bwiza.com
Ahabanza » Rwamagana: Barishimira ibikorwa by’ingabo z’igihugu mu iterambere ry’abaturage
Amakuru Politiki

Rwamagana: Barishimira ibikorwa by’ingabo z’igihugu mu iterambere ry’abaturage

Ubuyobozi n’abaturage batuye mu karere ka Rwamagana, barishimira ibikorwa birimo gukorwa n’ingabo z’igihugu hagamijwe kwihutisha iterambere n’imibereho myiza y’abaturage.

Ibikorwa by’ingabo bigamije iterambere ry’umuturage mu Karere ka Rwamagana byatangiye tariki ya 17 Mata 2019, ibikorwa bikorwa birimo kuvura indwara,  gutunganya ibishanga no kubakira abatishoboye,…

Kuri uyu wa 8 Mata 2019 nibwo ingabo zifatanyije n’abayobozi n’abaturage mu gutunganya igishanga cya Butimba giherereye hagati y’imirenge ya Mwulire, Rubona na Nzige mu bikorwa by’ingabo bigamije kwihutisha iterambere n’imibereho myiza y’abaturage.

Abaturage bavuga ko ingabo zifite uruhare mu iterambere ry’igihugu ndetse gufasha abaturage batishoboye kugira ubuzima bwiza. Nsabimana Sylvestre, umwe mu baturage ushimira ingabo, asanga ubwitange buziranga bukwiye kuranga buri munyarwanda

Aragira ati “Hari ibikorwa byinshi bikorerwa abaturage kubera ubwitange bw’abasirikare bacu, nk’abaturage twese dukwiriye kubigiraho gukorana umurava mu bikorwa byo kubaka igihugu cyacu”.

Uyobora ingabo mu turere twa Rwamagana, Kayonza, Gatsibo na Nyagatare, Col Rugambwa Albert, yavuze ko ibikorwa by’ingabo mu iterambere ry’abaturage bifite amateka akomoka ku rugamba rwo kwibohora, ubwo basabwaga na Perezida wa Repubulika wari uyoboye urugama ko ingabo z’u Rwanda arizo zizaba umusingi w’impinduka n’iterambere rizaba mu Rwanda.

Yanakomeje avuga ko nyuma y’uko Inkotanyi zibohoye u Rwanda, zigahagarika na jenoside, zakomeje kugira uruhare mu iterambere ry’igihugu.

Col Rugambwa yanavuze ko mu bikorwa by’ingabo mu iterambere ry’abaturage hazakorwa ibikorwa byinshi birimo guhinga no gutunganya ibishanga, kubakira abatishoboye no kubasanira amazu, kubaka ibiraro byo mu mihanda no gusana ibyangiritse no kuvura abarwayi bafite indwara zitandukanye.

Umuyobozi w’akarere ka Rwamagana, Radjabu Mbonyumuvunyi  mu ijmbo yavuze  ubwo ingabo z’igihugu zifatanyaga n’abaturage  mu bikorwa byaberaga mu gishanga cya Butimba  yashimye ingabo z’igihugu ibikorwa zikorera abaturage.

Yagize ati “Kuba usanga abaturage bisanzura ku ngabo z’igihugu bifite icyo bisobanura kuko kuri Repubulika ya mbere n’iya kabiri ,umuturage yabaga atemerewe kwegera umusirikare, ndashimira perezida wa repubulika  wahuje ingabo n’abaturage bagafatanya mu iterambere ry’igihugu”.

Ibikorwa by’ingabo mu iterambere ry’umuturage mu gihugu hose birimo kuvura indwara z’amaso n’amenyo na serivisi z’isuku n’isukura zizahabwa abaturage 137.900, kubakira imiryango itishoboye 1.141, mu buhinzi hazahingwa hegitari zirenga 11.139,harwanywe isuri kuri hegitari zirenga 453, hazakorwa amaterasi y’indinganire kuri hagitari zirenga 1.114.

   

Izindi wakunda

Bwiza.com
error: Alert: Ntabwo byemewe!!