bwiza.com
Ahabanza » Ese Gen.Niyombare yaba aherereye he muri iyi myaka ine ishize?
Amakuru Politiki

Ese Gen.Niyombare yaba aherereye he muri iyi myaka ine ishize?

Itariki ya 13 Gicurasi 2015, ntabwo izibagirana mu mitwe y’Abarundi by’umwihariko Ishyaka CNDD-FDD riri ku butegetsi na Perezida Nkurunziza wari ugiye gukurwa ku ntebe ku ngufu, bikarangira umugambi upfubye.

Ikipe y’abasirikare n’abapolisi bari bayobowe na Gen Niyombare Godefroid, kuri iyi tariki nibwo bagerageje guhirika ku butegetsi Perezida Nkurunziza wari mu nama muri Tanzania, birangira umugambi ubapfubanye.

Gen Niyombare wari uyoboye uyu mugambi, yari yatangarije kuri radiyo yigenga ko Nkurunziza yakorewe Coup d’Etat, nyuma nibwo ibintu byaje guhindura isura, abamushyigikiye banesha abari bamwigumuyeho,birangira bamwe bahunze abandi barafatwa barafungwa.

Kuva icyo gihe Gen Niyombare wahise ahunga, ntabwo yari yongera kwigaragaza ndetse n’agace aherereyemo ntabwo kazwi.

Gen Niyombare yabitswe ariho!

Abatari bacye bakomeje kwibaza impamvu Gen. Godefroid Niyombare atagaragara ndetse bakanavuga ko yaba yarishwe ngo kuko atagaragara na gato mu bibazo bya politiki byugarije u Burundi mu gihe ari mu bantu batanze itangazo rivuga ko ashyigikiye ishingwa ry’ ihuriro CNARED.

Hari amakuru yakwirakwijwe ku mbuga nkoranyambaga ko Niyombare yishwe ku  itariki 6 Nzeri 2016, ahagana saa moya aho yari ari muri  Congo/ Brazavil mu misozi miremire, aho ngo yari yihishanye na bamwe mu ngabo ze.

Ni kenshi kandi byagiye bivugwa ko Niyombare yatijwe amaboko n’u Rwanda ubwo yageragezaga guhirika Nkurunziza ku butegetsi, muri Gicurasi 2017 ubwo yagiranaga ikiganiro n’Ikinyamakuru Jeune Afrique, ari nabwo benshi babonaga ko akiriho atapfuye, nibwo yanyomoje menshi mu makuru, anavuga ko u Rwanda rurengana.

Umunyamakuru wa Jeune Afrique wemeje ko yaganiriye na Gen Niyombare, ubwo yagiranaga ikiganiro na TV5, yavuze ko yamutangarije ko nta gihugu cyo mu karere cyamufashije.

Ati “Yavuze ko Nta na rimwe yigeze ashyikirana n’u Rwanda, nta ruhare na rumwe[u Rwanda] rwigeze rugira muri iryo hirikwa ry’ubutegetsi, yewe ngo nta n’igihugu cyo mu karere kigeze kimufasha muri icyo gikorwa. Ahubwo ngo ni igikorwa kireba Abarundi n’Abarundikazi”.

Yanavuze ko ataba mu Rwanda, ahubwo ko aba mu mashyamba ari hafi y’u Burundi na Congo aho ngo ayoboye umutwe FOREBU w’inyeshyamba zahoze mu gisirikare cy’u Burundi.

Gen. Godefroid Niyombare yabaye umutoni wa Perezida Nkurunziza nk’ umuntu babanye mu ishyamba ariko umubano bari bafitanye watangiye gucumbagira ubwo yamugiraga inama yo kutaziyamamariza manda ya gatatu bikamuviramo no kwirukanwa ku mwanya w’ umukuru w’ urwego rw’ iperereza m u Burundi.

 

Izindi wakunda

Bwiza.com
error: Ntibyemewe