bwiza.com
Ahabanza » Opinion : Amaraso y’Abatutsi ntakwiye kuba ayo gushakisha icyubahiro cyangwa ikuzo mu bantu- Ubutumwa ku muryango w’Abasilamu
Featured IBITEKEREZO Kwibuka

Opinion : Amaraso y’Abatutsi ntakwiye kuba ayo gushakisha icyubahiro cyangwa ikuzo mu bantu- Ubutumwa ku muryango w’Abasilamu

Taliki ya 14 Mata 2019, Akarere ka Rwamagana n’Umuryango w’Abasilamu mu Rwanda bifatanije n’abandi banyarwanda mu bikorwa byo kwibuka ku nshuro ya 25 jenoside yakorewe Abatutsi muri Mata 1994. Uwo muhango wabereye i Mabare aho bumvise ubuhamya bw’Abasilamu baho bayobowe na Imamu Rashidi Bagabo, maze bose bashima imyitwarire yabo mu gihe cya jenoside yakorewe Abatutsi . Ni byo kandi birakwiye ko ubutwari bw’Abasilamu b’i Mabare bushimwa ku mugaragaro kuko babaye intangarugero mu rwego ruhebuje.

Singamije kubivugaho kuko nyirubwite yabyivugiye, ariko icyo ngamije kwerekana ni ukwamagana icyo nita « Gushakira icyubahiro ku maraso y’Abatutsi ».

Umuryango wa RMC/AMUR wifuje iteka kwigarurira ibigwi bya Rashid na bagenzi be, twabimenya tukabyamagana, bagatuza none bashyizwe babigezeho, maze biyitiririra ubutwari bw’abasilamu b’i Mabare babyambika abasilamu bose bo mu Rwanda. Ibi ni Agashinyaguro, ni amahano akwiye kwamaganwa ni ukwiba amateka.

Ese ubundi abasilamu bijanditse mu bwicanyi ni ba nde koko ?

Umuryango wa AMUR/RMC kuva washingwa wagiye mu murongo wa politiki y’ivangura ryari mu gihugu. None Coran ngo yabaye ikimenyetso cy’inyigisho nziza. Umuntu yakwibaza niba aribwo icyaduka cyangwa se niba aribwo bakibuka ko bayitunze. Ndabaha ingero zifatika.

Genoside irangiye inkuru zaramamaye ko abasilamu bitwaye neza kuruta abandi banyamadini. Harimo ukuri n’amakabyankuru akwiye kugenzurwa neza maze hakamenyekana inkuru nyayo. Ndifashisha ubushakashatsi butatu kugirango tuve mu nkuru maze dushingire ku byavuye muri bwo.

Ubushakashatsi bwa mbere bwakozwe n’ikigo cy’Abanyamerika cyitwa CDA (STEPS TOWARD CONFLIT PREVENTION PROJET: Resistance and Protection: Muslim Community Actions During the Rwandan Genocide CDA (Collaborative for Development Action) et Cambridge, Massachussets USA).

Ubwa kabiri : ni Mémoire nakoreye muri Université ya Louvain la Neuve yitwa : “LE RÔLE DE L’ISLAM DANS LA PRÉVENTION ET LA LUTTE CONTRE LE GÉNOCIDE DES TUTSI DE 1994. CAS DU CENTRE DE KIBAGABAGA AU RWANDA ».

Ubwa gatatu ni igitabo cy’umu Professeur Jacques Loisin cyitwa : DANS LA NUIT LA PLUS NOIRE SE CACHE L’HUMANITE cyo kuri 14 Gicurasi 2018.

Ibyavuye mu bushakashatsi buriya bwa mbere bubanza : Ni uko Abasilamu babonetsemo ibice bibiri

  1. Igice cy’abasilamu bo mu muryango w’ AMUR (Association des Musulmans au Rwanda) bagaragayemo abishoye mu bwicanyi, abarebereye ntibice ariko ntibanatabare (résistance passive). Mu bushakashatsi nakoze nerekanye abakatiwe n’ubutabera bwo mu Rwanda, n’Ubutabera Mpuzamahanga, ndetse n’abagishakishwa..

