na rwo rukaba rutujuje ibisabwa ngo rube koko rubitse amateka y’ibyahabereye, n’ibindi bisabwa ,ariko ibiganiro biracyakomeza ikizavamo muzakimenya.’’

Iki kibazo cyanagarutsweho cyane ubwo muri uyu murenge wa Kanjongo hasorerwaza icyumweru c y’icyunamo ku wa 13 Mata,abafite ababo barushyinguyemo bongera gusaba ko rutahava, senateri Mushinzimana Appolinaire na we ababwira ko ntacyo yabizeza,ko bategereza ibizava mu biganiro byihariye bazagenda bagirana n’ubuyobozi butandukanye.

Aka karere ngo kabarirwamo  inzibutso za Jenoside yakorewe Abatutsi zirenga 19 zizahuzwa hagasigara nke zishoboka zujuje ibisabwa,ubuyobozi bukavuga ko bikorwa  byitondewe kandi ku nyungu rusange.

Aha ni mu rugendo rwo kwibuka abayobozi banyuranye berekeza kuri uru rwibutso rwa Jenoside yakorewe abatutsi rwa Kibogora
Pasiteri Muremangingo René mu izina ry’abafite ababo barushyinguyemo asaba ko rutakwimurwa kubera amateka menshi rubumbatiye

Izindi wakunda

9 Ibitekerezo

René 18/04/2019 11:45 am at 11:45 am

Murabizi ko hari abagihakana jenoside yakorewe abatutsi.
Imbere y’urwibutso rwa Kibogora hari Kaminuza ya Kibogora, ikigo cy’abanyamerika, baza i Kibogora baje kuvura, kuruhuka, n’ibindi.
Aba Banyamerika babonera hafi urwibutso bityo basubira iwabo bakaba abavugizi b’u Rwanda.

Subiza
Mparambo 18/04/2019 1:33 pm at 1:33 pm

Erega iyo bavuga kwegeranya inzibutso, ahafite amateka yihariye harabungwabungwa. Kandi kuvuga nibura rumwe ntibisobanura zitarenze rumwe. Ikibazo ni uko abagize uruhare muri jenoside b’i Kibogora benshi baridegembya, rurabarya ntibarushaka, Akarere kabibashyigikiyemo kuko kafashe icyemezo na mbere badashatse kuganira n’abahafite abantu. Kubera uburemere bw’ibyahabereya, ntibanifuza ko ubuhamya bwaho bugera kure kuko mwaranabibonye ejo bundi mu mugoroba wo kwibuka, ntibashatse ko amajwi n’amashusho by’ubuhamya bifatwa ngo bitarenga mutaru; kandi babikoze nkana, n’ubwo yari amabwiriza ya CNLG. Bari banapanze ko abavuye i Kigali badahabwa ijambo ku wa 6 umunsi wo gusoza.
Buriya hariya urwibutsi ruri, hakorerwaga imyitozo nk’iy’interahamwe imyaka irenga 30 (1963-1965) mbere y’uko bagera ku musozo wa jenocide muri 1994. Muri ruriya rusengero ruri imbere yaho, niho Dr Dismas Nsengiyaremye (umwe wavuze ko afite miliyoni y’urubyiruko rw’intarumikwa) yakoreshereje inama yo gushishikariza abahutu kwica abatutsi. Iyo nama kandi yarimo  Colonel Nsabimana Deogratias alias Castar wari umuyobozi w’ingabo z’igihugu
 Prefet Bagambiki Emmanuel
 Umuyobozi w’ingabo muri Cyangugu Lieutenant Samuel Imanishimwe
 Substitut wa procureur Nshamihigo Siméon
 Sous-préfet Terebura
 Bourgmestre Mayira Mathias
Ku ruhande rw’Itorero methodiste hari umuyobozi wa paroisse ya Kibogora, Pasteur Nsengiyumva Nathanael, ubu akaba ari umuganga mu bitaro bya Kibogora.

