bwiza.com
Ahabanza » Amakimbirane muri UDEPR : Uwari Umuvugizi waryo yarirukanywe
Amakuru Iyobokamana

Amakimbirane muri UDEPR : Uwari Umuvugizi waryo yarirukanywe

Rev. Kavamahanga Alphonse wavugwaga mu gushinga itorero UDEPR, biravugwa ko yirukanwemo agahitamo gushaka kugurisha ibyuma bigabyutsa amakimbirane yari asanzwe yarakuruwe nuko yabeshye ko yavuye muri ADEPR ari Pasiteri ndetse afite n’umugore, byavumburwa ko yabeshye agahita yerekwa umuryango.

Kavamahanga Alphonse wabanje gushinga umuryango witwa Filadelphia International Ministries (FIM) utari wemewe gukorera mu itorero ADEPR, bimuviramo gutengwa (guhagarikwa) muri iri torero kuko yagaragaye nkuwigometse nk’uko byagiye bivugwa n’abayobozi bo muri ADEPR barimo Pasiteri Nsabimana Anicet wayoboraga umudugudu wa ADEPR Tyazo, Paruwasi ya Tyazo mu karere ka Nyamasheke, ari naho yasengeraga

Ikibazo cyatangiye kumvikana mu itangazamakuru ubwo ubuyobozi bw’itorero rya ADEPR bwahagarikaga Kavamahanga buvuga ko atigeze ashaka kumvira inama ubuyobozi bwamuhaye ahubwo agahitamo gukomeza kuyobora Minisiteri kandi bitemewe n’itorero.

Pastor Nsabimana wayoboraga aho Kavamahanga yasengeraga yagize ati: “Gushinga bene ibyo ngibyo kandi akiri mu itorero, ni nko gushinga itorero mu rindi. bifatwa nko kwigumura, twamuhaye inama ntiyazubahiriza niyo mpamvu twabaye tumushyize hanze y’itorero ngo abanze yikosore.

Ku buyobozi bwa Sibomana Jean na Thom Rwagasana, Tariki ya 23 Kanama 2015 nibwo uyu Kavamahanga Alphonse yatenzwe ahagarikwa muri ADEPR Tyazo ndetse no muri muri Paruwase ya ADEPR Rugando i Kigali nk’umukiristo wahakiriwe.

Uyu Pasiteri Anacet yavuze ko, ibyo Kavamahanga yakoraga bitari minisiteri ahubwo ko byari itorero ashaka gushinga kuko yari yaranatangiye kubatiza, “ ntabwo ari minisiteri igamije gufasha abantu kandi nta dini rigomba gukorera mu irindi. Ibyo ntabwo bibaho nta dini ryabangikana na ADEPR”.

Kavamahanga wahamyaga ko yahamagawe n’Imana ndetse ikamubwira ko icyo azariraho igicometse mu kanwa ke kandi ko nta muntu n’umwe uzagikoraho, ahubwo ko agiye gushyira imbaraga nyinshi mu ivugabutumwa yahamagariwe ati “Njyewe ndi umuvugabutumwa kandi ivugabutumwa Imana yampaye ni iryo ku rwego mpuzamahanga, umuntu wamfungira ivugabutumwa keretse afashe ingufuri akayishyira ku munwa wanjye kuko njyewe mpagaze kucyo Imana yampaye. Hari amavuta utahagarika, kuntenga nta kibazo bitwaye ndumva ndi mu mavuta, mfite ibyiringiro ko Imana iri kumwe na njye “.

Nyuma yo Gutengwa n’itorero rya ADEPR nibwo itorero UDEPR (Union des Eglises de Pentecôte au Rwanda) rifite icyicaro mu Intara y’iburengerazuba mu Akarere ka Ngororero, byavuzwe ko ari iryo yashinze ndetse nawe akabyemeza , icyo gihe rimugira umuvugizi waryo nkuko twabitangarijwe na Rev. Nzanana Fidèle Umuvugizi waryo kuri ubu.