 

  1. Igice cy’Abasilamu bo mu muryango w’ ANSAR ALLAH aribo Rashid abarizwamo. Ibyo bakoze simbisubiramo, ahubwo ndongeraho ko barwanye n’i Kibagabaga baranahagwa kuko ariho hari icyicaro cy’inyigisho bahabwaga, maze abahaguye tubashyingura mu cyubahiro taliki ya 25/06/2005. Aya mateka ntawe ukwiye kuyiyitirira ngo ayahuguze bene yo kugirango akunde agire agaciro, maze agaragare neza mu Gihugu.
Ubwo Abayobozi batandukanye bari mu muhango wo kwibuka i Mabare/Photo src :umuyoboro

Amateka arandikwa ntiyibwa.

Kuki Abasilamu bamwe batijanditse mu bwicanyi ?

ubushakashatsi twakoze bugaragaza impamvu eshatu z’ingenzi zatumye igice kimwe cy’Abasilamu kitijandika mu bwicanyi bwa jenoside yakorewe Abatutsi. Kugirango dusobanure iki kibazo bisaba kugishyira mu mateka kugirango tubashe gusobanukirwa impamvu nyazo.

Kugera mu Rwanda kw’Abasilamu ba mbere, ishyirwa mu nkampi n’ingaruka zabyo. Abasilamu ba mbere bahageze mu mwaka wa 1892 baturutse muri Tanzania, baza bikoreye imizigo y’Abadage (man powers).

Abandi bageze mu Rwanda ni icyiciro cy’Abacuruzi, nabo bazanye n’Abadage. Hafi muri 1901, nibwo binjiye I Nyanza banyuze i Shangi.

Mu 1907, inkambi ya Shangi yimukira i Kigali gushinga Umurwa Mukuru. Bazana n’abasilamu, ibikorwa by’abasilamu bitangira k’umugaragaro ahagana mu mwaka wa 1913 (cfr Heremans R. Introduction à l’histoire du Rwanda 3ème éd revue et corrigée. Et Kagabo J.Hamim / L’islam et les Swahili au Rwanda éd. Ecole des hautes études des sciences humaines Paris 1988). Abasilamu babana neza n’Abadage n’Ubutegetsi bwa Cyami.

Mu mwaka wa 1916 Abadage birukanwa mu Rwanda basimburwa n’Ababiligi, maze Ababiligi bikoma abasilamu. Kiliziya gatolika ishyiraho politiki yitwa kuzitira (quadrillage) Igihugu, yirinda Abaporoso n’Abasilamu (cfr. Histoire du Rwanda des origines à la fin du XXème siècle : UNR 2011) , maze ishinga za Misiyoni mu mpande z’igihugu. Ni uko Misiyoni zashinzwe ku Mipaka kuko Abaporoso baturukaga Uganda y’Abongereza, naho abasilamu baturuka Tanzaniya (P. Rutayisire dans LA CHRISTIANISATION DU RWANDA 1900-1945 METHODE MISSIONNAIRE ET POLITIQUE selon Mgr Classe; Fribourg éd univest 1987).

Taliki ya 25 Kamena 1925 hasohoka iteka ry’abakoloni, bacira Abasilamu mu Nkambi (cités). Ni uko imidugudu ya Kisilamu ya Nyamirambo, Kamembe etc.. yashinzwe (arrêté coloniale). Ingaruka z’icyo cyemezo : Benshi mu basilamu bari abanyamahanga, babacira mu midugudu, babatandukanya n’abandi banyarwanda, maze basigara bashaka uburyo bw’imibereho, (survie) bashyirwa kure y’ubuzima bw’Igihugu. Batakaza ibijyanye n’Umuco, Politiki, ubuhanga etc. Basigarana kwirwanaho, nibwo bigiriye mu by’ubucuruzi kenshi bwa magendu, ubukorikori n’ibindi.

Umuryango babonye wongera kubahuza n’abandi ni igihe Parmehutu itereye imyivumbagatanyo, Abatutsi bacirwa mu makambi za Bugesera no mu Gisaka, noneho ba basilamu bajya gushaka Abakobwa b’Abatutsikazi bari mu nkambi, cyane ko mw’iyimurwa ryabo batwarwaga n’imodoka z’abayisilmu, Umubyeyi uri kumwe n’abakobwa muri Tsetse agahitamo kubashyingira Umusilamu (umunyamahanga aho kumupfira mu maso). Ibi biri mu byiza ntibiri mu bibi byabo. Abahanga mu mibanire ya Muntu (sociologues) bavuga ko iyo abantu bari mu ngorane barushaho kwisungana. Aha twabonamo ubwisungane hagati y’Abatutsi n’Abasilamu.

