bwiza.com
Amakuru Politiki

U Rwanda rwatangiye kuyobora Akanama k’Amahoro n’Umutekano ka Afurika Yunze Ubumwe

U Rwanda rwatangiye imirimo yo kuyobora Akanama ka Afurika Yunze Ubumwe k’Amahoro n’Umutekano muri uku kwezi kwa Gicurasi nk’uko ibihugu bisimburana buri kwezi.

Nk’uko itangazo ryaturutse muri Ambasade y’u Rwanda muri Ethiopia, I Addis Abeba, ku cyicaro cya Afurika Yunze Ubumwe rivuga, Ambasaderi Hope Tumukunde Gasatura, Intumwa ihoraho y’u Rwanda muri Afurika Yunze Ubumwe, niwe utahiwe kuyobora aka Kanama k’Amahoro n’Umutekano ka Afurika Yunze Ubumwe mu gihe cy’ukwezi.

Akanama k’Amahoro n’Umutekano ni kamwe mu bigize Afurika Yunze Ubumwe kagamije gukumira, guhangana no gushakira ibisubizo amakimbirane, kandi gafite ububasha bwo gutegeka gutabara hagamijwe kuzana amahoro n’umutekano mu gihugu icyo ari cyo cyose kibarizwa mu muryango wa Afurika yunze Ubumwe.

Aka kanama kashinzwe mu 2003, kanashinzwe gukurikirana ishyirwa mu bikorwa ry’imyanzuro ya Afurika Yunze Ubumwe.

Ku buyobozi bw’u Rwanda, aka kanama kazakira raporo ya komisiyo ya Afurika Yunze Ubumwe ku nzira y’amahoro muri Centrafrica, ndetse kanagaragaze ingamba zafatwa mu gutuma amasezerano y’amahoro yashyizweho umukono mu mezi abiri ashize, i Khartoum, yubahirizwa.

Aka kanama kandi ku buyobozi bw’u Rwanda kitezweho kuvugurura manda ya AMISOM izaba igeze ku musozo mu mpera za Gicurasi. Aka kanama kandi muri uku kwezi gategerejweho gutegura ibiganiro bindi bibazo bidasanzwe bibangamiye amahoro n’umutekano muri Afurika. Ibi birimo nk’icyorezo cya Ebola n’ibyaha bikorerwa kuri internet.

Hateganyijwe kandi itangizwa ry’inama nyunguranabitekerezo hagati y’Akanama k’Amahoro n’Umutekano ndetse n’imiryango y’ubukungu ihuza ibihugu biri mu turere tumwe, aho hazaganirwa ku buryo bwiza bw’imikoranire no kugabana inshingano.

Kugeza ubu Akanama k’Amahoro n’Umutekano ka Afurika Yunze Ubumwe kagizwe n’ibihugu 15 ari byo: Angola, Algeria, Burundi, Djibouti, Equatorial Guinea, Gabon, Kenya, Liberia, Lesotho, Morocco, Rwanda, Nigeria, Sierra Leone, Togo, na Zimbabwe.

 

Izindi wakunda

Bwiza.com
error: Alert: Ntabwo byemewe!!