bwiza.com
Amakuru Politiki

Nyarugenge: Abamotari bahuguwe biyemeje gukebura bagenzi babo barangwa n’imikorere idahwitse

Polisi y’igihugu ku bufatanye n’abafatanyabikorwa bayo barimo na Federasiyo y’Abamotari mu Rwanda (FERWACOTAMU) bahuguye abamotari 500 bo mu Karere ka Nyarugenge. Abahuguwe bavuga ko bagiye gukubita agashyi bagenzi babo bica amategeko y’umuhanda nkana, abakoresha ibiyobyabwenge ndetse n’abagaragaraho umwanda.

Ni amahugurwa yabereye mu Kigo cy’urubyiruko (Maison de Jeunes/ Kimisagara) kuri uyu wa Kane tariki ya 18 Mata 2019. Umuvugizi w’ishami rya Polisi rishinzwe umutekano wo mu muhanda, SSP Jean Marie Vianney Ndushabandi akaba atangaza ko hari icyo aya mahugurwa agiye guhindura ku mikorere y’aba bamotari, baba abahuguwe ndetse na bagenzi babo.

Yagize ati “Nta kindi rero basabwa usibye kubahiriza amategeko yo mu muhanda uko yakabaye ariko by’umwihariko kwirinda umuvuduko bashorwamo n’abagenzi baba bafite gahunda zitandukanye batashoboye kuringaniza amasaha yabo na gahunda zabo bakumva ko moto aribwo buryo bwihuse bityo agasaba umumotari kwihuta, bikarangira yaba umumotara ndetse n’umugenzi bakoze impanuka cyangwa baziteje abandi”.

SSP Ndushabandi J.M.V arasaba abamotari kuba intangarugero bubahiriza amategeko yo mu muhanda

Avuga ko mu byo bakanguriye abamotari harimo kubasobanurira ko ihoni ridasimbura feri, ko ihoni rigufasha kuburira undi musangiye umuhanda mu gihe Feri ifasha utwaye ikinyabiziga kuba yakwirinda icyago icyo aricyo cyose.

Aragaya abamotari usanga badaha akanya abanyamaguru ngo batambuke aho bagenewe gutambukira (Zebra crossing) ndeste n’abamotari by’umwihariko batubahiriza amasegonda yabugenewe yo muri Feu rouge.

Ati “Birababaje kubona umuntu ahagarara anabizi neza ko kuviyola Feu rouge ari ukurenga wa murongo w’umweru yarangiza akihangana amasegonda kuva kuri 60, hasigaye atatu akaba aribwo atsimbura. Gutsimbura habura amasegenda atatu bivuze ko yarangije kuviyola Feu rouge”.

Yaboneyeho n’akanya ko gusaba abanyamaguru gukoresha neza umuhanda bagatambukira ahabugenewe kandi bazi neza ko umuhanda bawusangiye n’abandi barimo n’abatwaye ibinyabiziga.

SSP Ndushabandi avuga kandi ko muri aya mahugurwa abamotari bahugurwa ku buryo bashobora guha ubutabazi bw’ibanze ugize impanuka yaba mu muhanda cyangwa n’ahandi, bakaba banakanguriwe kwirinda gukoresha ibiyobyabwenge, ko biza ku bishobora guteza impanuka cyane cyane iza nijoro, hakiyongeraho n’umunaniro uvanze n’ibitotsi.

Nyarwaya, ni umwe muri aba bamotari uvuga ko amaze imyaka isaga 12 akora ubumotari, nyuma yo guhugurwa avuga ko hari byinshi bagiye gukomeza gukanguriramo na bagenzi babo batabashije kuyitabira, birimo nk’umwanda n’ibindi.

Ati “Umwanda ntabwo ari ikintu cyo kwihanganirwa muri iki gihugu, dukangurirwa kugira isuku y’ibinyabiziga dutwaye ndetse n’imyenda twambaye, twasabwe ko tugomba kugishyiramo imbaraga, ubu twihaye igihe cy’amezi atatu kugira ngo turebe ko iki kibazo cy’umwanda cyacika mu bamotari kuko tuza muri aka kazi duvuye ahatandukanye”.

Uyu mumotari avuga ko abahuguwe bagiye gukebura bagenzi babo batabonye aya mahirwe

Mugenzi we ati “Nyuma y’aya mahugurwa hari uburyo bugaragara tugiye kwigishamo bagenzi bacu ku buryo tuba intangarugero mu kubahiriza amategeko yo mu muhanda, hari abamotari bamwe na bamwe baba bakeneye kwegerwa bakaganirizwa kubera ko baba bafite imyumvire idahitwe, iyo myumvire idahwitse mvuga harimo no kuba bafata ibyo biyobyabwenge”.

Arasaba ko na bagenzi babo batahuguwe, aya mahirwe yazabageraho, aho gukomeza kubonwa nk’abanyamakosa ahubwo bakajya babonwa nk’abantu b’intangarugero. Kimwe na bagenzi bakaba bashima uburyo bwo gukoresha camera zizajya zifashishwa mu kwerekana ikosa ryakozwe n’utwaye ikinyabiziga.

Ni amahugurwa yitabiwe n’abamotari 500 bakorera mu Karere ka Nyarugenge, uyu ukaba ari umunsi wa Gatatu ari nawo usoza amahugurwa y’abamotari bakorera mu mujyi wa Kigali.

Izindi wakunda

Bwiza.com
error: Alert: Ntabwo byemewe!!