Mufti w’u Rwanda Sheikh Hitimana Salim ubwo yari mu muhango wo kwibuka i Mabare/Photo src :umuyoboro

Imyitwarire muri Jenoside yabaye iyihe ?

Ingaruka zabyo mu gihe cya jenoside : 1. Nta cyo barengeraga kuko ntacyo bapfanaga n’ubutegetsi (pas d’enjeux politiques). Ibi bihamwa n’uko abasilamu bagiye muri politiki bitwaye nk’abandi bahutu bo mu Rwanda, baba Interahamwe, barica, barabohoza, barasahura…

  1. Kubera gushaka Abatutsikazi, abana babakomotseho barimo izo Nterahamwe, bari bafite ba Nyirarume, babyara babo na ba Nyina bari bahishe mu nzu, bityo bituma batitabira ubwicanyi.
  2. Inyigisho z’idini. Muri rusange Ubusilamu bwigisha cyane kutarenganya n’ubwo hari ubwo ibihe bituma batabyitaho. Ngizo impamvu eshatu zabaye impurirane bituma bamwe batitabira ubwicanyi.

Ikinyuranyo ku banyamuryango ba AnsarAllah : guhinduka nyakuri !

Umuryango wa Ansar Allah wigishije ubusilamu mu gihugu hagati, maze abanyarwanda basanzwe binjira idini bakomeza gutura iwabo, aho bakuriye mu myumvire ya kinyarwanda. Bari batandukanye n’abasilamu bo muri cité badafitanye isano n’amateka y’u Rwanda, Umuco, ururimi. Aho baboneye inyigisho nziza zibabuza kwica, biyemeza kureka ibyo bari bazi, ibyo bakuriyemo. Abo nibo bahindutse kuko bataye ibyo bazi.

Naho abandi ntabyo bari bazi : Ng’uko uko i Mabare havutse ririya tsinda ryarwanye ; ni uko i Kibagabaga barwanye bashingiye k’ubyo bize batojwe. Mu ijambo Rashid yavuze mu buhamya bwe ati : twagiye gutabara Abajiji , ndetse umwe yari yarahaye inka Papa. Birerekana umuntu utuye mu kinyarwanda, mu muco, mu mateka y’igihugu.

Uyu murimo wo kwirinda génocide umuryango Ansar Allah ubigaragariza mu nyandiko washyize hanze kw’ilayidi yabanjirije jenocide yakorewe Abatutsi ibyumweru 3 mbere, (inyandiko irahari) n’amahugurwa wakoresheje kuva taliki ya 2-30 Mutarama 1994 abuza abantu kwishora mu bwicanyi bikanyuzwa kuri Radio Rwanda (inyandiko irahari).

Imam Bagabo Rashid washimiwe igikorwa yakoze/Photo src :umuyoboro

Umwanzuro : Ngayo amateka n’ukuli bikwiye kwigishwa !

Ikindi kigaragaza ubucabiranya, ngirango mwabonye k’umusigiti wa Mabare washenywe muri jenoside yakorewe Abatutsi , bariya basilamu b’i Mabare bagerageje mu bushobozi bwabo bucye kwishingira ka shitingi basengeramo bakanahahurira nyuma ya jenoside yakorewe Abatutsi , iyo AMUR/RMC yaraje irabisenya ibijugunya muri Mugesera ndetse inafungisha abasilamu b’i Mabare, umugabo ntanga ni Afande Nkwaya Francis wari ushinzwe Polisi muri Kigali na Kigali Ngali. None uyu munsi baje kwiriza ay’Ingona ngo ni abantu beza, Rashid wabo w’Umusilamu. None se bamusenyera yari iki kiriya gihe. ?

Bareke kugoreka amateka, Amaraso y’Abatutsi si ayo kumara imanza z’ubwikuze n’izindi nyungu. Uwitwa Sheikh Sindayigaya yigishije uburyo Islam irwanya ingengabitekerezo y’urwango. Nashimishwa no kubibona mu basilamu aho kubisoma muri islam. Islam ni ukwemera, ni ibyanditse, ariko ibyanditse nibigaragarire mu bayoboke tubibone, bye kuba indirimbo dusoma mu bitabo.

