bwiza.com
Imikino

Ni iki Shampiyona y’Ubwongereza isize muri uyu mwaka wa 2018/2019?

Shampiyona y’Ubwongereza y’umupira w’amaguru, icyiciro cya mbere, muri uyu mwaka yaranzwe no guhatana gukomeye hagati y’amakipe, abatoza n’abakinnyi muri rusange.

Bitandukanye n’imyaka y’imikino yatambutse, byagaragariye amaso y’abakunzi bumupira w’amaguru ko habayeho guhatana cyane.

Duhereye ku gikombe cy’iri rushanwa, byabaye ngombwa ko abakunzi b’uyu mukino dutegereza umunsi wa nyuma. Manchester City yari yiteguye gukina na Brighton & Hove Albion yari yiteguye gutwara igikombe, mu gihe na Liverpool yiteguraga Wolves na yo yiteguraga igikombe iramutse itsinze, City ikanganya cyangwa igatakaza.

Mbibutse ko iyi mikino ya nyuma itaraba, Manchester City yarushaga Liverpool inota rimwe gusa. Iyo Man. City itsindwa, Liverpool igatsinda, City yari kurushwa amanota abiri. Iyo City inganya, Liverpool igatsinda; byari kuyihesha igikombe irusha City inota rimwe.

Ibyifuzo by’abakunzi ba Liverpool n’abandi bari bayishyigikiwe ntibyagezweho, mu gihe aba City bishimiraga igikombe batwaye mu myaka ibiri yikurikiranya. Ibitego bya Aguero, Laporte, Mahrez na Gündogan ni byo bihesheje iyi kipe igikombe.

Brighton yatsindiwe igitego rukumbi na Murray. Liverpool yo yatsindirwaga na Sadio Mane ibitego 2 ku busa bwa Wolves.

Andi mateka uyu mwaka udusigiye:

Urukweto rwa zahabu rutwawe n’abakinnyi batatu.

Ku bitego 22 bose bamaze gutsinda, byabaye ngombwa ko Muhamed Salah na Sadio Mane ba Liverpool na Pierre Emerick Aubameyang wa Arsenal basangira igihembo cy’urukweto rwa zahabu.

Ibi bitandukanye n’umwaka ushize, ubwo Muhamed Salah yatwaraga iki gihembo ku bitego 32, ahigitse Harry Kane wa Tottenham bari bamaze igihe kinini bakubana. Mbere yiyi mikino ya nyuma, Mohamed Salah ni we wari uyoboye mu bitego, ariko ibitego 2 bya Mane na Aubameyang ku mukino wa nyuma bituma basaranganya.

Sergio Aguero wa Man. City na we yahabwaga amahirwe yo kwiyongera mu mubare wabasaranganya uru rukweto rwa zahabu, ariko yatsinze igitego kimwe gusa ku mukino ikipe ye yakinaga na Brighton; agira ibitego 21.

Bakurikiranye batya : Mohamed Salah(22), Sadio Mane (22), Aubameyang (22), Aguero (21), Jamie Vardy (18), Harry Kane (17), Raheem Sterling (17) na Eden Hazard (16)

Ikiganza bya zahabu na cyo cyabonye nyiracyo ku munsi wa nyuma.

Ni igihembo gihabwa umuzamu witwaye neza kurusha abandi; hashingiwe cyane ku watsinze atinjizwa igitego inshuro nyinshi; bimwe twita Clean Sheets. Ederson wa Man. City yari afite imikino 20 ikipe ye yatsinze atinjizwa igitego. Alison wa Liverpool na we byari uko.

Umukino wa nyuma ni wo wabaye umucamanza utabera; ubwo Ederson yinjizwaga igitego na Brighton, mu gihe Alison nta gitego yinjijwe ubwo Liverpool yatsindaga Wolves. Alison aba agize clean sheets 21.

Uko bakurikiranye: Alisson (21), Ederson (20), Kepa Arrizabalaga (14), Jordan Pickford (14) na Hugo Lloris (12).

Ihatana mu myaka 4 ya mbere

Imyanya 4 ya mbere muri iki kiciro cy’iyi shampiyona irahatanirwa cyane, kuko ni yo ihesha amakipe kwitabira irushanwa rya UEFA Champions League; irushanwa rihuza amakipe yabaye aya mbere iwayo ku mugabane w’i Burayi. Ni irushanwa rikomeye cyane, ryinjiza n’akayabo k’amafaranga ku makipe yaryitabiriye.

Keretse Liverpool na Manchester City yari yamaze kuboneka muri ane ya mbere, za Tottenham, Chelsea, Arsenal na Manchester United zari zigihatanira iyi myanya. Imikino yabanjirije uyu wa nyuma ni yo yahamije amakipe agomba kuzitabira iri rushanwa rikomeye i Burayi kubera ko yamaze kwibona muri ane ya mbere. Ayo ni Tottenham na Chelsea.

Mu minsi ya nyuma ya shampiyona, twavuga ko aya makipe uko ari ane asa n’ayagendaga yirangaraho kuko uko buri kipe yatsindwaga, ni na ko nindi yatsindwaga cyangwa ikanganya.

Ibyo byagaragaye cyane ku makipe nka Arsenal na Man. U yirinze gusigana. Umusaruro waya makipe abiri mu mikino ihera ya shampiyona ni yo yazishyize mu myaka iri inyuma y’ine ya mbere.

Nsoza, navuga ko iri rushanwa ryaryoheye abakunzi bumupira wamaguru, ku mpamvu yo guhatana gukomeye kwaranze uyu mwaka.

Izindi wakunda

Bwiza.com