bwiza.com
Amakuru Politiki

Burundi: Abaturage bavuga ko babangamiwe n’ikandamizwa bakorerwa n’Imbonerakure

Abaturage bo mu gace ka Kibago, mu Ntara ya Makamba, mu Burundi bashinja iterabwoba Imbonerakure zigizwe n’urubyiruko rw’ishyaka CNDD- FDD riri ku butegetsi, aho ziyenza ku muhisi n’umugenzi icyo zimusabye yakwanga kugikora zikamushinja ibyaha atakoze.

Ku wa 24 na 25 Mata 2019, izi mbonerakure ubwo zari ku musozi wa Jimbi na Kabago, ngo zakubise bikomeye umugabo witwa Sabiyumva, zishingiye ku bwoko bwe ngo zikaba zaramubwiye hamwe na bagenzi be basangiye ubwoko ko igihugu atari icyabo.

Izi Mbonerakure zari umunani, zinjiye mu kabari ahagana saa yine z’ijoro zishyira iterabwoba ku bari bakarimo basangira inzoga. Nk’uko bitangazwa na SOS Medias/ Burundi, ngo zasabye abo bantu kuzishyurira baranga, zitangira kubashyiraho iterabwoba ubwo.

Umwe mu bari aho yagize ati “Babanje kwisobanura mu kabari ‘Snack Bar’ barangije basaba abari bakarimo kubishyurira ibyo banyoye. Baranyoye barangije badusaba ku ngufu kubishyurira mbere y’uko tubasaba kwishyura 5000 FBU, ku rundi ruhande bagiye kudushinja gukora inama mu buryo bunyuranyije n’amategeko”.

Mu gihe ubuyobozi muri ako gace bubwirwa ikibazo Imbonerakure ziteza abaturage, ngo ntacyo bwagikoraho bitewe n’uko ziba zihabwa amabwiriza n’abakomeye kurusha ubuyobozi bwo hasi.

Abaturage bavuga kandi ko na polisi ntacyo yabakoraho, bitewe n’uko ngo ziba zarahawe imyitozo ikomeye nk’iya gisirikare, ikindi kandi zikaba zidakorwaho bitewe n’abayobozi bazo bigererayo.

 

Izindi wakunda

Bwiza.com