Amateka ni menshi kuko buriya no ku cyumweru cya mbere cy’ukwezi kwa 6, itorero methodiste riyobowe na Mr Ruhumjuriza Aaron cyateguye igiterane cyiswe icyo gushima Imana kuko ngo umwanzi w’umuhutu Imana yamutanze akicwa.

Amateka ya hariya ni menshi kuko na bariya bategetsi bose imodoka bazihagarikaga hariya urwibutso ruri.
Tuzegerenya amakuru n’ababigizemo uruhare dore ko bidegembya tubihe abo bireba.

Subiza
René 18/04/2019 5:41 pm at 5:41 pm

Ibaze komini Kirambo itarimo urwibutso; tuzika gute baziga ryar?

Subiza
Frank 18/04/2019 7:48 pm at 7:48 pm

Mbere yo kwimura urwibutso rwa KIBOGORA, bazabanze basome amateka ya Genocide yakorewe Abatutsi muri KIBOGORA, muri 1994 na mbere yaho. (Ref: RWANDA: Death, Despair and Defiance [cyanditswe na African Rights muri Dec 1994]). Kwemera ko ruriya rwibutso rwimuka ni nko kwicirwa abawe, abagusize iheruheru barangiza bakagusaba ngo bakugurire itongo na we ukabyemera. Byaba bibabaje.

Subiza
Frank 18/04/2019 8:13 pm at 8:13 pm

“NYAMAMARE KERA, NYAMASHEKE URABABAYE,
TWAJE ABO WAREZE N’INSHUTI TUVUGA “MPORE”
NTIBIGASUBIRE, BYORETSE ABO WABYAYE TWIBUKA.

RUHERU WIJIMYE WARI MWIZA CYANE,
KUKI ABANTU BISHWE BIRENZE INYAMASWA?
NKA RUTAGARAMA NA NKEZA NA NKUSI,
NA MUKANKUSI WAGIYE KURIYA,
IMANA IZABATUZE MUNEZERWE.
….”

Subiza
Frank 18/04/2019 8:22 pm at 8:22 pm

KWIMURWA KW’IKIMENYETSO CY’AMATEKA NYIRAYO ATABISHAKA SI UKUMUKOMERETSA GUSA,
AHUBWO NI UKUMURIMBURANA NA CYO.
KURIMBURANA AMATEKA NA NYIRAYO
NI UKUMUZIMANGANYA, AKAZIMA BURUNDU AGASIBANGANA.

NYUMA Y’IGIHE KITARI KININI,
NTA MUNTU WAZAJYA ABWIRA UMWANA W’I KIBOGORA NGO HABAYE GENOCIDE NGO ABYEMERE,
KUKO ABAYIROKOTSE BAZABA BARAZIMYE, BARARIMBURANYWE N’IMIZI N’IBIMENYETSO BY’AMATEKA YABO.

“EMMANCIPATE YOURSELVES FROM MENTAL SLAVERY,
NONE BUT OURSELVES CAN FREE OUR MIND” (Steeve BIKO from South Africa)

