bwiza.com
Ahabanza » Leah Karegeya avuga ko urupfu rw’umugabo we rwamugizeho ingaruka cyane
Amakuru mashya Featured

Leah Karegeya avuga ko urupfu rw’umugabo we rwamugizeho ingaruka cyane

Leah Karegeya, umupfakazi wa Karegeya Patrick wiciwe muri Afurika y’Epfo, avuga ko nyuma y’urupfu ry’umugabo we rwamugizeho ingaruka hamwe n’abana be.

Karegeya Patrick wahoze mu gisirikare cy’u Rwanda afite ipeti rya Koloneri, yishwe mu ijoro ryo ku wa 31 Ukuboza 2013, muri Afurika y’Epfo, biza gutangazwa ko yanigiwe muri Hoteli. Umugore we akaba avuga ko ibihe byakurikiye urupfu rwe byabagoye nk’umuryango ariko ko bizeye kuzabisohokamo.

Ubwo yagiranaga ikiganiro n’ikinyamakuru cyo muri Uganda, Suturdayvision, nibwo yabajijwe niba urupfu rw’umugabo we rutaramugizeho ingaruka.

Mu gusubiza, Leah yagize ati “Rwangizeho ingaruka nyinshi, kuba impunzi ntabwo byoroshye. Birakomeye ariko hamwe n’Imana iri mu ruhande rwacu n’abantu badufasha tuzabisohokamo. Umugabo wanjye yazize guharanira ibyo yemera. Twahoraga tubiganiraho, muri make no muri iryo joro ribanziriza iry’ubunani 2013, naramuvugishije.

Nari ndi muri Amerika ari muri Afurika y’Epfo, yatubwiye ko azaduhamagara umunsi w’Ejo, ntibyashobotse. Nakomeje kumuhamagara ariko ntafate telefoni kugeza nakiriye inkuru mbi”.

Yakomeje avuga ko inkuru mbi bagiye kuyimenya n’ubundi bari bagize amakenga hamwe n’umukobwa we, ngo bitewe n’uburyo bari basanzwe bazi agaciro Karegeya yabahaga nk’umuryango we.

Ati “Njye n’umukobwa wanjye twabanje kugira amakenga. Tugira umutima uhagaze tubonye atadusubiza, kuko umugabo wanjye yaraduhamagaraga buri gihe, ntabwo yarangwaga no guceceka no kutitaba telefoni yacu. Kera kabaye tuza kwakira ubutumwa buturutse ku muntu wo mu muryango wo muri Afurika y’Epfo”.

Leah avuga ko uwishe umugabo we amuzi, ko yari inshuti ye kandi yizeraga cyane. Ku rundi ruhande kandi aribaza impamvu urubanza rw’abacyekwaho kugira uruhare mu rupfu rw’umugabo we rutinzwa, ku bwe akavuga ko nk’umuryango bibatera amakenga.

Karegeya yanigiwe muri Hoteli ya Michelangelo Towers y’i Johannesburg, afite imyaka 53. Yasize umugore n’abana batatu.

Leah avuga ko urupfu rw’umugabo we rwagize ingaruka ku muryango

 

Izindi wakunda

1 Igitekerezo

Omar 23/04/2019 1:34 am at 1:34 am

Iyaba twamenyaga agaciro k’ijambo ingaruka,umuntu wese ahura ningaruka zihwanye nibyo akora cg abamo,niyo mpamvu tutagakwiye gutangazwa n’imgaruka ahubwo tukirinda ingaruka.ikindi nuko Imana ntawe iba muruhande rwe kuruta undi,imbere yayo twese turangana,usanga abarwana Bose bitwaza Ko Imana iri muruhande rwabo,

Subiza

Tanga Igitekerezo

Bwiza.com
error: Alert: Ntabwo byemewe!!