bwiza.com
Ahabanza » RDC: Inyeshyamba ziyobowe na Mukombozi zishe umugore n’umugabo zibakase amajosi
Amakuru Politiki

RDC: Inyeshyamba ziyobowe na Mukombozi zishe umugore n’umugabo zibakase amajosi

Inyeshyamba ziyobowe n’uwitwa Mukombozi zishe umugore n’umugabo zibakase amajosi mu ijoro ryo ku wa Gatandatu tariki ya 11 Gicurasi 2019, mu gace ka Tshinongo, kari mu Bilometero 15 uvuye i Kakenge muri Teritwari ya Mweka, Intara ya Kasaï.

Sosiyeti Sivile itangaza ko aba bantu babiri bishwe bashinjwa amarozi, umwuka mubi ngo ukaba waratangiye ubwo umunyeshuri wari mu mwaka wa nyuma w’amashuri yisumbuye yafatwara n’uburwayi mu gace ka Tshinongo.

Nk’uko Radiyo Okapi ibitangaza, ngo uwo munyeshuri yari yafashwe n’uburwayi bwo guta ubwenge, agafatwa n’uburwayi budasobanutse ubwo yari ageze mu kizamini cya Leta. Umuryango we ugashinja uyu mugabo n’umugore kumuteza imyuka mibi.

Nyuma y’ayo makuru yose yari amaze iminsi, ngo inyeshyamba za Mukombozi zimaze kuyamenya, zavuye aho zibarizwa mu bihuru, zica uyu mugore n’umugabo zibona gusubira mu birindiro byazo.

Urupfu rwabo ngo rwatumye abaturage bagira impungenge, mu gihe umuyobozi wa Teritwari ya Mweka, Jacob Pembelongo yatangarije iyi Radiyo ko nyuma y’iryo bara ryabaye abaturage batekanye.

 

Izindi wakunda

Bwiza.com
error: Ntibyemewe