bwiza.com
Ahabanza » AS Kigali ni ikipe nziza, ubu nta kosa na rimwe twemerewe gukora- Rusheshangoga wa APR FC
Amakuru Imikino

AS Kigali ni ikipe nziza, ubu nta kosa na rimwe twemerewe gukora- Rusheshangoga wa APR FC

Umukinnyi Rusheshangoga Michel wa APR FC atangaza ko biteguye neza ikipe ya AS Kigali, by’umwihariko ko nk’abakinnyi nta kosa na rimwe bemerewe gukora kugira ngo babashe kwegukana igikombe.

Ikipe ya APR FC yakinnye n’ikipe ya Kiyovu Vs ku wa Kabiri w’iki cyumweru, umukino urangira amakipe yombi aguye miswi. Ubu APR FC ikaba yitegura AS Kigali mu mukino w’umunsi wa 26 wa shampiyona y’icyiciro cya mbere Azam Rwanda Premier League.

Ikipe ya APR FC niyo iyoboye urutonde rwa Shampiyona n’amanota 58, igakurikirwa na Rayon Sports ifite 54, by’umwihariko APR ikaba ifite amakipe imbere igomba guhura nayo akomeye arimo AS Kigali, Police FC n’andi.

Rusheshangoga Michel avuga ko bagifite ikizere cyo kwegukana igikombe cy’uyu mwaka, yagize ati “Ntabwo turakurayo amaso, turacyafite ikizere rwose cyane ko tugifite imikino igera kuri itanu yose, ubwo icyo dusabwa nI ugutsinda imikino yose dusigaje naho ubundi turacyafite ikizere”.

Nk’uko byatangajwe ku rubuga rwa APR FC, Rusheshangoga akomeje avuga ko AS Kigali ari ikipe nziza, inafite abakinnyi bihagazeho, ko nta makosa bemerewe gukora ngo babe babura amanota atatu.

Ati “Ikipe ya AS Kigali ni ikipe nziza, inafite abakinnyi beza twese turaziranye bamwe twaranakinanye muri APR, ku ruhande rwacu twiteguye neza, abakinnyi bose bameze neza[…] Ndabizeza ko ubu nta kosa na rimwe twemerewe gukora.”

APR FC ifite amanota 58 mu mikino 25 imaze gukina, mu gihe AS kigali iri ku wa Gatandatu n’amanota 33 mu mikino 25 nayo imaze gukina. Ni umukino aya makipe yombi azacakiranamo ku wa Gatanu tariki ya 3 Gicurasi 2019, kuri sitade ya Kigali i Nyamirambo, saa Cyenda n’igice (15:30).

 

 

Izindi wakunda

Bwiza.com
error: Alert: Ntabwo byemewe!!