bwiza.com
Ahabanza » Abasaga 4000 bavuye mu byabo bahunga imirwano yahuje FARDC n’inyeshyamba zikomoka Uganda
Amakuru Politiki

Abasaga 4000 bavuye mu byabo bahunga imirwano yahuje FARDC n’inyeshyamba zikomoka Uganda

Abantu basaga ibihumbi bine bavuye mu ngo zabo bahunga imirwano yahuje inyeshyamba za ADF zikomoka muri Uganda hamwe n’abasirikare ba Repubulika Iharanira Demokarasi ya Congo (FARDC), mu Ntara ya Ituri.

Iyi mibare yashyizwe hanze na Sosiyeti Sivile yo mu gace ka Banyali Tsaby, ko abenshi mu baturage bahunze berekeje mu gace ka Boga. Aho bahungiye ubuzimba ngo bukaba bumeze nabi, bityo bakaba basaba Leta kubafasha.

Umwe muri izi mpunzi yagize ati “Ntabwo turya, ku ruhande rwanjye, turi abantu 12 mu cyumba kimwe nta matela dufite. Benshi barara hasi, njyewe mfite abana batatu ariko birakomeye. Bamwe muri twe bararembye kandi nta miti dufite”.

Nk’uko ikinyamakuru Actualitecd kibitangaza, Pacifique Keta, Guverineri w’agateganyo w’Intara ya Ituri, avuga ko barimo gushaka icyakorwa bafatanyije n’imiryango iharanira uburenganzira bw’ikiremwamuntu.

Yagize ati “Twagiranye ikiganiro n’imiryango byibura igera kuri 14 kugira ngo iki kibazo gishakirwe umuti. Imiryango itegamiye kuri Leta yahageze kandi ifite gahunda yo gukemura iki kibazo”.

Imirwano hagati ya FADC na ADF yatangiye mu cyumweru gishize, umusirikare umwe akaba yarahaburiye ubuzima, inyeshyamba zibarirwa muri 60 zifatwa mpiri.

Izindi wakunda

Bwiza.com