bwiza.com
Ahabanza » Barcelona yakinnye nk’abana bari munsi y’imyaka 14- Jose Mourinho
Imikino

Barcelona yakinnye nk’abana bari munsi y’imyaka 14- Jose Mourinho

Uwahoze ari Umutoza wa Manchester United, Jose Mourinho avuga ko atabona uko asobanura uburyo ikipe ya Barcelona yatsinzwemo na Loverpool ibitego bine ku busa, bityo igasezererwa muri UEFA Champions League.

Ku mugoroba wo kuri uyu wa 7 Gicurasi Liverpool yigaranzuye FC Barcelona iyitsinda ibitego bine ku busa. Mu mukino ubanza, Barcelona yari yatsinze ibitego bitatu ku busa gusa ntibyayihiriye ngo yihagarareho.

Jose Mourinho wakurikiranye iby’uyu mukino, yatangarije ikinyamakuru beINSPORT ko Barcelona yakinnye ibya cyana muri uyu mukino.

Ati “  Kiriya gitego ukibonye nko mu mukino w’abana bari munsi y’imyaka 14 na 15 wavuga ko abana bari basinziriye, ntabwo biteguye mu mutwe kuba bakina umupira cyangwa se ko bakeneye kwiga byinshi ku mikinire.”

Uyu mugabo watoje mukeba wa Barcelona, Real Madrid yakomeje agira ati “  Turimo kuvuga ku bakinnyi beza ku isi, mu kiruhuko cy’igice cya mbere navuze ko Liverpool nibona igitego cya kabiri biraza guhindura isura. Ariko nanone Barcelona bafite bamwe mu bakinnyi beza ku Isi. Buriya ruriya ni rwo rwego rwo gukinaho bashoboye.”

Yongeyeho ati “ Ni ibintu bigoye kuba njye nabisobanura. Sinakwiyumvisha ukuntu nishyuwe ibitego bitatu, ngatsindwa n’icya kane. Ndifuza kubona Valverde abisobanura ariko ndahamya ko biraba bimukomereye.”

Liverpool yasezereye Barcelona itegereje kuzahura ku mukino wa nyuma n’ikipe iza gukomeza hagati ya Totenham na Ajax Amsterdam mu mukino uri bube mu ijoro ryo kuri uyu wa 8 Gicurasi 2019.

Izindi wakunda

Bwiza.com