bwiza.com
Amakuru Politiki

Nyamasheke: Itorero Méthodiste Libre riragaya abari abayoboke baryo bijanditse muri Jenoside

Ubuyobozi bwa conference ya Kibogora mu itorero Méthodiste Libre mu Rwanda buragaya abari abayoboke b’iri torero bagize uruhare muri Jenoside yakorewe Abatutsi.

Ni bimwe mu byatangajwe n’umubwirizwa  wa Conference ya Kibogora muri iri torero,Rév. Psiteri Mushimiyimana Siméon, ubwo abakristo baryo bibukaga ku nshuro ya 25 Jenoside yakorewe abatutsi,  harimo abari abapasiteri,abarimu,abaririmbyi,abajyanama n’abandi bakristo,abamaze kumenyekana bose hamwe bakaba ari  276,u rutonde rukaba rugikomeza uko hagenda haboneka amakuru mashya.

Avuga ko muri aba hari harimo n’abana bato ubu bagombye  kuba  bakuze, bakorera itorero n’igihugu mu mpande zose,zikaba ari imbaraga zikomeye itorero n’igihugu batakaje,ikibabaje ariko ngo ni uko hari  n’abitwaga ko ari abakristo bagize uruhare mu kwica no kwicisha bagenzi babo,gusahura ibyabo n’ubundi bugome ndengakamere bwagiye bugaragara muri Jenoside,hakaba n’abataragize icyo bakora ngo batabare bagenzi babo bari muri ako kaga, kikaba ari igisebo n’ikimwaro gikomeye ku itorero.

Yagize ati ” Itorero ni umuryango. Ntabwo byaba byumvikana ukuntu umuryango wabura abantu bangana kuriya mu buryo nka buriya,nta cyaha bakoze ngo babure kuzirikanwa ari yo mpamvu tutazahwema kubibuka.

Yakomeje agira ati’’Dufite abari abakristo bijanditse muri Jenoside yakorewe abatutsi,hari abafunze n’abemeye ibyaha bararekurwa ubu bari hanze,uyu munsi turabagaya cyane, ariko cyane cyane abacyinangiye badatera intambwe yo gusaba imbabazi abo bahemukiye,nk’aba babangamira cyane gahunda z’ubumwe n’ubwiyunge bw’abanyarwanda  twiyemeje gushyigikira.’’

Pasiteri Kagorora Jacques, mu buhamya bwe na we yagaye cyane bamwe mu bo bakoranaga umurimo w’Imana muri iri torero batagize icyo bakora ngo bahishe abatutsi bahigwaga bukware ngo bicwe icyo gihe,bamwe bakicirwa mu bitaro bya Kibogora n’ahandi,agashima Leta y’ubumwe yabagaruriye icyizere cyo kubaho nyuma y’ibibi byose baciyemo.

Ati “Ntibadutabaye twicwa rubi ariko igiteye agahinda cyane ni abakomeza kubeshya ko bakorera Imana bataradusaba imbabazi kandi baraduhemukiye kariya kageni, ngasaba  abakristo bakiri bato kugira umutima w’urukundo nyakuri,bagatandukana na bariya bigiraga intama ari amasega aryana, uwiyumvamo inkomanga ku mutima akareka gukorerana Imana umugayo nk’uwo agatera intambwe yo kudusaba imbabazi kuko twe ntawe tutazababarira.

Conference ya Kibogora muri iri torero ibarirwamo abakristo barenga  ibihumbi 41 bari mu maparuwasi 22,umunyamabanga nshingwabikorwa w’aka karere,Mbyayingabo Athanase,akavuga ko izi ari imbaraga zikomeye mu kubaka igihugu n’itorero bishya bizira amacakubiri,igihe biyemeje kuba umwe,bagaharanira icyabateza imbere barwanya icyabagaruramo  umwiryane cyose.

Abayobozi batandukanye bifatanya n’abakristo b’itorero Méthodiste Libre mu kwibuka abari abayoboke baryo bishwe muri Jenoside

Izindi wakunda

Bwiza.com