bwiza.com
Ahabanza » Arabia Saudite: 36 baranyonzwe, undi arabambwa ku munsi umwe
Amakuru Ibigezweho mu mahanga Ubutabera

Arabia Saudite: 36 baranyonzwe, undi arabambwa ku munsi umwe

Ku wa kabiri, tariki ya 23 Mata, muri Arabia Saudite hanyonzwe abantu 37 harimo umwe wabambwe; bashinjwa ibyaha by’iterabwoba.

Muri aba bishwe harimo 11 bahamwe no gukorera ubutasi Irani, 14 bakoze imyigaragambyo yarwanyaga ubutegetsi hagati ya 2011 na 2012.

Aya ni amakuru dukesha umuryango mpuzamahanga uharanira uburenganzira bw’ikiremwamuntu, Amnesté International utemera na gato iki gihano.

Uyu Abdulkareem al-Hawaj wabambwe, yabanje kunyongwa nk’abandi, nyuma amanikwa ku musaraba ku ka rubanda. Yafunzwe afite imyaka 16 y’amavuko. Na we yashinjwaga kurwanya ubutegetsi bw’iki gihugu.

Ibiro ntaramakuru byo muri iki gihugu, Saudi Press Agency(SPA) cyagize ngo: “Igihano cyo kunyongwa gikatirwa abantu bafite ingengabitekerezo y’iterabwoba ku buryo bw’indengakamere, bakora imitwe y’iterabwoba ibangamira ubusugire bw’umutekano.”

Ibi biro kandi byongeyeho ko bamwe muri aba bishwe bahamwe n’ibyaha byo kwica abashinzwe umutekano; bifashishije ibisasu.

Minisiteri y’imbere mu gihugu yashyize hanze urutonde rw’aba 37 bishwe mu bice bitandukanye muri iki gihugu nka Mecca, Riyadh, Medina na Qassim.

Arabia Saudite kiri mu bihugu bya mbere bihanisha igihano cy’urupfu. Muri Mutarama, 2016 ni bwo cyanyonze abantu benshi(47) harimo n’umuyobozi w’umutwe wa Shia, Nimr al-Nimir.

Izindi wakunda

1 Igitekerezo

luc 25/04/2019 9:11 am at 9:11 am

fake country

Subiza

Tanga Igitekerezo

Bwiza.com
error: Alert: Ntabwo byemewe!!