bwiza.com
Ahabanza » Kwibuka 25 ꞉ Umuryango “Dukundane Family” ugiye kwibuka Abatutsi bajugunywe mu kiyaga cya Mirayi
Kwibuka

Kwibuka 25 ꞉ Umuryango “Dukundane Family” ugiye kwibuka Abatutsi bajugunywe mu kiyaga cya Mirayi

Tariki ya 4 Gicurasi 2019, Umuryango “Dukundane Family” wateguye gahunda yo kwibuka ku nshuro ya cumi na gatatu Abatutsi bishwe bajugunywe mu mazi mu Kiyaga cya Mirayi.

Iyi gahunda yo kwibuka izabera ku kiyaga cya Mirayi giherereye mu Mudugudu wa Gihanama , Akagali ka Biryogo, mu Murenge wa Gashora mu Karere ka Bugesera.

Mu gihe mu rwego rw’ igihugu twibuka ku nshuro ya 25, Tariki ya 4 Gicurasi 2019, Dukundane Family yateguye iki gikorwa mu rwego rwo kwibuka muri rusange abishwe bajugunywe mu mazi muri jenoside yakorewe Abatutsi mu Rwanda muri 1994.

Jean Claude Rugero

Mu kiganiro na Bwiza.com, Umuhuzabikorwa w’ iyi gahunda, yatanze impamvu nyamukuru yatumye ‟Dukundane Family‟ ihitamo kwibukira ku Kiyaga cya Mirayi.

Ati: Twahisemo Ikiyaga cya Mirayi ariko tunibuka abandi Batutsi bajugunywe mu mazi muri jenoside niyo mpamvu nka Dukundane Family dufata amazi  nk’ imwe mu ntwaro zakoreshejwe mu kwica Abatutsi muri jenoside kuko harimo abatawemo ari bazima abandi batabwamo bamaze gukorerwa iyicarubozo‟.

Akomeza agira ati ‟ Si ibyo gusa, aya amazi yiciwemo abatutsi benshi cyane twebwe tuyafata nk’ irimbi kuko abayatawemo ntibigeze bashyingurwa mu cyubahiro kugeza magingo aya”.

Yakomeje agira ati “Turahamagarira abantu kuza kwifatanya natwe ,cyane abafite ababo bajugunywe muri Mirayi, Abanyabugesera n’abajugunywe mu y’andi mazi muri rusange. ni ku wa Gatandatu tariki 4/5/2019. Guhaguruka ni Saint Famille, Saa kumi n’ebyiri n’igice z’igitondo (06:30).

Jean Claude Rugero ushinzwe gutegura iki gikorwa cyo kwibukira kuri Mirayi yanakomeje atangaza ko mu kwibuka Dukundane Family iba igamije gufasha abafite ababo bishwe bajugunywe mu mazi muri jenoside yakorewe Abatutsi muri 1994.

Umuryango Dukundane Family uzatangira gahunda yo kubaka agakuta kagashyirwaho amazina y’ Abatutsi bajugunywe kugira ngo bakomeza bazirikanywa mu mateka.

Uyu muryango hamwe n’ indi ihuza abarokotse Jenoside yakorewe Abatutsi muri rusange, bavuga ko kubura ababo ngo babashyingure mu cyubahiro, ndetse ntibabone byibuze amazina y’abajugunywe mu nzuzi, imigezi, ibidendezi, ibiyaga n’ahandi; ngo bikomeje gutuma intimba irushaho kubashengura imitima.

 

Gaston Rwaka/Bwiza.com

 

Izindi wakunda

Bwiza.com
error: Alert: Ntabwo byemewe!!