bwiza.com
Amakuru Politiki

Burundi: Abashinjwa kugaba ibitero ku nkambi za gisirikare bagejejwe mu rukiko nyuma y’imyaka 4

Mu kwezi ku Ukuboza 2015, nibwo hagabwe ibitero ku nkambi za gisirikare mu Burundi, abashinjwa iki gikorwa bakaba bagejejwe imbere y’urukiko nyuma y’imyaka ine ishize batarahabwa ubutabera.

Aba bantu biganjemo urubyiruko basanzwe bafungiye muri gereza ya Muramvya, bakaba bashinjwa kuba baragabye ibitero ku nkambi za gisirikare mu kwezi k’Ukuboza 2015. Itsinda rya mbere ryumviswe mu rukiko ku wa Gatatu tariki ya 8 Gicurasi, irindi ryumvwa kuwa Kane.

Nyuma yo kuvanwa muri iyi gereza ya Muramvya, abashinjwa bumviswe mu rukiko rwa Mukaza mu byiciro bitewe n’aho bakomoka. Batandatu b’i Jabe na barindwi b’i Nyakabiga, bumviswe ku wa Gatatu mu gihe ikindi gikundi cy’abantu 36 b’i Musaga humviswe ubwiregure bwabo ku wa Kane.

Abunganira abaregwa basabye ko bakurikiranwa n’inkiko zo mu Ntara bakomokamo ariko ubu busabe ntabwo bahawe agaciro, gusa abaregwa n’ubwo bahakana ibyo bashinjwa, bavuga ko aho bazaburanishirizwa hose biteguye kuburana kugira ngo batazongera kumara igihe kirekire nk’icyo bamaze bafunze  bataraburana.

Ku wa 11 Ukuboza 2015, nibwo ku nkambi eshatu za gisirkare hagabwe ibitero, Leta y’u Burundi yemeje ko byaguyemo abantu 79, ikavuga ko nabo bari abitwaje intwaro banambaye imyenda ya gisirikare, mu gihe Imiryango iharanira uburenganzira bwa muntu yo yatangazaga ko abishwe barenga ijana kandi ko bari biganjemo abasivile.

Izindi wakunda

Bwiza.com