bwiza.com
Ahabanza » Rwamagana: Urubyiruko rwiga muri kaminuza rwasabwe kwirinda amacakubiri
Amakuru Politiki

Rwamagana: Urubyiruko rwiga muri kaminuza rwasabwe kwirinda amacakubiri

Ku wa Kane tariki ya 9 Gicurasi 2019, abanyeshuri biga muri Kaminuza yigenga y’Abalayiki b’Abadivantisite b’umunsi wa karindwi UNILAK,ishami rya Rwamagana bibutse Abatutsi bishwe muri jenoside mu 1994, abayobozi bitabiriye uwo muhango basaba urubyiruko kwirinda amacakubiri kandi bakarwanya ingengabitekerezo ya jenoside.

Mu kiganiro cyatanzwe na Bimenyimana Valens ukora muri komisiyo y’igihugu yo kurwanya jenoside mu ishami ry’ubushakashatsi, yagarutse ku mateka Abanyarwanda banyuzemo yaranzwe no kuvangura guhera mu gihe cy’ubukoroni, bikomeza muri Repubulika ya mbere yayobowe na Gregoire Kayibanda wasimbuwe na Juvenal Habayarimana, ngo wafashe ubutegetsi avuga ko agiye gukora impinduka ariko ntibyakorwa.

Yakomeje avuga ko Leta ya Habyarimana yaranzwe no kuvangura Abanyarwanda ndetse inategura jenoside yakorewe Abatutsi mu 1994 .

Bimenyimana yasabye urubyiruko kandi kurangwa no kugira ubumuntu bakarwanya amacakubiri bakanahangana n’uwashaka kubabibamo ingengabitekerezo ya jenoside ahubwo bagaharanira guhangana n’ingaruka zasizwe nayo bagasenyera umugozi umwe, bagamije kubaka u Rwanda n’amateka meza azatuma jenoside itazongera ukundi .

DR Semana Javan umuhuzabikorwa wa Inilak ishami rya Rwamagana yasabye urubyiruko rwiga muri kaminuza kubakira kubumwe bakirinda amacakubiri

Yagize ati “Iyo twibuka jenoside yakorewe Abatutsi tunibuka amateka mabi kugira ngo twubake amateka meza y’Abanyarwanda, twiyubakemo ikizere ,kuko kwibuka ni umuti wo gusana ibyangijwe no kongera kubaka ubumuntu mu bantu. Urubyiruko nkamwe mwiga kaminuza uyu ni umwanya wo gutekereza kubaka u Rwanda rwiza twifuza ruzira amacakubiri n’ingengabiterezo ya jenoside no gusubiza agaciro umuntu.”

Ushinzwe gahunda ya ndi umunyarwanda n’ibikorwa by’ubumwe n’ubwiyunge mu Ntara y’Iburasirazuba,Werabe Sarah,  wari uhagarariye Govereneri  na we yasabye urubyiruko rwiga muri kaminuza kwirinda ibikorwa bihembera ingengabiterezo ya jenoside. Aho yagize ati “Iyo twibuka tuba dusubiza abacu agaciro n’ubumuntu bambuwe ariko tugafata umwanya wo gufata ingamba kugirango jenoside ntizongere kubaho kandi nashimye ko mwebwe urubyiruko mwiyemeje guhangana n’uwashaka kongera gusubiza abanyarwanda inyuma”.

Yakomeje avuga ko hari abagifite ingengabitekerezo ya jenoside barimo n’abavutse nyuma yayo, ko ari ikibazo buri wese agomba guhagurukira kikarwanywa.

Izindi wakunda

Bwiza.com
error: Alert: Ntabwo byemewe!!