bwiza.com
Ahabanza » Ibihugu byo mu karere bikomeje kongera ingengo y’imari igenda ku gisirikare
Amakuru Politiki

Ibihugu byo mu karere bikomeje kongera ingengo y’imari igenda ku gisirikare

Ibihugu byo mu bihugu bigize Umuryango wa Afurika y’Iburasirazuba bikomeje kuzamura ingengo y’imari igenda ku gisirikare, aho bivugwa ko ingengo y’imari yabyo yageze kuri miliyari 2,9 z’amadolari ivuye kuri miliyoni 200$ mu rwego rwo gushyira ku rwego rugezweho ibikoresho.

Nk’uko imibare yashyizwe ahagaragara n’Ikigo mpuzamahanga cya Stockholm cy’Ubushakashatsi ku Mahoro (Sipri) ibigaragaza, ngo igihugu cya Kenya nicyo kiyoboye n’ingengo y’imari y’igisirikare yongereweho miliyoni 80$.

Iki gihugu kuri ubu gishora mu gisirikare miliyari 1,09 z’amadolari, kihariyeya 36,5% by’ingengo y’imari yose igenda ku gisirikare mu karere ibarirwa muri miliyari 2,98$.

Biravugwa ko ibihugu bya Kenya na Uganda byakomeje guteza imbere ibikoresho byabyo, byaba binyuze mu kugura cyangwa mu mpano, hitwajwe ko ibi bihugu bihanganye n’umutwe w’iterabwoba wa Al Shabab muri Somalia.

Umwaka ushize, Igisirikare cya Kenya cyakiriye imodoka 12 za gisirikare zitwara ingabo zo mu bwoko bwa Bastion armoured personnel carriers  zivuye muri Leta Zunze Ubumwe za Amerika.

Guverinoma ya Kenya kandi  yakiriye mu Ugushyingo imodoka za gisirikare z’imitamenwa 12 zo mu bwoko bwa MD5 diesel engines  zivuye mu Bufaransa mu rwego rwo kurinda imipaka yayo no gufasha ingabo ziri mu butumwa bwa AMISOM.

Ingengo y’imari igenda ku gisirikare cya Uganda nayo yazamutseho miliyoni 62$, igera kuri miliyoni 408,4$ avuye kuri miliyoni 346,8$.Sipri ariko iravuga ko kongera ingengo y’imari igenda ku gisirikare muri Uganda ntaho bihuriye no kuba kiri muri AMISOM.

Iki kigo kivuga ko amafaranga Uganda yateganyirije AMISOM mu mwaka wa 2018/19 ari miliyoni 10$ gusa kandi nayo ari inkunga iva muri Afurika Yunze Ubumwe atava mu ngengo y’imari ya Uganda. Aya mafaranga ngo ugereranyije n’ayo mu 2017 nta cyahindutse.

Ngo kwiyongera kw’iyi ngengo y’imari ijya ku gisirikare muri Uganda ngo kwaba ahubwo gufitanye isano n’ibikoresho yaguze mu mwaka ushize, nk’uko byemezwa na Dr Nan Tian, umushakashatsi ku ntwaro na gahunda z’ibigenda ku gisirikare muri Sipri.

Igihugu cya Tanzania cyo ngo nta ngufu cyashyize mu gisirikare mu myaka itanu ishize, ariko ngo cyongereye miliyoni 64.3% ku ngengo y’imari ijya ku gisirikare kigura indege za kajugujugu z’intambara ndetse cyongera ubufatanye mu bya gisirikare n’u Bushinwa.

Igihugu cya Tanzania muri rusange ngo ingengo y’imari ijya ku gisirikare ikaba yarageze kuri miliyoni 675,5$ mu mwaka ushize, ivuye kuri miliyoni 611,2$ mu mwaka wabanje.

Ubu bufatanye bushya mu bya gisirikare hagati ya Tanzania n’u Bushinwa ngo bukaba busobanuye impamvu imwe y’uku kwiyongera kw’ingengo y’imari mu gihe ishaka kongera ubushobozi bwayo mu ntwaro n’imyitozo. Uku kwiyongera kandi ngo igice kimwe ni inkunga y’u Bushinwa ariko na guverinoma yashyizemo amafaranga nk’uko iyi nkuru dukesha The East African ikomeza ivuga.

Tanzania kandi ngo mu mwaka ushize yagiye igura mu Bufaransa kajugujugu zo mu bwoko bwa EC725 Super Cougar na AS-532 Cougar. Ibi nabyo ngo bikaba bishobora gusobanura impamvu y’izamuka ry’ingengo y’imari igenewe igisirikare.

Mu mwaka ushize, Tanzania ngo yanakiriye Kajugujugu 3 zo mu bwoko bwa Airbus AS-350 mu 10 zatumije mu 2017 zirimo 8 zo mu bwoko bwa AS-350/AS-550 n’izindi ebyiri zo mu bwoko bwa AS-532 Cougar na AS-332 zitwara abasirikare cyangwa ibikoresho zakorewe muri Romania.

U Rwanda narwo ngo ntirwasigaye inyuma kuko ingengo y’imari ijya ku gisirikare yavuye kuri miliyoni 115,7$ ikagera kuri miliyoni 119$, mu gihe Sudani y’Epfo yagabanyije akagera kuri miliyoni 59,4$ mu 2018, avuye kuri miliyoni 72,4 mu mwaka wabanje, ndetse avuye kuri miliyari yakoreshejwe mu 2015.

Mu mwaka ushize, u Rwanda ngo rukaba rwarakiriye Ibisasu 50 bya missiles bishwanyaguza ibifaru byo mu bwoko bwa Red Arrow-9, byatumijwe mu Bushinwa mu 2016. Izi byazanye kandi n’imbunda zo mu bwoko bwa CS/SH-1 122mm self-propelled, zatumijwe mu 2017 zigera mu Rwanda mu mwaka ushize.

Izi missiles zo mu bwoko bwa Red Arrow-9 zagaragajwe bwa mbere mu mwaka ushize mu myitozo yiswe Hard Punch III iherutse kubera mu Kigo cya Gisirikare cya Gabiro ihagarikiwe na Perezida Paul Kagame.

 

Izindi wakunda

1 Igitekerezo

Rwanda 07/05/2019 2:06 am at 2:06 am

Ibyo bruise nibizarimbura Mwene muntu ntakiza mbibonamo.

Subiza

Tanga Igitekerezo

Bwiza.com