Mu 1981 uwari umuyobozi w’abasilamu yimishije passeport abana 6 bari batsindiye kujya kwiga muri Soudan ngo kubera ko benshi bari Abatutsi, hagenda uwabaye uwa kabiri n’undi wahinduye irangamuntu, abo bose barahari. Icyo gihe se islam yari he? Islam nitwigishe kuvuga ukuri kuko ishingiye k’ukuri kandi kuboneke mu bayoboke kuve mu bitabo. AMUR/RMC  nireke kwiyitirira ubutwari bwa Bagabo Rashid, kuko itamuzi ahubwo igiye gusarura ibyo itahinze.

Omar Servil Ntagengwa

 

Mugire amahoro

NTAGENGWA Servil OMAR

Wahoze ari Umunyamabanga wa ANSAR ALLAH

Ikitonderwa: ibitekerezo biri muri iyi nkuru ni iby’umwanditsi bwite

 

Izindi wakunda

9 Ibitekerezo

Hassan Gatera 19/04/2019 7:42 pm at 7:42 pm

Nasomye inkuru yanditswe na NTAGENGWA Omar, mu by’ukuri nkunda gukurikira inyandiko zawe ukunda kwandika kuri za social media buri gihe ziba zidasobanutse. nasanze uyoborwa n’amarangamutima cg se ukaba ufite urwango uhishe utatubwira ufitiye umuryango w’Abayislamu mu Rwanda.
Nonese ubutwari bwavuzwe ku bayislamu b’i Mabare Umuryango w’Abayislamu wavuze warabeshye ntabwo ari abayislamu? Niba ari abayislamu rero ndumva ibindi urimo ntazi ibyo aribyo.
Ikindi nakwibutsa ni uko ANSWARULLAH itigeze iba umuryango uhagarariye abayislamu mu Rwanda. ANSWARULLAH yari ONG yari ifite intego y’imibereho myiza ari nayo mpamvu yashatse kujya mu ibwirizabutunwa lnzego za leta zikayihagarika burundu.
Ntabwo rero nasobanukiwe ikibazo ufite icyo ari cyo kuko abayislamu b’i Mabare ni abayislamu.

Subiza
Ibn seleman 20/04/2019 8:19 pm at 8:19 pm

Allah akongere utumwe tumenya amateka nyakuri

Subiza
Rashid Mukwiye 20/04/2019 10:06 pm at 10:06 pm

wowe ntacyo avuga
Umuryango asbl igibwamo n’ubishatse
Mu nkuru harimo ukuntu Rashid yasenyewe agafungishwa ntiyari umusilamu?
None se Amur izi he Rashid kugeza ku myaka 25 ishize? kuki itabikoze mbere? mwabaga he?
Ariko niba namwe mufite ukuri zana inyandiko yawe ureke kuvuga ko afite urwango kandi ntagihamya ugaragaza , we arashyiramo facts
Ansar Allah ONG et alors ? I mibereho myiza? I mibereho myiza ya mbere ishingira mu kwemera
Bavuga ko urwego rwa mbere rw’imibanire y’abantu ni urw’ukwemera
Bityo rero icyo yaba cyose kwigisha I y’ukwemera ntaho yaba atatiye itegeko iryo ariryo ryose

ukuri kuraryana Omar yababwiye mwebwe muvanga ukwemera mugashaka kwishyira imbere mwitwaje Amaraso y’abacu kandi muzi uko byagenze . Omar Courage ntibaguce intege

Subiza
Kamali Babu 20/04/2019 11:00 pm at 11:00 pm

Inkuru yawe igaragaza ko ibyo uvuga birimo amarangamutima yuzuyemo urwango wanga abayisilamu. Ikibabaje nuko wivuguruza mubyo uvuga

