bwiza.com
Ahabanza » Rayon sports itsinze Amagaju FC bituma yisubiza umwanya wa mbere naho Amagaju amanuka mu cyiciro cya kabiri
Imikino

Rayon sports itsinze Amagaju FC bituma yisubiza umwanya wa mbere naho Amagaju amanuka mu cyiciro cya kabiri

 

Ikipe ya Rayon Sports ikuye amanota atatu I Nyagisenyi nyuma yo gutsinda ikipe y ‘Amagaju ibitego bibiri kuri kimwe (2:1) bituma Rayon sports yisubiza umwanya wa mbere ku rutonde rwa shampiyona naho ikipe ya Amagaju ihita imanuka mu cyiciro cya kabiri bidasubirwaho.

Rayon Sports yagiye gukina uyu mukino izi neza ko mukeba wayo APR FC yatsinze Gicumbi Fc ibitego bitatu kuri kimwe ndetse ikaba yari yafashe n’umwanya wa mbere by’agateganyo. Ibi byongereye Rayon imbaraga nyinshi kugira ngo itsinde yisubize umwanya wa mbere.

Uyu mukino watangiye ikipe ya Rayon isatira mu buryo bukomeye bituma rutahizamu wayo ukomoka muri Brazil Jonathan Rafael da Silva atsinda igitego mu gice cya mbere.

Amagaju yagerageje kwihagararaho ariko igice cya mbere kirangira Rayon ariyo iyoboye umukino.

Ikipe y’ Amagaju yari yakaniye kuko nayo ntabwo yashakaga gutsindwa kuko gutsindwa kwayo yari guhita imanuka mu cyiciro cya kabiri. Amagaju yagerageje guhererekanya neza mu gice cya kabiri bituma yishyura igitego yari yatsinzwe.

Rayon Sports yakinnye idafite bamwe mu bakinnyi bayo bakomeye barimo Michael Sarpong na Eric Rutanga, yakomeje kotsa igitutu ikipe ya Amagaju mu minota ya nyuma bituma ibona igitego cyatsinzwe na Mudeyi Suleiman.

Iyi nsinzi Rayon ibonye ikaba ibafashije gusubirana umwanya wa mbere n’amanota 63 ikaba ikurikiwe na APR FC n’amanota 62. Uyu mukino ukaba wari umunsi wa 27 wa shampiyona y’igihugu y’umupira w’amaguru, Azam Rwanda Premier League.

Nyuma y’uyu mukino, ikipe y ‘Amagaju ikaba imanutse mu cyiciro cya kabiri bidasubirwaho n’amanota 17 kuko ikipe ya Gicumbi iyi banziriza ifite amanota 27 kandi hasigaye imikino itatu ihwanye n’amanota icyenda.

Nkurunziza Viateur @Bwiza.com

Izindi wakunda

Bwiza.com