bwiza.com
Ahabanza » RDC: Moise Katumbi yakuriweho igifungo yari yarakatiwe
Politiki

RDC: Moise Katumbi yakuriweho igifungo yari yarakatiwe

Urukiko rwo muri Repubulika Iharanira Demukarasi ya Congo, rwagize umwere Moise Katumbi, rumuvaniraho n’igifungo cy’imyaka itatu yari yarakatiwe mu 2016. Ni mu itangazo ryashyizwe mu ruhame kuri uyu wa 19 Mata.

Ubundi, ku wa 17 ni bwo uru rukiko rwafashe umwanzuro wo kubohora Katumbi wahoze ari umuyobozi w’intara ya Katanga ariko ntibyari byagatangajwe.

Umunyamategeko wa Katumbi, Me Jean Joseph Mukendi yagize ati:
“Ndabahamiriza ko urukiko rukuru rwavanyeho iki gihano cy’urukiko rwa Kamalondo ryakatiraga Katumbi imyaka itatu y’igifungo ku wa 17 Mata.”

Me Mukendi aravuga ko uku gukurirwaho ibirego n’igifungo bigira Katumbi umuntu ubohotse ku buryo yajya hanze y’igihugu cyangwa akakigarukamo nta kibazo kihabaye.

Moise Katumbi yakatiwe iki gifungo ku wa 22 Kamena, 2016, ashinjwa gukoresha umutungo wa leta no kuwunyereza, ariko ntiyafunzwe kuko yahise ahungira muri Afurika y’Epfo.

Haracyibazwa byinshi ku mpinduka z’ingoma ya Tshisekedi.

Mu bintu umuntu yakwibaza harimo niba Tshisekedi na Katumbi bigeze gufatanya mu kutavuga rumwe na leta ya Joseph Kabila bashobora kuba bongeye guhuza imbaraga, Tshisekedi akaba yafashije Katumbi kugaruka mu gihugu yifashishije ubutabera.Ntitwakwibagirwa ko ubu butabera bwahejeje uyu mugabo ishyanga ku ngoma yahozeho ari bwo bumugaruye ku ivuko ku ngoma ya Tshisekedi.

N’ubwo Tshisekedi ari umukuru w’igihugu, aracyafite bamwe mu batavuga rumwe n’ingoma ye, harimo n’abambari ba Katumbi. Bumwe mu buryo bwafasha Tshisekedi kwigarurira aba bantu harimo guha Katumbi umwanya ukomeye muri politiki.

Ibyemezo bya Tshisekedi bisa n’ibivuguruza ibya Joseph Kabila. Ingero zirimo: gufungura imfungwa za politiki zari zarashyizwe mu gihome n’ingoma ya Kabila no guhagarika iyongezwa ry’amafaranga yishyurwa muri kaminuza. Kuva yagera ku butegetsi yakoze byinshi harimo gushobora kumvisha imitwe y’inyeshamba ko zikwiye gusubira mu buzima busanzwe na zo zikamukundira, yasuye Leta Zunze Ubumwe z’Amerika, yagendereye u Rwanda aho yasuye urwibutso rwa Kigali ku Gisozi, yunamira inzirakarengane zazize Jenoside yakorewe Abatutsi mu 1994. Hamwe na leta y’u Rwanda kandi, hafunguwe ingendo zo mu kirere za RwandAir, zizajya ziva i Kigali zijya i Kinshasa gatatu mu cyumweru.

N’ubwo Tshisekedi hari abataremeye ko yatsinze amatora y’umukuru w’igihugu(ko habayemo amanyanga), aragaragaza ko afitiye gahunda nziza abaturage; mu rwego rwo kubigarurira, yerekana ko atandukanye n’abandi bamubanjirije. Ibi bigaragarira mu buryo abyutsa umubano n’ibihugu usa n’utari umeze neza, kumvikana n’abatavuga rumwe na we no kwita ku kibazo cy’umutekano muke cyaranze iki gihugu kuva mu bihe byo ha mbere.

Na none  kandi, icyo tutakwirengagiza ni uko bimwe muri ibi bisa no kuvuguruzanya bishobora kuzamura amakimbirane hagati ya Tshisekedi na Kabila. Kuba ishyaka rya Kabila(FCC) rifite umubare munini w’abagize inteko ishingamategeko, bimwongerera ijambo muri politiki.

Izindi wakunda

Bwiza.com
error: Ntibyemewe