bwiza.com
Ahabanza » Burundi: Haravugwa impagarara ku kuntu umukinnyi Papy Fatty agomba gushyingurwa
Amakuru Imikino

Burundi: Haravugwa impagarara ku kuntu umukinnyi Papy Fatty agomba gushyingurwa

Nyuma y’aho Umukinnyi mpuzamahanga w’Umurundi wanakinnye mu Rwanda, Papy Faty, yitabye Imana kuwa 26 Mata 2019 nyuma yo kwitura hasi ari mu kibuga agahita apfa, biravugwa ko mu muhango wo kumushyingura havutse ubwumvikane bucye bamwe bashaka kumushyingura mu muco wa Kisilamu abandi batabikozwa.

Biravugwa ko bamwe, biganjemo abakinnyi b’Abasilamu bakinanye mu Ikipe y’Igihugu n’Abasilamu bo muri Bujumbura, bifuzaga ko ashyingurwa kisilamu, ariko abandi bagizwe n’umuryango we, barimo nyina Zuena Ngurakagayo ndetse na minisiteri ya siporo n’Ishyirahamwe ry’Umupira w’Amaguru mu Burundi (FFB) bashaka ko ashyingurwa nk’intwari y’igihugu agaherekezwa mu byubahiro byose akwiye.

Ntibyakwihanganirwa ko umurambo wa papy Fatty umara iminsi mu buruhukiro kandi binyuranyije n’umuco wa Kisilamu Papy Faty yabarizwagamo. Yagombaga gushyingurwa umunsi yapfiriyeho muri Eswatini cyangwa muri Afurika y’Epfo mu irimbi ry’Abasilamu. Ibyo u Burundi burimo burakora ni amahano kuri roho ye,” uyu ni Abdul, Sheikh wa Zone ya Buyenzi ndetse akaba yarakinanye na Papy.

Amakuru ava mu gace ka Kanyosha agera kuri SOSMedias dukesha iyi nkuru, avuga ko uwahoze ari kizigenza w’ikipe y’igihugu y’u Burundi, Saido Ntibazonkiza n’abandi basilamu, byageze aho benda kurwana n’abakirisitu bari mu rugo kwa nyina wa Papy bagiye kumwihanganisha.

Papy Fatty ntagomba gushyingurwa hakurikijwe imigenzo ya kisilamu. Yari yari yarahindukiriye ubukirisitu.” Uyu ni nyina wa nyakwigendera wongeyeho ko ndetse yanakoze urugendo rwa gikirisitu muri Nigeria aho ngo yabahamagaraga ababwira ukuntu yakiriye Yesu Kristu.

Ati: “Nta mpamvu yo kudutegeka uko dushyingura umuhungu wacu. Ni ikibazo cy’umuryango.”

Ku ruhande rwayo, minisiteri ifite siporo mu nshingano yavuze ko hari ibiri gukorwa ngo umurambo wa Papy Fatty uvanwe Eswatini (Swaziland) binyuze muri Ambasade y’u Burundi muri Afurika y’Epfo ngo ucyurwe mu gihugu cye.

Umwe mu bakozi b’iyi minisiteri akaba yagize ati: “Papy Fatty ni nk’umusirikare waguye ku rugamba rw’icyubahiro. Agomba guhabwa ibyubahiro by’intwari. Yagize uruhare rw’ingenzi mu kugera mu Gikombe cya Afurika kw’amateka kw’u Burundi. Abasilamu bagomba kwishyira mu mutwe ko u Burundi ari igihugu kitagendera ku matwara y’idini.”

 

 

Izindi wakunda

Bwiza.com
error: Alert: Ntabwo byemewe!!