bwiza.com
Amakuru mashya

 Abacuruzi b’Abanyayuganda bahinduye umuvuno ku gucuruza mu Rwanda

Abacuruzi bo muri Uganda bagenda buhoro buhoro bagana andi masoko y’iibicuruzwa byabo nyuma yo kubona ko amezi abaye atatu nta muti uravugutirwa ikibazo cy’ubucuruzi bwambukiranya imipaka y’ibihugu byombi.

Ikinyamakuru The Indeependent kivuga ko imipaka ya Katuna, Kagitumba na Cyakina ifunze kuva mu mpera za Gashyantare 2019.

U Rwanda rwavuze ko rutafunze imipaka ko ahubwo nko ku mupaka wa Gatuna hari gukorwa imirimo y’ubwubatsi bityo akamamyo manini yakoresha indi mipaka ihuza ibihugu byombi. Ruherutse gutangaza ko imirimo y’ubwubatsi yakorwaga kuri uyu  mupaka igeze kure ku buryo watangira gukoreshwa vuba.

Uganda ibi ntiyabikojejwe, yavuze ko bitumvikana, inenga u Rwanda kuba rutarigeze rubitangaza mbere.

Aba bacuruzi rero bagannye amasoko y’ahandi nyuma y’aho mu mpera z’ukwezi gushize Minisitiri w’Ubucuruzi, Inganda n’Amakoperative, Amelia Kyambadde yagiriye inama abacuruzi boherezaga ibicuruzwa byabo mu Rwanda kureba ahandi bakwerekeza muri aka karere. The independent ivuga ko bigaragara neza ko aba bacuruzi iri baritaye mu gutwi.

Iperereza ryigenga ryakozwe n’iki kinyamakuru ryagaragaje ko Kompanyi zo muri Uganda nka Hima Cement izwiho kuzana sima mu Rwanda, Mukwano izwiho kuzana amasabune, amakayi n’ibindi mu Rwanda, kompanyi zitunganya ibikoresho by’ubwubatsi zayobotse amasoko yo  mu gihugu mu imbere, muri Repubulika Iharanira Denokarasi ya Congo, Sudani y’Amajyepfo, Kenya na Tanzania.

Umwe mu bo muri izi kompanyi zavuzwe haruguru yabwiye Indeopendent ati “ Ubu turi gushyira imbaraga mu kongera ibicuruzwa byacu mu gihugu no hanze nka Repubulika Iharanira Denokarasi ya Congo, Sudani y’Amajyepfo, Kenya na Tanzania.”

Ibi kandi byemezwa na Gideon Badagawa,  Umunyamabanga Nshingwabikorwa w’Urugaga rw’Abikorera ku giti cyabo muri Uganda wavuze ko ubu bari kwisunga amasoko yo mu bihugu by’ibituranyi mu gihe bagitegereje icyemezo kizafatwa n’u Rwanda.

Ati “ Turacyafite imipaka ifunguye mu majyaruguru, mu burengerazuba no mu burasirazuba.”

Badagawa, ku rundi ruhande avuga ko n’ubwo abacuruzi bafite andi masoko, bari bafitanye amasezerano yo kujyana ibicuruzwa byabo mu Rwanda kandi ko kuba imipaka itari nyabagendwa ari inkomyi kuri iyi ngingo.

Issa Ssekito,  Umuvugizi w’Ishyirahamwe ry’Abacuruzi bo mu Mujyi wa Kampala avuga ko igihombo gikomeje gukubita ahabi abacuruzi.

Uganda n’u Rwanda ntibibanye neza kuva mu myaka ibiri ishize. U Rwanda rushinja iki gihugu guhohotera Abanyarwanda, kubangamira ubukungu bwarwo no gufasha abarurwanya. Ibi Uganda ibitera utwatsi, ikavuga ko u Rwanda rwayicenegejemo intasi zarwo, narwo rukabihakana.

Kuri ubu Abanyarwanda bagiriwe inama yo kutajya muri Uganda bitewe n’uko ngo umutekano wabo utizewe.

 

 

 

Izindi wakunda

Bwiza.com