Subiza
Faustin Kanyamibwa 18/04/2019 10:02 pm at 10:02 pm

Inzego zose zifite inshingano mu kurinda no kubungabunga inzibutso, ndetse n’Umunyarwanda wese dufatanije, tugomba kugumira no kurwanya ingengabitekerezo y’ipfobya rya Jenocide, kwimura Urwibutso rwa Kibogora turabifata nko gupfobya no guhisha amateka y’ishyirwa mu bikorwa ry’ubwicanyi ryakorewe Inzirakarengane zazize uko zaremwe zishyinguye hariya mu Rwibutso. Reka mbaze uwo ariwe wese washyinguye uwe wazize Jenoside, tutitaye ku nyungu rusange, agatungurwa no guhamagarwa mu nama atari n’ibitekerezo bamukeneyeho, akumva bamubwira icyemezo cyo kwimura abe yashyinguye bazize Jenoside, wabifata cyangwa wakwiyumva gute. Na none nta n’ubwo wakwitwaza umuhanda uzaca hafi y’Urwibutso kubera ko ahagomba guca umuhanda
ntahahari, narahirebeye harahari kuko si umuhanda munini uhuza Akarere n’Utundi, nanone ndibuka ubwa mbere nageze aho Urwibutso rwubatse rushyinguyemo abacu bazize Jenoside, nta Boutique yari ihegereye, ariko ngiye gukorera i Nyamasheke, nasanze i mbere y’Urwibutso barahatondekanyije utubotiki, nahise mbona nko guhisha Urwibutso ruhari, ndetse n’urusengero rwa Methodists rwongereweho ibikorwa by’amasikariye bishyirwa ahagenewe guca umuhanda kandi mberehose nta masikariye yararuriho, abayobozi batanze ubwo burenganzira se, ko bazi neza ko kuvakera abaturage bari barasabye umuhanda, bari bazi ko uzanyurahe niba atari kurwanya ruriya Urwibutso rw’abacu bashyinguye hariya. Ndasoza nsaba Ubuyobozi kureba kure dukomeze gusigasira amateka ya Jenoside ya Korewe Abatutsi bari batuye i Kibogora no mu nkengero z’aho bashyinguwe mu Urwibutso rw’aho. Ntitugashyigikire abashaka guhisha amateka y’Inzirakarengane no guhembera ingengabitekerezo y’ipfobya rya Jenoside ryakozwe mu 1994. Urwibutso rwa Kibogora ruzatanga inyigisho ku urubyiruko biga mu ishuri rya Polytechnic’s n’abatemberera i Kibogora bose mu kurwanya ingengabitekerezo iyo ariyo yose ya Jenoside kugira ngo turusheho kwimakaza ubumwe n’ubwiyunge bw’abanyarwanda. Ndizera ubushishozi bw’Abayobozi bacu bagira mu gufafa ibyemezo ntibazemeza ko Urwibutso rusenywa. Igitekerezo kindi natanga nuko amafaranga bari kuzakoresha bimura Urwibutso, iyo ngengo y’imari izakoreshwe mu kwishyura ibikorwa by’abaturage byegereye Urwibutso kugira ngo bazabone aho bacisha umuhanda. Twibuke twiyubaka , twese turwanye ingengabitekerezo ya Jenoside itazongera ukundi.

Subiza
Solange 18/04/2019 10:34 pm at 10:34 pm

Simfite amakuru menshi, ariko niba ibi bivuzwe aribyo, gushyira urwibutso ahantu runaka byakabaye bishingiye bwa mbere ku mateka yaho hantu, izindi gahunda zikaza nyuma.

Ibyo rero byo kurujyana kure y’ amateka yarwo bikigwa nyuma.

Subiza
Frank 19/04/2019 10:22 am at 10:22 am

KWIMURWA KW’IKIMENYETSO CY’AMATEKA NYIRAYO ATABISHAKA SI UKUMUKOMERETSA GUSA,
AHUBWO NI UKUMURIMBURANA NA CYO.
KURIMBURANA AMATEKA NA NYIRAYO
NI UKUMUZIMANGANYA, AKAZIMA BURUNDU AGASIBANGANA.

NYUMA Y’IGIHE KITARI KININI,
NTA MUNTU WAZAJYA ABWIRA UMWANA W’I KIBOGORA NGO HABAYE GENOCIDE NGO ABYEMERE,
KUKO ABAYIROKOTSE BAZABA BARAZIMYE, BARARIMBURANYWE N’IMIZI N’IBIMENYETSO BY’AMATEKA YABO.

“EMMANCIPATE YOURSELVES FROM MENTAL SLAVERY,
NONE BUT OURSELVES CAN FREE OUR MIND” (Steeve BIKO from South Africa)

Subiza

Tanga Igitekerezo

Bwiza.com
error: Alert: Ntabwo byemewe!!