Subiza
Bizima 20/04/2019 11:15 pm at 11:15 pm

Njye nsanga hari ibyo ngo ibice cy’abayisilamu, ubundi ngo Amur, ikivugwa ni abayisilamu muri rusange utavuze abashiya, abasuni n’abandi. Ikindi gishingirwa ni declaration yakozwe nuwari umuyobozi w’abayisilamu. Biratangaje aho uvuga ko abanyamerika baze ubushakashatsi bavuga ko abayisilamu batijanditse mu bikorwa by’ubunyamaswa muri 1994, nabonye bikubabaza ukumva ko bitagobye kuvugwa, ariko warangiza ukaba urivuguruje ukerekana impamvu batagiyemo. Bigaragara ko Hari ikindi kibazo ufitanye n’abayisilamu cyangwa ubwisilamu. Yego ntihabuze abatarakurikiye amahame y’idini, ariko urebye muri rusange mu ma quartier bari batuyemo bagiye bagerageza nubwo bikubabaza ariko ntibihakana.

Subiza
Seif 21/04/2019 9:45 am at 9:45 am

Omar, nyuma yo gusoma iyi nyandiko yawe ndabona ushaka guteranya abantu nkubaze Answarullah uvuga ni Abakirisitu cg ni Abaislam? RMC yashimye ubutwari bwaba Islm ntabwo kd ndakeka Rashidi nawe ni umuslam rero ndumva wowe ushaka kuzana ivangura ngo Answarullah na RMC ikigambiriwe mu kuvuga ni ubutwari bwaba Islam ba Mabare
Kuba Rashidi yarasenyewe ndacyeka ari ikindi kibazo cyarebwa ukundi ntabwo tuzi impamvu yatumye bamusenyera ntakuri dufite kuribyo

Subiza
Hunter 25/04/2019 12:09 am at 12:09 am

Halloo muraho!njye ndibaza nti none niba barashimye ubutwari b’abayislam haraho wumvise bashima Amur cg Answar cg Shia…bavuze icyitwa Islam in general keretse niba abo wavuze wiyitirira atari abayislam!,none kuki ushaka kuvangura warangiza ukanakoresha umutwe w’inkuru ukakaye nkuyu?!ibi sibyo dushaka twifuza kubaka urwanda ntabwo iby’amatiku yanyu ngo Amur na Answar…tubikeneye,this no sense!!!

Subiza
simbi darius konde 27/04/2019 8:13 am at 8:13 am

abantu nkaba ba Omar koko baracyabaho? kabishywe uhunga igihugu ariko ibyo bihugu byabazungu nabyo muzabikururira? umva wa mugabo abarokoye abatutsi barabikoze, abatarabikoze nakazi kabo. batabawe n’Inkotanyi zo karama. naho ayo mahomvu yawe yuzuye amatiku n’ubutiriganya turayanze kwa jia la Yesu

Subiza
boringo 27/04/2019 8:24 am at 8:24 am

umushakashatsi ukora globalisation koko urababaje? sinzi aho wize n’uwaguhaye diplome ariko arijye nayikwambura.
GACACA yarabaye irarangira, amakuru aratangwa. ntabwo higeze haregwa communaute iyo ariyo yose, haregwagaga umuntu ku giti cye.
iyo umukirisitu/umusilamu akoze icyaha ntabwo kireberwa mu ndorerwamo y’idini. kuko ntabwo ari idini riba ryamworohereje. iyo umuyisilamu arokoye umuntu cg amwishe ntabwo bibazwa abaisilamu bose.
niba abo bagabo basengera mu dini ya Isilamu hari abatutsi baroko ni byiza. ubwo nibwo bugabo, niko kuba umugabo ni ukutaba ikigwari. ni ukuba intwari. ni ukuba Inkotanyi.

iNaho ibyo bintu byanyu byo kujyanisha nibyo bituma abantu bibaza ko icyaha cyakozwe n’umuhutu w’i Rusizi kizabnazwa uwi Nyagatare kandi bataziranhye, ntacyo bapfana atanamutumye.
niba hari abarwanye ku batutsi ni byiza. Imana niyo izi ukuri izabibahembera. ariko ikizwi ni uko abasa ore b’Inkotanyi z’Amarere nibo baturokoye ku bubasha bw’imana . turabasabira koku Mana ikomeze ibahe ubwenge bwo kuyobora iki Gihugu n’abagituye.
Iman

Subiza

Tanga Igitekerezo

Bwiza.com
error: Alert: Ntabwo byemewe!!