bwiza.com
Amakuru Politiki

RDC: Moise Katumbi yiteguye gutaha akazenguruka igihugu ashimira abaturage

Umunyapolitiki, Moise Katumbi, utavuga rumwe n’ubutegetsi muri Republika iharanira Demokarasi ya Congo kuri uyu wa Mbere yatangaje ko yitegura gutaha mu gihugu cye ku itariki 20 Gicurasi nyuma y’imyaka itatu ataba mu gihugu.

Moise Katumbi wigeze kuba Guverineri w’Intara ya Katanga uvuga ko agiye gutangiza urugamba rwo kurwanya abashaka guhindura itegeko nshinga, yabwiye itangazamakuru ko azataha azanywe no kubana n’abaturage be no kubakiza imibabaro batewe n’ubutegetsi.

Ni ku nshuro ya mbere Moise Katumbi yari agize icyo atangaza kuva haba amatora y’umukuru w’igihugu muri Congo kuwa 30 Ukuboza atabashije kwitabira yarabishakaga ariko ubutegetsi bwa Joseph Kabila bukamwitambika.

Katumbi yavuye muri Repubulika iharanira Demokarasi ya Congo kuwa 20 Gicurasi 2016 avuga ko agiye kwivuza hanze, Urukiko rwa Lubumbashi rumukatira igifungo cy’imyaka itatu adahari.

Mu kiganiro kihariye yahaye RFI na France 24, uyu munyapolitiki yatangaje ko ntacyo yavuganye n’uruhande rwa Perezida Felix Tshisekedi ariko yemeza ko ubutabera buriho ubu bwigenga. Ngo ikibazo bari bafite mbere n’ukwivanga kwa politiki mu butabera.

Yagize ati: “Bakoze ibishoboka ngo bambuze gutaha mu gihugu kandi simbe umukandida. Banabikoze kuri Jean-Pierre Bemba“.

Yashimangiye rero ko ku itariki 20 Gicurasi azaba ari I Lubumbashi kandi azazenguruka Congo ashimira abaturage bamushyigikiye mu bihe bibi avuga ko yatewe na Kabila.

 

Izindi wakunda

Bwiza.com