bwiza.com
Ahabanza » Minisiteri y’Ubuzima yagejeje kuri Komisiyo y’Ingengo y’Imari gahunda ya 2018/2019 na 2019/2020
Ubuzima

Minisiteri y’Ubuzima yagejeje kuri Komisiyo y’Ingengo y’Imari gahunda ya 2018/2019 na 2019/2020

Mu nyubako y’inteko ishinga amategeko, uyu munsi, tariki ya 13 Gicurasi, Minisitiri  w’Ubuzima,  Dr. Diane Gashumba yagejeje kuri Komisiyo y’Ingengo y’Imari n’Umutungo by’igihugu aho ingengo y’imari ya 2018/2019 igeze ishyirwa mu bikorwa n’ibikubiye mu ngengo y’imari ya 2019/2020.

Imbere y’abadepite, Minisitiri Gashumba yavuze ko icyo bagomba kwibandaho kikiri imbogamizi ari ibitaro bya Nyagatare na Ruhengeri bitakijyanye n’igihe, bitewe n’inyubako zabyo zishaje. Yavuze kandi ko nta ngengo y’imari y’ibi bitaro yigeze ibaho muri uyu mwaka.

Minisiteri y’Ubuzima izibanda ku gushyira ibikoresho by’ikoranabuhanga mu mavuriro kugira ngo bive mu gukoresha impapuro, iganire n’ibitaro byisumbuye byo mu mahanga mu rwego rwo kwigisha abaganga kuvura bakoresheje iyakure.

Yaboneyeho gusaba abadepite ubuvugizi ngo haboneke ingengo y’imari ku mushinga wo kubaka Ikigo cy’Ubushakashatsi n’Amahugurwa ku byerekeye Kanseri yo mu igogora cyangwa se IRCAD (Research and Training Institute Against Digestive Cancer), ku buryo ingengo y’imari ya 2019/2020 yazarangira ishyirwa mu bikorwa rigeze kuri 29 %.

Minisitiri Gashumba yagize ati: “Turabona iki ari ikibazo gikomeye kuko amasezerano yo kubaka iki kigo irasinywa muri iki cyumweru batangire kubaka. Ni ikigo kidufitiye akamaro ku buryo tutakwifuza ko cyakwambukiranya kikarenza 2020 kubera akamaro kidufitiye n’imbaraga abafatanyabikorwa bashyizemo.”

Yavuze ko ibikoresho bihari, ikibanza Leta yaragitanze, babahaye izina ryacyo kugirango amahanga yose azajye ahateranira. Ati : “Twumva iki kigo gikwiye kujyaho, tukubaka mu buryo bwihuse tutazaririye cyane ko hari n’ibindi bihugu birimo kukirwanira.”

Hazubakwa ibitaro n’amavuriro 23, hashyirwemo n’ibikoresho. Hazubakwa kandi na ‘Poste de Sante’ nk’uko biri muri gahunda y’Umukuru w’Igihugu y’imyaka irindwi ko igomba kurangira buri kagari gafite ‘Poste de Sante’.

Ibindi bigize ingengo y’imari nshya ni ukwibanda ku mibereho y’abaganga bashyigikira ikigega bashyizeho cy’abakozi bo kwa muganga n’abo muri minisiteri n’ibigo biyishamikiyeho,  kongera ireme ry’abanyeshuri  bigishwa muri kaminuza; baba abaganga n’abafasha b’abaganga ku bufatanye na Minisiteri y’Uburezi kongera umubare w’ababyaza mu mavuriro, kurwanya imirire mibi, gushyira imbaraga mu kuboneza urubyaro.

Nyuma yo kugezwaho iyi gahunda y’ingengo z’imari zombi, abadepite batanze ibitekerezo, banabaza ibibazo  bigaruka ku byakwitabwaho ngo hanozwe ibikorwa byateza imbere ubuzima bw’abaturage.

 

 

 

 

Izindi wakunda

Bwiza.com
error: Ntibyemewe