Umuvugizi wa UDEPR

Rev. Nzanana Fidele yatangarije bwiza.com ko UDEPR yahagaritse Kavamahanga Alphonse k’ubuvugizi no kubukristo muri UDEPR tariki ya 16/06/2017 kubera ko atari inyangamugayo kuko yababeshye ko ari Pasiteri usengeye, afite umugore ariko uko iminsi yagiye itambuka baje gusanga nta mugore agira ndetse ataranasengewe. bityo inama ihita iterana bamukuraho icyizere bamuvana no kubuyobozi. Nyuma yo guhagarikwa tariki ya tariki 03/08/2017 nibwo Rev. Pastor Kavamahanga Alphonse yakoze ubukwe .

Ibaruwa yirukana Kavamahanga

Iri hagarikwa ritunguranye Kavamahanga Alphonse ntiyaryishimiye kuko nibwo yaje gukomereza muri Birembo ya Bumbogo Gasabo ahari Paruwase ya UDEPR. Haje kuba amakimbirane n’imirwano ishingiye kukutumvikana kw’abayobozi biri torero. Kavamahanga we yatangaje ko amakimbirane yahereye mu Ngororero aza gushinga Itorero muri Bumbogo kuko mu Ngororero bamuteye icyo yise coup d’église bivuze guhirikwa kubuyobozi bw’Itorero.”

Kavamahanga Alphonse akomeza avuga ko statut igaragaza ko ariwe Visionnaire wiri torero rya UDEPR akaba umwepisikopi n’Umuvugizi waryo, uyu mukozi w’Imana kandi yemeza ko abari inyuma yibi bitero ari uwitwa Nzanana Fidèle ngo kuko atari ubwambere bari babateye.

Nzanana Fidèle we yabwiye bwiza.com ko Kavamahanga ariwe nyirabayazana w’ibibazo byugarije iri torero ngo kuko bamuciye kubera imyitwarire idahwitse. Ati “ Kavamahanga niwe nyirabayazana w’ibibazo byose biri kubera muri iri torero kuko twaramuhagaritse, kubera imyitwarire ye igayitse ntitwigeze twumva ko wenda yajuririra icyo cyemezo, bivuze ko na nubu agihagaritse, muri iyi minsi nibwo twamenye amakuru ko agiye gukorera mu Ubugande kandi ko ashaka kugurisha ibikoresho by’itorero ntabwo rero twari kwemera ko atugurishiriza ibikoresho. We yaraje ategeka abari mu gatsiko ke gufata abari baje, bababohesha imigozi ya supanete.

Nzanana Fidele avuga ko ubwo yahageraga yasabye ko babarekura kuko ngo uri kubarega ariwe Kavamahanga ari nawe ukomeza gukurura umwuka mubi kandi atarigeze aregera akanama nkemurampaka ngo agaragaze ko yahohoteye kugukurwa k’ubuvugizi. bityo ntabubasha afite kandi ko ibyuma ari iby’itorero UDEPR Paruwase ya Birembo

Urusengero rwa UDEPR Birembo , rukunze kuberamo amakimbirane

Kugeza ubu iby’iri torero UDEPR ntabwo birasobanuka kuko Kavamahanga Alphonse yemeza ko ariwe Visiyoneri , mu gihe kandi na Rev. Fidèle Nzanana nawe akagaragaza ko ariwe viziyoneri, ibi bikomeje gukurura ihangana rikorerwamo, aho Kavamahanga n’abamushyigikiye bavuga ko batewe n’abanyangororero. Hakaba hasabwa ubushishozi bwimbitse bw’Umurenge wa Bumbogo dore ko mu birembo ariho rikunda guhanganira bagakizwa na Polisi.

Iyi nkuru tukaba tuzayigarukaho ubutaha…

Clément Bagemahe.

Izindi wakunda

Bwiza.com