bwiza.com
Ahabanza » Nyamasheke/ Karambi: Abahinzi b’icyayi barataka igihombo baterwa n’umuhanda mubi
Amakuru Ubukungu

Nyamasheke/ Karambi: Abahinzi b’icyayi barataka igihombo baterwa n’umuhanda mubi

?

Abahinzi b’icyayi bo mu tugari twa Kagarama, Gitwe,na Gasovu ,mu murenge wa Karambi mu karere ka Nyamasheke bavuga ko kuba umuhanda Gikangaga-Wimvumu-Nyarutoyi  w’ibilometero bisaga 12 wagombaga kubafasha kugeza umusaruro w’icyayi aho gipimurirwa ngo kibashe kugezwa ku ruganda rw’icyayi rwa Gatare  udakoze neza, bituma hari abakora ibilometero byinshi bacyikoreye ku mutwe kikabahiraho bakakimena bagahomba.

Mu kiganiro na Bwiza.com,bamwe muri aba bahinzi barenga 900 bagihinga muri zone yitwa Cyiya iri ku ruhande inyuma y’umusozi wa Muzimu bivugwa ko ari wo muremure cyane mu turere twa Rusizi na Nyamasheke bavuga ko hari igice cy’uyu muhanda cyari cyakozwe na NAEB ariko iwuta itawurangije habura abawurangiza kandi imbaraga zabo zitawushobora, bigatuma kuvana icyayi cyasoromwe mu mirima  kukigeza ku muhanda munini aho bagipimishiriza ngo kigezwe mu ruganda bigorana bagasa n’abakorera mu gihombo.

Bemeza ko uyu muhanda wabateye ubukene bugaragara kuko kugira ngo  nk’umusoromyi azabone nibura ibilo 40 ku munsi bisaba kuzinduka  saa kumi n’imwe z’igitondo  akaba yageze  mu murima w’icyayi,guhera saa sita z’amanywa agahagarara gusoroma agatangira kucyikorera,agafata  urugendo rw’amasaha 2  acyikoreye, akagera aho agipimishiriza nibura saa munani z’amaywa  kuko imodoka zigitwara ngo zitarenga ku muhanda munini uhari.

Bavuga ko n’ibi bilo 40  kubera kubyikorera amasaha menshi babigeza aho bipimurirwa hafi ½ cyabyo cyamaze gupfa kikamenwa,bikabahombya ariko bitaretse abahinzi,koperative,uruganda,akarere n’igihugu muri rusange,kuko umuhanda ari muzima byatuma basoroma amasaha menshi n’icyo kimenwa ntigipfe ubusa n’igisigara mu mirima kubera gusoroma bihuta kigashiramo,bagasanga amafaranga watwara mu kuwukora ugatanga n’undi musaruro udahwanye n’igihombo bakomeza kugira ubu.

Minani Vianney umwe mu bahinzi bacyo  avuga ko bituma  babura n’abasoboromyi,bakahababarira. Ati’’ ntekereza ko akarere kagombye kuba kabona iki gihombo kuko kigaragarira buri wese n’umwana muto. Nyakubahwa perezida Kagame yaduhaye uruganda turushaka ngo rudukure mu bukene,aho hakorwaga ibilometero byinshi cyane icyayi kijyanwa mu Gisovu muri Karongi  kimwe kigahira mu nzira kikamenwa, ariko n’ubu twe turacyakimena kubera umuhanda n’akarere ubwako kakwikorera. Kuki dukomeza guhomba gutya kandi umukuru w’igihugu yari yadutabaye?’’

Yongeyeho ati’’ mu mpera za Werurwe,ku bufatanye n’akarere twakoze umuganda ngo turebe ko hari icyo byatanga ariko n’ubundi ntibyakemuye ikibazo,tugasaba ubuyobozi bwacu kudufasha kugikemura tukabona umuhanda mwiza utuma tudakorera mu gihombo kandi birashoboka.’’

Umucungamutungo wa COTHEGA,Ntawangundi Fabien  avuga ko uyu muhanda koko uteza igihombo gikomeye abahinzi,abasoromyi b’icyayi n’igihugu muri rusange ku bwiza n’ubwinshi bw’icyayi bwagombye kuboneka, akaba atari uyu wonyine kuko nk’abanyamuryango bagera ku 3094 bahinga icyayi muri uyu murenge n’uwa cyato kuri hegitari 10723 bafite ibibazo by’imihanda yo hagati mu cyayi idatunganye ikomeza kubatera igihombo gikomeye ariko yizera ko bizakemuka vuba kuko bizwi.

Ati “Nyakubahwa perezida wacu Paul Kagame yadutuye umutwaro uremereye wo kujyana icyayi mu Gisovu baduha uruganda hafi rugitunganya ariko dusigarana ikibazo cy’imihanda yo mu byayi irimo n’uriya bakubwiye kandi kudatungana kwayo biraduteza ibihombo bikomeye cyane rwose. Nk’uriya wabonye turashyiramo umuganda n’abaturage ngo turebe ko hari icyakorwa,ariko nk’ibiraro,kuwushyiramo imonyi ngo utungane n’ibindi ntitwabyishoboza,ariko ubwo akarere katangiye kudufasha kuwukora ngo nibura igihe cy’izuba abaturage babe babona aho banyuza umusaruro twakwizera ko uzanatunganywa neza bidatinze.’’

Umunyamabanga nshingwabikorwa w’umurenge wa Karambi,Uwizeyimana Emmanuel, avuga ko uri mu mihanda yihutirwa akarere kazatunganya vuba nyuma y’uwa Tyazo –Cyato na wo ubabaje cyane, agasaba abahinzi kuba bihanganye kuko babaye bashyizemo VUP n’umuganda w’abaturage ngo barebe ko waba ugendwa mbere yo gukorwa kuko igihombo uteza  na bo bacyizi.

Bavuga ko uyu muhanda nutungana bazunguka amafaranga menshi

 

 

Izindi wakunda

Bwiza.com