bwiza.com
Ahabanza » Rusizi: Abarokotse bababazwa n’uko uwari umuvugizi wa ADEPR, Rév. Nsanzurwimo yabatereye interahamwe akaba yidegembya mu Bubiligi
Amakuru Kwibuka

Rusizi: Abarokotse bababazwa n’uko uwari umuvugizi wa ADEPR, Rév. Nsanzurwimo yabatereye interahamwe akaba yidegembya mu Bubiligi

Umuvugizi w'itorero ADEPR wungirije,Rév.pasiteri Karangwa John acanira abandi baobozi urumuri rw'icyizere.

Ubwo Jenoside yakorerwaga abatutsi mu 1994 yari irimbanije, umuvugizi w’itorero ADEPR Rév Pasiteri Nsanzurwimo Joséph n’umuryango we babaga muri GS Gihundwe, aho ngo bari barinzwe n’abajandarume banaganira bya hafi n’uwari perefe w’icyari perefegitura ya Cyangugu Emmanuel Bagambiki mu nama za nyirarureshwa uyu muperefe ngo yazaga gukoresha abatutsi bari bahahungiye ngo bajyanwe muri Sitade ya Cyangugu kwicirwayo, abasigaye mu kigo bakahicirwa mu maso y’uyu muvugizi ntagire icyo akora ngo abatabare cyangwa abatabarize.

Ni bimwe mu byavuzwe na bamwe mu barokokeye Jenoside yakorewe abatutsi muri iki kigo, bavuga ko igitangira bahahungiye ku bwinshi bahizeye amakiriro, cyane cyane ko cyayoborwaga n’umupasiteri Remesha Siméon, nyamara batungurwa n’uko ngo ari we wabashumurizaga abicanyi n’aho umuvugizi w’iri torero, Rév.Pasiteri Nsanzurwimo Joséph ahagereye, aho kugira icyo abamarira ahubwo abashumuriza interahamwe zirabarimbura.

Abayobozi batandukanye n’abakristo ba ADEPR Gihundwe na Kamembe bifatanya n’abarokokeye muri GS Gihundwe kwibuka abatutsi bayiciwemo.

Twagirumukiza Antoine wari umukozi w’icyari perefegitura ya Cyangugu, washakishwaga cyane ubwo Jenoside yatangiraga, avuga ko igitangira ikivunge cy’abatutsi cyinjiye muri iki kigo kihahungiye, uwari umuyobozi wacyo,Pasiteri Remesha Siméon ababuza kucyinjiramo, ariko uwari konseye wa segiteri cyabarizwagamo, Bavugamenshi Manasé ahabinjiza ku ngufu.

Avuga ko bahasonzeye kandi ikigo gifite ibiryo cyanagaburiraga abanyeshuri baturukaga mu bice byarimo imirwano batajyaga mu biruhuko, n’aho babibahereye babaha ibiboze, Aho uyu muvugizi, Rév.Pasiteri Nsanzurwimo Joséph n’umuryango we bahagereye aho kubarengera ahubwo we n’uwari perefe Emmanuel Bagambiki bategeka ko abo bose bajyanwa kuri Sitade ariho benshi baje kwicirwa, abari abakozi b’ishuri bari basabye kuhaguma ngo baharindirwe, ku wa 3 Gicurasi,abajandarume baraza babasukaho urusasu harokoka mbarwa.

Twagirumukiza Antoine avuga ko ashengurwa no kuba uwari umuvugizi wa ADEPR,Rév.pasiteri Nsanzurwimo Joséph wamwicishirije umugore yidegembya mu Bubiligi.

Twagirumukiza akomeza avuga ko umugore we wari ufite utwana duto wari wajyanywe muri Sitade yaje kugarurwa muri iki kigo arazwa mu icumbi ry’ uyu muvugizi, mu gitondo aramushushubikanya ngo namuvire mu nzu asange abandi mu kizu cy’inkwi aho bari bashyizwe, ari ho yanarasiwe kuri ayo manywa yo ku wa 3 Gicurasi asiga utwana 2 turimo ak’imyaka 3 kari kakomerekejwe n’ayo masasu n’ak’umwaka n’igice.

Avuga ko uretse ibyo n’uwari umushoferi w’ishuri John Nzisabira yishwe n’abahungu ba pasiteri Nsanzurwimo Joseph, ariko aba bose baridegembya i Burayi nta n’umwe ubibazwa cyangwa ngo abasabe imbabazi.

Ati’’ uyu munsi Remesha ni umupasiteri I Burayi, arigisha. Pasiteri Nsanzurwimo ayoboye itorero mu Bubiligi, maze igihe ntegereje ko ambwira impamvu yanyirukaniye umugore akicwa areba n’ubu sindamubona ngo agire icyo ambwira. Wenda ambwire ko byamugoye kumuhisha mbyemere cyangwa se ko yabonye akwiye gupfa akamutanga, ndacyategereje.’’

Yarakomeje ati’’ dukeneye ubutabera, n’ubu siniyumvisha aho Nsanzurwimo yakuraga imbaraga zo kurindwa n’abajandarume, nta n’urambirwa ko igihe bagenzi babo barasaga abantu bacu hari icyo yababwiye gukora ngo babatabare.

Umuvugizi wungirije wa ADEPR,Rév.pasiteri Karangwa John avuga ko bibabaje kubona abakirisitu bicirwa imbere y’abayobozi babo ntibagire na gito bakora ngo babarengere.

Umuvugizi wungirije w’iri torero ku rwego rw’igihugu, Rév. pasiteri Karangwa John, avuga ko nta bubasha itorero rifite bwo kubagarura ngo babiryozwe, ariko ko bazi ko Leta ibizi, amaherezo ubutabera buzakora akazi kabwo bakabibazwa.

Avuga ko itorero ryihutiye gusubiza icyizere cy’ubuzima abaharokokeye riboroza, abandi bubakirwa, rikazanabikomeza kuko ryumva ari inshingano yaryo.

Abayobozi banyuranye bifatanya n’abarokokeye muri GS Gihundwe kwibuka ababo bishwe urw’agashinyaguro.

Umuyobozi w’aka karere wungirije ushinzwe imibereho myiza y’abaturage,Nsigaye Emmanuel,yashimiye iri torero kuba rifata umwanya wo kwibuka aba bishwe ubuyobozi bukuru bw’itorero bubihagarikiye, ashima icyakora bamwe mu bapasiteri bavuzwe ko bagize icyo bakora hakagira abarokoka,asaba ko itorero ry’uyu munsi ryakwigisha urukundo kuko ari cyo cyabuze,ubwo imbaga ingana kuriya yicwaga itagira gitabara.

Nk’uko bivugwa n’umuyobozi w’iri torero muri aka karere,Rév.pasiteri Kanyabashi Thomas,ngo hamaze kubarurwa abapasiteri n’abakristo muri aka karere 236 bishwe muri Jenoside yakorewe abatutsi,barimo 70 baguye mu nsengero,iri shuri rigwamo 35,ubushakashatsi bukaba bukomeje, batanu mu barokotse rikaba ryaboroje inka uyu munsi.

Mu rwego rwo gufata mu mugongo abarkokeye muri GS Ghundwe, batanu muri bo itorero ADEPR ryaboroje inka.
Umuvugizi wungirije wa ADEPR,Rév.pasiteri Karangwa John yunamira inzirakarengane z’abatutsi ziciwe muri GS Gihundwe.

Izindi wakunda

Bwiza.com