bwiza.com
Ahabanza » Bazeye na Abega bari abayobozi muri FDLR basabiwe gufungwa indi minsi 30
Amakuru

Bazeye na Abega bari abayobozi muri FDLR basabiwe gufungwa indi minsi 30

Nkaka Ignace uzwi ku izina rya La Forge Fils Bazeye wari umuvugizi w’inyeshyamba za FDLR na Lt.Col Nsekanabo Jean Pierre uzwi nka Abega Camara, wakoraga mu rwego rw’ubutasi muri uyu mutwe, basabiwe n’ubushinjacyaha bw’u Rwanda gufungwa indi minsi 30 y’agateganyo.

Niwo munsi wa mbere aba bayobozi bombi bagaragaye mu rukiko bambaye impuzankano z’iroza. Umucamanza akaba yasabye Ubushinjacyaha impavu yo gusubiza aba bagabo mu rukiko.

Ubushinjacyaha bwagaragaje ko Bazeye na Abega bashinjwa ibyaha bikomeye birimo n’iterabwoba, bityo ko baba bakomeje gufungwa indi minsi 30 mu gihe dosiye yabo igitunganywa bakabona kuburana mu mizi.

La Forge Fils Bazeye yasabye urukiko ko rwakwihutisha ibisabwa akaburanishwa mu mizi, mu gihe uwunganira Abega, Me Mukeshinema Beatha avuga ko igihe ubushinjacyaha bumaranye dosiye y’umukiriya we gihagije, bityo ko rwasuzuma ubusabe bw’Ubushinjacyaha rukareba ko bufite ishingiro rukaba ari bwo rufata ikemezo.

Bazeye na Abega bafatiwe ku mupaka wa Bunagana tariki ya 15 Ukuboza 2018 bafashwe n’ingabo za Congo aho bari bavuye muri Uganda . Boherejwe na Congo mu Rwanda muri Mutarama 2019.

Ku wa Gatatu tariki ya 10 Mata 2019 , nibwo urukiko rw’ibanze rwa Gasabo rwasomye umwanzuro w’urukiko ku ifungwa n’ifungurwa ry’agateganyo ry’aba bagabo bombi baherukaga mu rukiko ku wa mbere tariki ya 8 Mata 2019, maze urukiko rwemeza ko bagomba gufungwa by’agateganyo ku mpamvu y’uko barekuwe bashobora gusubira muri FDLR.

Aba bagabo bakurikiranweho ibyaha birimo; kuba mu mutwe w’iterabwoba wa FDLR, gukora iterabwoba,kuba mu mitwe itemewe no kwamamaza amakuru yangisha abaturage ubuyobozi buriho ndetse no kubahamagarira kuza muri iyo mitwe .

Nyuma yo kumva impande zombi, Umucamanza yavuze ko icyemezo cy’urukiko kizasomwa ku wa Kabiri tariki 14/05/2019, saa Cyenda.

 

 

 

Izindi wakunda

Bwiza.com
error: Ntibyemewe