bwiza.com
Amakuru mashya

Uganda ivuga ko hari ingabo z’u Rwanda zinjiye ku butaka bwayo

Igitangazamakuru gikorera kuri interineti cyo muri Uganda, Chimpreports gitangaza ko Ingabo z’u Rwanda zinjiye ku butaka bwa Uganda mu Karere ka Kisoro.

Mu nkuru yacyo yo kuwa 18 Mata ifite umutwe ugira uti “ Tension flares as  Rwandan soldiers cross into Uganda” ugenekereje mu Kinyarwanda ari byo kuvuga ngo “Igikuba cyacitse nyuma y’aho ingabo z’u Rwanda zinjiye ku butaka bwa Uganda”.

Iki kinyamakuru kivuga ko uku kwinjira kw’Ingabo z’u Rwanda kwatumye  abasirikare bakuru mu ngabo za Uganda baterana ngo bige ku byo bise ubushotoranyi bw’u Rwanda.

Iyi nkuru ivuga ko yaganiriye n’abaturage benshi bo muri aka gace bakavuga ko Ingabo z’u Rwanda zikora ibikorwa byo gucunga umutekano  mu bice by’umupaka zijya zinjira ku butaka bwa Uganda.

Umwe muri aba baturage ufite akabari na resitora, Hellen Mwiza yagize ati “ Abasirikare b’u Rwanda bambaye imyenda y’akazi, bafite imbunda n’amasasu baza hano bashaka ibiryo, inzoga n’itabi (isigara). Iyo bamaze  kunywa basubira mu Rwanda.”

Iyi nkuru ikomeza ivuga ko bitashobotse kuvugana n’ubuyobozi bwo muri Uganda bitewe ahanini n’uko Perezida Museveni w’iki gihugu yategetse ko  abayobozi badakwiriye kuzajya bagira icyo batangaza ku bibazo biri hagati y’u Rwanda n’iki gihugu.

Ubuyobozi bw’u Rwanda iki kinyamakuru kidatangaza ubwo ari bwo, bwavuze ko ngo Ingabo z’u Rwanda zifite ikinyabupfura ku buryo zitakora iri kosa ryo kwambuka ngo zijye kurya no kunywera muri Uganda.

Ati “ Abasirikare bacu ntibakora ibyo bintu. Nta kibazo na kimwe bafite cyatuma bajya muri Uganda gushaka ibiryo cyangwa inzoga.”

Nyuma yo kumenya aya makuru, Ingabo za Uganda (UPDF) ngo ziri kwiga kuri iyi mikorere y’Ingabo z’u Rwanda kugira ngo harebwe niba hagamijwe ubushotoranyi cyangwa se niba biba ari ukujya ukwica isari n’akanyota.

Hagati aho hakomejwe kwibazwa impamvu ubuyobozi bwa Uganda nta musirikare w’u Rwanda n’umwe rwafashe ngo bumugaragaze.

Iki kinyamakuru kandi nticyabashije kuvugana n’Umuvugizi w’Igisirikare cya Uganda, Brig. Richard Karemire kugira ngo agire icyo avuga kuri aya makuru.

Bwiza.com yashatse kumenya icyo Ingabo z’u Rwanda (RDF) zibivugaho kuri uyu wa 18 Mata 2019 saa 13:01 z’igicamunsi.  Umuvugizi wa RDF,  Lt. Col. Innocent Munyengango  yatubwiye ko ntacyo yadutangariza kuri aya amakuru.

Ati “ Ese ntiwabaza ababyanditse?  Ntabwo ushobora kubavugisha? Njyewe ntabwo na komentinga [commenting] ibintu biri mu binyamakuru. Icyanditswe kuri Chimpreports ukakivuga, ikiri kuri You Tube ukagisobanura, ngira ngo  twazahora tuvugana buri munsi. [Aseka] Hari ibintu biba kuri sosho midiya[social media] ni byinshi, nubireyakitingiraho [ utanga sitandi [stand] ya fosi [ force] ntabwo twazakora ngo bikunde.  Njyewe nta komenti [comment] ndibubikoreho.”

Iyi nkuru yanenzwe n’abantu batandukanye

Ku rundi ruhande, benshi mu basomye inkuru ya Chimpreports bavuze ko  uyu ari umukino wo kwenyegeza ikinyoma cy’uko ‘kuva u Rwanda rwafunga imipaka yarwo mu kwezi gushize, ‘Abanyarwanda babayeho nabi’. Bemeza ko iki ari ikinyoma cyimukiye ku ngabo z’u Rwanda, zubashywe ndetse zikaba zimwe mu zifite ikinyabupfura n’ubunyamwuga muri Afurika.

Umwe muri aba ni uwitwa Yolande Makoro kuri twitter wagize  ati ” Giles Muhame[Uwanditse inkuru], ibi ni ukwirengagiza inshingano. Ibi ni ibihuha byigendera. Ese uri mu biki?.”

Ibi biravugwa  mu gihe Ingabo z’u Rwanda ziri mu butumwa bw’amahoro muri Afurika haba muri Sudan, Centrafrique n’ahandi zishimwa cyane n’abaturage kubera ubunyamwuga  n’ikinyabupfura biziranga.

Iki ni icyemezo cyafashwe nyuma y’aho bamwe mu Banyarwanda bajya cyangwa bakorera muri Uganda bagiye batabwa muri yombi, bagakorerwa iyicarubozo, kwamburwa utwabo bashinjwa kuba intasi. Ni imigirire u Rwanda rwamaganye rwivuye inyuma ariko Uganda ntiyagira icyo ibikoraho.

 

 

 

 

Izindi wakunda

Bwiza.com