bwiza.com
Amakuru Politiki

Impunzi z’Abarundi 50 zakiriwe muri Tanzania

N’ubwo Leta y’u Burundi itangaza ko umutekano umeze neza mu gihugu ndetse inakangurira impunzi zahunze gutaha mu gihugu, Leta ya Tanzania yakiriye izahunze igihugu zivuga ko zarambiwe itotezwa n’iterabwoba zishyirwaho n’Imbonerakure.

Ni impunzi 50 zahungiye muri Tanzania zivuye mu Burundi, zakiriwe na Leta y’iki gihugu ifatanyije n’Agashami k’Umuryango w’Abibumbye kita ku Mpunzi (UNHCR), izi mpunzi zikaba zakiriwe mu nkambi y’impunzi ya Nduta.

Nk’uko bitangazwa na SOS Medias/ Burundi, ngo izi mpunzi zigizwe n’abantu 50, bakomoka mu miryango 11, biganjemo abagore n’abana, n’abagabo bakiri bato babarurwa mu rubyiruko.

Izi mpunzi ngo zitangaza ko ubugizi bwa nabi, guhohoterwa, gutabwa muri yombi bya hato na hano aribyo zahunze. Bakavuga ko bikorwa n’Imbonerakure zigizwe n’urubyiruko rw’Ishyaka CNDD-FDD riri ku butegetsi, ndetse n’urwego rw’igihugu rushinzwe iperereza, rwibasira cyane abatavuga rumwe na Leta.

Izi mpunzi ngo ziyongereye ku zindi zisaga 1000 ziri mu nkambi ya Nduta, zikiyongera kandi ku zindi ibihumbi ziri mu nkambi ya Mtendeli na Nyarugusu, zagiye zihunga u Burundi kuva mu mwaka wa 2015.

Izindi wakunda

Bwiza.com