bwiza.com
Ahabanza » Ibyaha by’ihohotera rishingiye ku gitsina bibabaza Imana- Papa Francis
Amakuru Iyobokamana

Ibyaha by’ihohotera rishingiye ku gitsina bibabaza Imana- Papa Francis

Umushumba wa Kiliziya Gatolika ku isi Papa Francis yasohoye amabwiriza agamije gukurikirana, gutanga amakuru no guhana abihayimana bakora ibyaha by’ihohotera rishingiye ku gitsina.

Amagambo abanziriza aya mabwiriza agira ati: “Ibyaha by’ihohotera rishingiye ku gitsina bibabaza Imana, bigashengura imitima n’imibiri y’ababikorewe bigakomeretsa umuryango n’ukwizera”.

Mu bihugu binyuranye ku isi, hari bamwe mu bihayimana ba Kiliziya Gatolika barezwe ibyaha byo gusambanya abana bato no gusambanya abandi banyantege nke imbere yabo.

Icyegeranyo mu mashusho cyitwa “Sex Crimes and the Vatican” cyakozwe na BBC mu mwaka wa 2006, cyagaragaje birambuye uko ibi byaha bikorwa, ubuhamya bw’ababikorewe n’imbaraga ababikora bakoresha mu kubihisha ngo bidakurikiranwa.

Kiliziya Gatolika yagiye ishinjwa “gutseta ibirenge” mu gukurikirana no kugaragaza ubukana bw’iki kibazo, gukurikirana abagikora no guhangana n’ingaruka iki cyaha kigira ku bagikorewe.

Kuva yatorwa mu mwaka wa 2013, Papa Francis yazanye amatwara mashya mu migenzereze imwe ya Kiliziya. Mu kwezi kwa kabiri uyu mwaka, yari yasezeranyije ko agiye guhagurukira ihohotera rishingiye ku gitsina.

Aya mabwiriza mashya Vaticani yasohoye, avuga ko areba abihayimana mu nzego zose.

Agizwe n’ingingo 19 zigamije gukumira, gukurikirana no guhana abihayimana basambanya abana, basambanya abagore ku ngufu n’irindi hohoterwa rishingiye ku gitsina.

Aya mabwiriza yakiriwe neza na bamwe mu bakurikirana ibya Vaticani bemeje ku mbuga nkoranyambaga ko ari intambwe ikomeye Kiliziya iteye mu kurwanya iki cyaha.

Zimwe mu ngingo zigize aya mabwiriza zirimo nko gutanga amakuru, kurengera uwatanze amakuru n’uwakorewe iki cyaha, kurinda amakuru, gukora iperereza kuri ibi byaha, kwita byihariye ku bana n’abanyantege nke bagikorewe, n’ikigega cy’imari cyagenewe ibi by’umwihariko.

Inzego za Kiliziya ziri muri aya mabwiriza ni zo zizakurikirana iyubahirizwa ryayo.

Aya mabwiriza yashyizweho umukono na Papa Francis, akaba avuga ko agomba gutangira gushyirwa mu bikorwa guhera ku itariki ya mbere y’ukwezi gutaha kwa gatandatu uyu mwaka.

Izindi wakunda

Bwiza.com