bwiza.com
Amakuru Utuntu n'utundi

Tanzania: Abapolisi babiri bari mu rukiko kuko umwe yananiwe gutera inda umugore wa mugenzi we

Mu gihugu cya Tanzania, umupolisi yahaye mugenzi we ikiraka cyo kumuterera inda umugore, kumbe nawe atabibasha. Ubu rurageretse mu nkiko ngo amusubize miliyoni ebyiri z’amashilingi, anamwishyure impozamarira ku mugore we yaryamanye amajoro 77.

Ngo “Gupfa utabyaye bitera agahinda”. Umupilisi wo mu muhanda Darius Makambako yarambiwe kumarana n’umugore imyaka itandatu nta mwana, ahitamo guha ikiraka mugenzi we Evans Mastano bakorana ngo azamuterere umugore inda.

Bimwe mu binyamakuru bya Tanzaniya, biravuga ko Mastano w’imyaka 52 nawe yemeye akazi ko gutera inda Mukamakambako Precious w’imyaka 45, kuko yari yiyizeye kubera afite abana babiri b’abakobwa; nyamara nabo ngo bavuka kuri mubyara we.

Ni nyuma y’aho abaganga babwiriye Afandi Makambako ko adashobora kubyarana n’umugore we Precious w’umuforomokazi. Uyu mugore nawe ntiyazuyaje kubyemera, kuko nawe yari akeneye umwana nyuma y’imyaka itandatu abana n’umugabo.

Abapolisi babiri bahise bagirana amasezerano yo gutera inda, Makambako yishyura amashilingi ya Tanzaniya miliyoni ebyiri, nyamugore nawe yemera kujya aryamana na Mastamo, aramwihata.

Uyu rero yaje kuburira umubyizi mu kwe, ngo kuko baryamanye amajoro 77 nta nda amuteye. Mu mwaka wa 2016, Mastamo yagombaga kurarana na Precious amajoro atatu mu cyumweru, mu gihe cy’amezi 10.

Abazi Precious usanzwe ari umuforomokazi mu ivuriro ryigenga I Daresalamu, bavuga ko kuva muri Werurwe kugeza Kamena 2016, uyu mugore w’uburanga yasabye ikiruhuko cy’ayo mezi atatu kugirango yihate Mastamo barebe ko imibonano yabo yavamo urubuto.

Baragerageje biba iby’ubusa, kuko ngo “hari n’ubwo nyirurugo yabasigaga mu buriri ku manywa akigendera, akabaha rugari ngo bagere ku ntego yabahaye”.

Amezi 10 arirenga, umugore nta kanunu ko gusama; umugabo agira amakenga. Bimwanze mu nda, niko kujya gupimisha uwo yahaye ikiraka, nubwo yari amwizeye kubera inkumi ebyiri abyiruye iwe.

Muri Mutarama 2017, nibwo baherekeranije bajya kureba umuganga, basanga uwafashe ikiraka cyo gutera inda nawe afite uzimuterera.

Ibisubizo by’abaganga byatunguye benshi biranababaza, usibye umugore wari usanzwe abizi ariko yarabimuhishe. Abana babiri b’abakobwa ni aba mubyara we Edward, kuko Mastamo atigeze atera inda.

Angela Mukamastamo atanga ubuhamya agira ati, “ uyu mugabo twari tumaranye imyaka ibiri yose, ntegereza gusama ndaheba. Mu ibanga ndeba mubyara we Edward nti enda hano. Niko kubyarana umukobwa wa mbere, nyuma turongera antera indi mbyara uwa kabiri”.

Ntibyoroheye umucamanza gukiza aba bagabo basanzwe ari n’incuti magara. Umwe arashaka guhagarika amasezerano akanasubizwa miliyoni ze, hatabariwemo impozamarira ku mugore we baryamanye iminsi n’amajoro birenga 77, hatitawe no ku ncuro bakoraga mu ijoro.

Mastamo nawe mu kwisobanura avuga atigeze yemera gutera inda, ngo ahubwo yemeye kuzakora iyo bwabaga akitanga uko ashoboye Precious agasama.

Nta gihamya ko na Edward atazarega asaba guhembwa ko yakoze akazi kakavamo abakobwa babiri, kimwe n’uko mubyara we Mastamo naguhuka ashobora kumwishyuza inkwano ku mugore we babyaranye kabiri atabizi.

 

 

 

Izindi wakunda

Bwiza.com
error: Alert: Ntabwo byemewe!!