bwiza.com
Amakuru mu Rwanda

Nyagatare: Croix Rouge yashimiwe kugoboka Abanyarwanda birukanwe muri Tanzaniya

Ku wa Gatanu tariki ya 10 Gicurasi 2019, mu murenge wa Karangazi, Akarere ka Nyagatare, habereye ibirori  byo kwizihiza imyaka 156 umuryango utabara imbabare (Croix Rouge) umaze ushinzwe. Mu butumwa bwatanzwe n’umuyobozi w’akarere ka Nyagatare wungirije  ushinzwe ubukungu n’iterambere, yawushimiye uburyo wagobotse abanyarwanda birukanwe muri Tanzaniya ikabafasha guhindura imibereho yabo.

Mbere yo kwizihiza ibyo birori basuye ibikorwa by’ubuhinzi n’ubworozi Croix Rouge y’u Rwanda yafashijemo abanyarwanda birukanwe muri Tanzaniya.

Mu karere ka Nyagatare mu mirenge ya Rwamiyaga na Karangazi Croix rouge yaguriye abo baturage ubutaka bugera kuri hegitari 25 zikorerwaho ibikorwa by’ubuhinzi n’ubworozi banarozwa inka 60, yanabafashije mu mishanga ibyara inyungu.

Mu buhamya bwa Rutayisire Steven avuga ko croix Rouge yasanze babayeho mu ruhuri rw’ibibazo byari bibugarije ariko ikaba yarabagejeje ku bikorwa byahinduye imibereho yabo.

Yagize ati “Twavuye mu gihugu cya Tanzaniya mu mwaka wa 2013 twageze hano arangazi 2014 , tuhageze Leta yakomeje kudufasha nyuma aho Croix Rouge iziye yaradufashije itugurira ubutaka duhingaho, yaduhaye n’amatungo yo kororo byadufashije kuva mu mibereho twarimo kuko itari myiza, ntabwo twari tumenyereye guhinga ariko tugeze hano twasanze abahatuye batunzwe n’ubuhinzi n’ubworozi.

Yakomeje agira ati “Twafashijwe guhinga tunabona umusaruro ku buryo ubu twihaza mu biribwa tugashyira n’udufaranga kuri konti  kuko duteganya kwigira ku buryo igihe inkunga badutera izaba itakibonetse tuzabasha kwitunga  n’imiryango ku buryo nta kibazo cy’imibereho mibi tuzagira”.

Perezida wa Croix Rouge y’u Rwanda, Dr Bwito Paul yavuze ko Croix Rouge y’u Rwanda igoboka abababaye kurusha abandi harimo n’Abanyarwanda birukanwe muri Tanzaniya.

Yagize ati “Uyu munsi turizhiza imyaka 156 ishize hatangiye ibikorwa by’ubutabazi byatangijwe na Henry Dunant w’umusuwisi mu myaka, hano mu karere ka Nyagatare twafashije abanyarwanda birukanwe muri Tanzaniya tubagurira ubutaka bugera kuri hegitari 25 ndetse tunabaha amatungo arimo inka 60 zimwe mwabonye twaboroje kandi ihene 252 tunabafasha mu mishanga iciriritse”.

Arakomeza, ai “Tukaba rero twishimira ibyo bikorwa tugeza ku baturage babaye kurusha abandi turashima ubufatanye bw’inzego z’ibanze ku rwego rw’akarere n’intara n’izindi nzego ndetse n’abaterankunga n’abakorerabusha n’abanyamuryango bacu badufasha kugira ngo ibyo bikorwa bigere ku bagenerwabikorwa kuko intego dufite ari ugufasha umuturage ubwe kwikura mu bukene”.

 umuyobozi w’akarere ka Nyagatare ushinzwe ubukungu n’iterambere, Rurangwa Stephen, yashimiye Croix Rouge yakoze ibikorwa by’indashyikirwa mu gufasha abaturage mu iterambere, agira ati”Abantu bamwe bari bayizi nk’umuryango  utabara mu gutanga amaraso ariko nk’uko mu bibonye ibikorwa mwabonye ubwabyo biruvugira.

Umunsi mpuzamahanga wa Croix Rouge ubusanzwe wizihizwa tariki ya 8 Gicurasi akaba ariwo munsi Henry Dunant wayishinze yavukiyeho. Croix Rouge yageze mu Rwanda mu mwaka wa 1962 wemerwa  na Leta nk’umuryango utegamiye kuri Leta ukora ibikorwa by’ubutabazi mu 1964.

Izindi wakunda

Bwiza.com