bwiza.com
Amakuru mu mahanga Umutekano

Ingabo za Uganda muri Somalia zakozanyijeho, 4 zihasiga ubuzima

Mu murwa mukuru wa Mogadishu, Abasirikare ba Uganda bari mu butumwa bw’amahoro mu Somalia, kuri uyu wa gatanu, tariki ya 10, bagize ugushyamirana kwabyaye kurasana, 4 bahasiga ubuzima.

Ikinyamakuru Chimp Reports, cyagerageje kuvugana n’umuvugizi w’ingabo za Uganda, Brig. Richard Karemire, agihamiriza ko koko ayo mahano yabaye.

“Barasaniye ku kigo kiri mu murwa mukuru wa Mogadishu.” Brig. Karemire.

Iki kinyamakuru gikorera muri iki gihugu, gikomeza kivuga ko uku kurasana kwatewe no kutumvikana kwabaye hagati y’izi ngabo zoherejwe muri ubu butumwa. Nyuma yo kutumvikana, zatangiye kurasana.

Brig. Karemire wavuze ko iperereza ku mpamvu yo gushyamirana hagati y’aba basirikare rigikomeje, bamubajije niba hari amakuru amaze kuboneka, yirinda kugira icyo atangaza. Impamvu imwe yatuma amakuru adatangwa mu gihe iperereza rigikomeje, ni ukugira ngo ritabangamirwa, ibyo bashakaga kugeraho bikazitirwa.

Amazina y’abasirikare b’ingabo za Uganda (UPDF) baguye muri uku gushyamirana ntabwo aratangazwa.

Amakuru aturuka muri AMISOMA (African Union Mission in Somalia) avuga ko Uganda yatangiye kohereza abasirikare bayo mu butumwa bw’amahoro muri Somalia kuva mu 2007. Kugeza ubu Uganda ni cyo gihugu gifite ingabo nyinshi muri Somalia. Ubu zigera ku 6,223. Uku gushyamirana ni ko kwa mbere gutwaye ubuzima bw’abasirikare benshi ba Uganda.

Izindi wakunda

Bwiza.com