bwiza.com
Ahabanza » Perezida Kagame yavuze ko ntawe ugomba kurenga umurongo ‘utukura’ agambiriye guhungabanya u Rwanda
Amakuru Featured Politiki

Perezida Kagame yavuze ko ntawe ugomba kurenga umurongo ‘utukura’ agambiriye guhungabanya u Rwanda

Perezida wa Repubulika uri mu ruzinduko mu Ntara y’Amajyaruguru n’Uburengerazuba, yatangarije abaturage bo mu Karere ka Musanze na Nyabihu ko ntawe ukwiriye kurenga umurongo yise ‘utukura’ agambiriye guhungabanya umutekano w’u Rwanda.

Mu ijambo yagejeje ku mbaga y’abaturage bari bateraniye kuri Sitade ya Busogo kuri uyu wa Kane tariki ya 9 Gicurasi 2019, kimwe n’abandi banyarwanda bose muri rusange, Perezida Kagame yavuze ko hari umurongo ntarengwa ku muntu wese ugambiriye guhungabanya umudendezo w’u Rwanda ruri mu iterambere.

Yagize ati “Ni byabindi bita umurongo utukura, ntawe ugomba kurenga umurongo ku bijyanye n’umutekano wacu, ntawe mukwiye kwemerera yaba uri imbere cyangwa hanze, uwo murongo nturengwa”.

Yakomeje avuga ko hakenewe ubufatanye hagati y’inzego n’abaturage kugira ngo uwaba afite intego yo guhungabanya umutekano w’u Rwanda atabona uko arenga uwo murongo.

Ati “Ni umurongo ntarengwa kuko dushaka iterambere, ni ugufatanya kugira ngo hatagira urenga uwo murongo. Inzego bireba ndagira ngo zirabyumva[…]”.

Umunsi begereye umuriro uzabotsa

Ubwo yavugaga ku birebana n’umutekano ari mu karere ka Burera, ku munsi wa mbere w’uru ruzinduko, Perezida Kagame yavuze ko hari abavugira kure muri Amerika n’u Burayi, bagambiriye guhungabanya u Rwanda ariko ko umunsi bazaba begereye umurongo bazahura n’ingorane.

Yagize ati “Bariya mwirirwa mwumva bavugira kuri internet, waba uri muri America, South Afurika, cyangwa mu Bufaransa, bibwirako bari kure, ariko koko bari kure kuko bategereye umuriro. Umunsi begereye umuriro uzabotsa. Ibyo bari bakwiriye kuba babizi, bo n’ababashyigikiye”.

Yakomeje avuga ko umutekano ugomba kuboneka ku neza kandi ngo bishingiye ku kuba Abanyarwanda bumva ko ari ngombwa hagati yabo nk’Abanyarwanda ndetse no ku baturanyi.  Ati “Tugomba kuwubona ku neza byaba ngombwa no ku bundi buryo. Ntabwo twakwingingira abantu kuduha umutekano”.

Ku munsi wa kabiri w’uru ruzinduko arimo kugirira mu Ntara y’Amajyaruguru n’Uburengerazuba, Perezida Kagame yakiriwe n’ibihumbi by’abaturage bo muri Musanze no mu Mirenge y’utundi turere byegeranye cyane Nyabihu, akaba yaherukaga gusura aka gace ku wa ku wa 26 Nyakanga 2017, ubwo yiyamamazaga ku mwanya w’umukuru w’igihugu.

Perezida Kagame asubuza ibihumbi by’abaturage kuri sitade ya Busogo

Izindi wakunda

Bwiza.com
error: Ntibyemewe